Сан Франциско хотын "Dragon house" холбоо болон "Mongolian fighting championship" холбоо хамтран зохион байгуулсан "MFC Америк-2" тэмцээний оргил тулааны ялагч “Шинэсэгэ мед” ХХК, “Солонго мед”, “Гаруда ММА” клубийн тамирчин А.Гантүлхүүртэй цөөн хором ярилцлаа.
- Сайн байна уу. Юун түрүүнд манай уншигчдад өөрийгөө товч танилцуулахгүй юу?
- Сайн байцгаана уу. Намайг Ариунбилэгийн Гантүлхүүр гэдэг. Дорнод аймагт төрж өссөн. Бага балчир насандаа их хөдөлгөөнтэй, зодоонч хүүхэд байсан. 2007 онд Улаанбаатар хотод ирж байлаа. 2014 оноос тулааны спортоор тууштай хичээллэж байна.
-Таны хувьд спорттой хэрхэн холбогдож байв. Тус спортоор хичээллэхэд нөлөөлсөн зүйл юу байна?
- Миний хувьд 83 кг жинтэй махлаг байсан. Анх жингээ хасах зорилготой мутай-боксоор хичээллэж байсан. Дараа нь жюү жицү бөхөөр хичээллэж байгаад холимог тулааны спорт руу орсон. Жюү жицүгээр хичээллэж байх явцад дасгалжуулагч маань хүнд гартай, бусдаас арай өөр байна тэмцээнд орж үзэх үү? гэдэг санал тавьсан. ОХУ-д анхныхаа тэмцээнд оролцож байлаа.
- Холимог тулааны спортын ялгарах онцлог, давуу тал?
- Тулааны спорт гэдэг маш их тэсвэр тэвчээр шаардсан, эрдсдэл өндөр, нас заадаггүй мөн мэргэжлийн спорт учраас тулаан хийх бүртээ мөнгө авдаг. Мөн шоу бизнес гэж хэлж болно.
- “MFC Америк-2” тэмцээн саяхан болсон. “Bellator”, “UFC” холбоонд тулалдаж явсан шилдэг тулаанч Ноин Эрнандесийг ялж аваргын бүсийг зүүсэн.Тус тэмцээний талаарх таны сэтгэгдэл?
- Хүнд тулаан болсон. Өрсөлдөгч тамирчин ялагдлаа хүлээн зөвшөөрөхгүй байсан. Магадгүй тэр намайг дутуу үнэлсэн байх. Эрнандестэй бүсний төлөө эх орондоо дахин тулалдмаар байна.
Өрсөлдөгч тамирчин саналыг минь зөвшөөрөх үгүйг мэдэхгүй байна. Хэрэв тулалдхаар болвол би сая тулалдсанаасаа хамаагүй сайн бэлтгэлтэй, дахин ялна гэдэгт итгэлтэй байна
- Монголын холимог тулаан болон спорт сонирхогч ард түмнийг огшоосон сайхан тулаан хийсэн. Ялалт аваад гараа өргүүлж, төрийн далбаагаа нөмрөөд зогсож байх тухайн үеийн мэдрэмж үгээр хэлэхийн аргагүй байсан биз?
- Яг үнэндээ өөртөө итгээгүй. Тухайн үед энэ тэнцүү тулалдаж дууссан, мөн өрсөлдөгчийн маань нутгийн дэвжээ байсан учир ялна гэдэгтээ итгэл муутай байсан. Гараа өргүүлэх тэр мөч үгээр хэлэхийн аргагүй сайхан байсан.
- Хүний зорилго мөрөөдөлд хязгаар үгүй шүү дээ. Таны зорилго юу вэ?
- У.Зориг ах маань бидний менежерээр ажиллаж байгаа. Тулааны спортоор хичээлэлдэг хүн бүрийн хүсэл мөрөөдөл мэдээж UFC холбоонд тулалдах байдаг.Миний хувьд ч ялгаагүй. Мөн ирээдүй хойч үеийн залуусдаа орох хаалгыг нь нээж өгөхийг хүсдэг. Бид сайн байх юм бол дараа дараагийн залуус дэлхийн тавцанд торохгүй гардаг болно.
- Ойрын хугацаанд тулаан байгааюу?
- Есдүгээр сард Монголд MFC ээлжит тулаан болно гэж яригдаж байгаа.Миний хувьд биеийн байдал болон хөлний бэртэл гайгүй бол оролцоно.
- Ярилцсанд баярлалаа. Амжилт хүсье.
- Намайг дэмждэг маш олон хүмүүс, Монголын ард түмэндээ болон “Шинэсэгэ мед” ХХК, “Солонго мед” –ийн хамт олонд маш их баярлалаа.
Эх сурвалж: MGLsport.com