УИХ-ын 2024 оны сонгуулийн үйл явцын ажиглалт, мониторингийн талаар “Шударга сонгуулийн төлөө иргэний нийгмийн хяналт сүлжээ” ТББ-ын төлөөллүүд мэдээлэл өглөө.
Тус байгууллагаас хэвлэл мэдээллийн сурталчилгааны асуудал, сонгогчдын нэрийн жагсаалт, сонгуулийн зардал зэрэг чиглэлд хяналт тавин ажиллаж байна.
Бодлогод залуусын хяналт ТББ нь сонгуулийн өдөр санал авах байранд нээлтээс эхлээд санал тоолох, дүн гарах хүртэл үйл явцыг ажиглахаар СЕХ-д бүртгүүлсэн. Өмнөх сонгуульд 100 хэсгийн хороонд 200 ажиглагч ажиллуулж байсан бол энэ жил өргөтгөөд 150 хэсгийн хороонд 300 сайн дурын ажиглагч ажиллуулахаар бэлтгэжээ.
Мөн Монгол Улсаас гадна гадаадад оршин суугаа иргэдийн сонгуульд хяналт тавих хүрээнд БНСУ, Япон, АНУ-д ажиллах иргэний нийгмийн ажиглагчдыг бэлтгэсэн байна.
Хэвлэл мэдээллийн сурталчилгааны тал дээр Глоб Интернэшнл Төвөөс телевизүүдэд хяналт тавьж, сонгуулийн мэдээлэлд тэнцвэртэй хандаж байгаа эсэх, сурталчилгааны цагийн зохицуулалтыг хэрхэн хийж байгааг хянан ажиллана. Мөн улс төрийн мэтгэлцээнийг зохион байгуулж байгаа эсэх болон сонгогчдын боловсролд зориулсан мэдээллийг гаргаж байгааг хянан ажиллах аж.
Сонгогчдын боловсрол төвөөс СЕХ-той хамтран сонгогчдыг мэдээллээр хангах 1800-2800 лавлах утсыг ажиллуулж байна. Сонгогч иргэд энгийн тарифаар өглөөний 8 цагаас оройн 8 цаг хүртэл тус утсаар холбогдон сонгуультай холбоотой мэдээллийг авах боломжтой юм.
