Уншигч та бүхэндээ Буддын шашны талаарх тоо баримт болон сонирхолтой фактуудын талаар хүргэе.
Буддизмыг нь 2,500 гаруй жилийн өмнө одоогийн Непал улсад төрсөн хунтайж Сиддхарта Гаутама үүсгэсэн гэж эрдэмтэд үздэг. Тэрбээр Буддын шашныг үндэслэснийхээ дараа Гаутама Будда гэх нэртэй болсон билээ.
Тэгвэл одоо Буддын шашны тухай баримтууд харцгаая.
Дэлхий дээр 500 сая гаруй Буддын шашинтай хүн бий
“World Population Review” сайтаас харвал дэлхий дээр 500 сая гаруй Буддын шашинтай хүн амьдардаг байна. Өөрөөр хэлбэл Буддизм нь дэлхийн дөрөв дахь хамгийн том шашин гэсэн үг. Дэлхийн хамгийн олон сүсэгтэнтэй шашин бол Христийн шашин (2.2 тэрбум сүсэгтэнтэй) үүний дараа Лалын шашин (1.8 тэрбум), Хиндуизм (1.1 тэрбум)
Буддын шашинтай хүмүүсийн 99 хувь Ази-Номхон далайд, тал гаруй нь БНХАУ-д амьдардаг
“Pew Research” байгууллагаас явуулсан судалгаанаас харвал Буддын шашинтай хүмүүсийн дийлэнх нь Ази-Номхон далайн бүсэд амьдардаг байна. Тодруулбал 2010 онд Буддын шашинтай хүмүүсийн 99 хувь нь Ази-Номхон далайд амьдарч байжээ.
Энэ тоо 2050 он гэхэд 98 хувь болж буурах төлөвтэй. Харин нийт Буддын шашинтай хүмүүсийн тал гаруй хувь нь буюу 254.7 сая нь БНХАУ-д амьдардаг юм. Нийт Буддын шашинтай хүмүүсээс Хойд Америкт амьдарч буй хэмжээ 2010 онд 0.8 хувь байснаас 2050 он гэхэд бага зэрэг өсөж 1.2 хувь болох төлөвтэй.
Европ, Ойрх Дорнод, Хойд-Африкийн бүсэд Буддын шашинтай хүмүүсийн тоо бага зэрэг нэмэгдэх төлөвтэй ч Буддизм нь Ази-Номхон далайн бүсийн л томоохон шашин хэвээр үлдэнэ.
Бусад шашинтай харьцуулахад Буддын шашинтай хүмүүс илүү өндөр настай байдаг
“Pew Research” 2019 онд гаргасан тоо баримтаас харвал Буддын шашинтай хүн дунджаар 36 настай байдаг аж. Харин Христийн шашинтай хүмүүс дунджаар 30, Хинду шашинтнууд дунджаар 17, Лалын шашинтай хүмүүс дунджаар 24 настай байжээ.
Шашингүй хүмүүс Буддын шашинтнуудтай ижил буюу дунджаар 36 настай байсан юм.
