Он гарсаар манай улс нийт 145 улстай худалдаа хийж, гадаад худалдааны нийт бараа эргэлт 10.8 тэрбум ам.долларт хүрчээ. Үүнээс экспорт 6.4 тэрбум ам.доллар, импорт 4.4 тэрбум ам.долларт хүрч, тэнцэл хоёр тэрбум ам.долларын ашигтай гарсан байна.
Түүнчлэн нийт бараа эргэлтийн хэмжээ өмнөх оны мөн үеэс нэг тэрбум ам.доллар, экспорт 74.9 сая ам.доллар, импорт 932.5 сая ам.доллароор тус тус өсөж, тэнцэл 857.5 сая ам.доллароор буурчээ. Экспорт энэ оны эхний таван сард өмнөх оны мөн үеэс 74.9 сая ам.доллароор өсөхөд нүүрс 172.9 сая ам.доллар, зэсийн баяжмал 54.9 сая ам.доллар, төмрийн хүдэр, баяжмал 41.9 сая ам.доллар,боловсруулаагүй буюу хагас боловсруулсан алт 39.5 сая ам.доллароор өссөн нь голлон нөлөөлсөн байна.
Харин цайрын хүдэр, баяжмал 74.4 сая ам.доллар, лаазалсан махан бүтээгдэхүүн 47.8 сая ам.доллароор тус тус буурчээ. Импорт өмнөх оны мөн үеэс 932.5 сая ам.доллароор өсөхөд суудлын автомашин 135.6 сая ам.доллар, дизелийн түлш 120.6 сая ам.доллар,бульдозер, авто хусуур, индүүдэгч, тэгшлэгч, экскаватор 76.3 сая ам.доллар,ачааны автомашин 65.4 сая ам.доллар, авто бензин 62 сая ам.доллар, цахилгаан шуудан утасны холбооны аппарат 47.3 сая ам.доллароор тус тус өссөн нь голлон нөлөөлжээ.
Экспорт энэ оны тавдугаар сард өмнөх сараас 131.4 сая ам.доллароор өсөж, импорт 43.1 сая ам.доллароор буурчээ. Алтны үнэ өмнөх оны мөн үеэс унци тутамд 254.2 ам.доллар, зэсийн баяжмалын үнэ тонн тутамд 47.6 ам.доллароор тус тус өсөж, нүүрсний үнэ тонн тутамд 34 ам.доллар, төмрийн хүдэр, баяжмалын үнэ тонн тутамд 5.9 ам.доллароор буурсан байна.
