Ашигт малтмал хайх, ашиглах зориулалтаар газар, түүний хэвлийг тусгай зөвшөөрлөөр олгох, төлбөр, татвар ногдуулах, хураахтай холбоотой үйл ажиллагаанд хяналт шалгалт хийх үүрэг бүхий түр хороо нотлох баримтыг шинжлэн судлах сонсголоо энэ сарын 29-30-нд зохион байгуулахаар болсон.
Энэ талаар түр хороог ахалж буй УИХ-ын Эдийн засгийн байнгын хорооны дарга Ц.Цэрэнпунцаг "Богино хугацаанд хянан шалгах түр хороо ажилласан учраас зардал, чирэгдэл гарлаа. Хуваарилсан төсөв бага учраас уурхай бүр дээр очоод шалгаж ажилласан эсэх нь хэцүү. Жишээ нь, өмнө нь ажиллаж байсан уурхайг хэзээ зогссон гэдгийг тогтоохын тулд олон талын мэргэжилтэн ажиллах шаардлагатай. Бидэнд тийм их хэмжээний хүний нөөц, төсөв байхгүй. Тиймээс бэлэн байгаа нотлох баримт дээр суурилна. Дижитал хэлбэрийн мэдээлэлд тулгуурлаж байгаа. 2014 оноос өмнөх бичиг цаас, архив дээр суувал хэдэн арван хүн хэрэгтэй. Дээрээс нь цаг хугацаа шаардлагатай. Нийт 105 хүнийг гэрчээр дуудна. Ажиглагчаар зургаан байгууллага, хуулийн байгууллагын төлөөлөл оролцоно.
Гэрчийн нэрсийг гаргасан учраас хуулийн дагуу холбогдож сонсголд дуудна. Зарим нь Монголд байдаггүй гадаадын иргэд байна. Гадаадын иргэн эзэмшдэг компани байвал Монголд байгаа төлөөллийг дуудах учраас нэрсийн зөрүү гарна. Хуучин болон одоо ажиллаж буй нийт долоон сайд, төрийн нарийн бичгийн дарга нэг, агентлагийн дарга байсан хоёр, албан тушаалтнууд 28, алба хашиж байсан хоёр, одоогийн аймгийн Засаг дарга 10, сумын Засаг дарга зургаа, аж ахуйн нэгж 47, төрийн бус байгууллага дөрөв гэсэн нийт 105 гэрчийг дуудаж байна" гэлээ.
