МОНГОЛ ТӨРИЙН ЗҮТГЭЛТЭН ЖАМСРАНГИЙН САМБУУ
1895 онд Түшээт хан аймгийн Зоригт вангийн хошуу, одоогийн Төв аймгийн Бүрэн сумын нутагт төрсөн. Багадаа гэрээр бичиг үсэг сурч хошуу тамгын газар бичээч хийж байгаад ардын засагтай золгон 1922-1937 онд Сангийн яаманд бичээч нягтлан бодогч эрхэлсэн түшмэл, Богд хан уул аймаг, Өмнөговь аймгийн дарга, Мал тариалангийн яаманд хэлтсийн даргаар ажиллажээ. Гучаад оны сүүлээр Самбуу гуай дипломат албанд шилжин дөчөөд оны дэлхийн хоёрдугаар дайны хүнд жилүүдэд ЗХУ-д суух Онц бөгөөд Бүрэн эрхт элчин сайдаар есөн жил, тавиад оны Солонгосын дайны хүнд жилүүдэд Хойд Солонгост суух Онц бөгөөд Бүрэн эрхт элчин сайдаар гурван жил ажиллажээ. Солонгосын дайны үеэр гадаадын бүх элчингүүд нутаг буцсан ч монголын элчин ах дүүгийн найрамдалдаа чин үнэнчээ илэрхийлж ганцаараа үлдэн хойд Солонгосын шархдсан бэртсэн хүмүүсийг өөрөө боож эмчилж байсан Самбуу гуайн баатарлаг үйлсийг Ким Ир Сен өндрөөр үнэлэн "Монголын Элчин сайдын баатарлаг үйл" хэмээх гарчигтай нийтлэлийг Солонгосын бүх хэвлэлд тушаалаар гарган ард түмнээ зоригжуулж байжээ.
Ж.Самбуу дарга Солонгосоос ирээд 1954-1972 онд одоогоор УИХ-ын даргаар тасралтгүй хориод жил сонгогдон ажиллаж Монгол Улсын Хөдөлмөрийн баатар цол, Олон улсын энх тайвны Ленины шагнал хүртжээ.
Уг олон улсын Ленины шагналыг дагалдан ирдэг хорин таван мянган долларыг Самбуу дарга бүгдийг нь тухайн үеийн Эрүүл мэндийн сайд Туваанд хүлээлгэн өгч "Тус мөнгийг монгол хүүхдүүдийн эндэгдэлийг бууруулахад зориул" гэснийг ёсоор болгож тэр мөнгөөр олон цэцэрлэг ясли барьж ашиглалтанд оруулжээ.
Мөн Молотов дарга Москвагаас буцахад нь Самбуу гуайд алтан аяга бэлэглэхэд түүнийгээ монголд ирээд музейд бэлэглэсэн гэдэг. 1949 онд Улсын бага хурал дээр Самбуу даргыг маршал Чойбалсан магтаж хэлэхдээ Манай Самбуу шиг хоёр чемодантай элчингээр яваад хоёр чемодантайгаа буцаад ирдэг хорсол шуналгүй бай та нар гэж засаг төрийн албан хаагчддаа зандарч захих хоёрыг хослуулж хэлж байжээ. Самбуу гуай монгол төрийн жолоог насан эцэстлээ атгалцаж, төр түмнийхээ үйл хэргийн төлөө төлөв төвшин чин шударгаар хөдөлмөрлөхийн зэрэгцээ уламжлалт мал аж ахуй, жирийн малчин ардын ахуй амьдрал, монгол зан заншил ахуй соёл байгаль цаг уурын талаар арав гаруй ном бичиж "Намайг амьдад Богд уулыг битгий оролд" гэж захиж хэлж байжээ.
Ард түмнийхээ ахуй соёлыг айхтар сайн мэддэг Самбуу гуайд Академич цол өгье гэхэд нь Ард олон минь намайг муу хэлнэ гээд авалгүй татгалзаж байжээ. Намын төрийн нэгэн хурал дээр үр хөндүүлэх асуудлын талаар өдөржин ярилцаж хуралдсан ч тодорхой шийдэлд хүрч чадаагүй байхад Самбуу гуай чив чимээгүй сууж байгаад босож ирснээ "Монголын үрс маш олон болтугай. Ингээд хурал дууслаа" гээд товчхон бөгөөд тодорхой хэлчихээд гараад явчихсан гэдэг. Тиймдээ ч тэр үеэс аборт гэдэг асуудал албан ёсоор хориотой байж жар далаад онд төрсөн бидний үеийн монголын үр сад үсрэнгүй өссөн нь Самбуу даргын ач гавьяа болов уу.