Саяхан Apple корпорац IPhone, IPad ухаалаг төхөөрөмжинд зориулсан IOS үйлдлийн систем 17.5.1 хувилбараа зах зээлд нэвтрүүлсэн билээ.Гэтэл энэхүү шинэчлэл гараад удаагүй байхад хэрэглэгчид шинэчлэлийн талаар гомдолтой байгаагаа олон нийтийн цахим сүлжээ болох Reddit дээр илэрхийлжээ. Учир нь, IOS хувилбараа шинэчилсний дараа тэдний хэдэн жилийн өмнө устгасан зургууд шинэ төхөөрөмж дээр нь дахин гарч ирсэн байна. Зарим хэрэглэгч хуучны зургуудаа олж авсанд баяртай байсан бол зарим нь устгасан гэж итгэсэн зургууд нь дахин гарч ирж цочирдуулсанд дургүйцжээ. Түүнчлэн, Apple хэрэглэгчдийнхээ мэдээллийг байнга цуглуулж, хадгалдаг гэх хардлагыг олон нийтэд төрүүлэв.Даваа гарагийн өглөө Apple корпораци залруулга хийхдээ энэ асуудлыг маш ховор тохиолдсон “өгөгдлийн сангийн алдаа” байсан гэжээ. Мөн хэрэглэгчдийн зураг, бичлэгийг ямар нэг зорилгоор ашигладаггүй гэдгээ мэдэгдэж, алдаагаа яаралтай засахаа илэрхийлэв.
