МАН-д цүнх баригчийн дамжаа бий. Тэр нь НАМЗХ нэртэй байж байгаад Социал демократ Монголын залуучуудын холбоо болж нэрээ өөрчилсөн. Хэсэг бүлгээрээ эвлэлдэн нэгдсэн залуусын сонголтыг хүндэтгэж болох ч үүнийг улс төрд орох шат дамжлага болгон зүтгэдэг. Түүгээр ч зогсохгүй тэндээсээ УИХ-ын гишүүн болсон МАН-ын хунтайж нар байгаа болохоор хүн бүр тийш тэмүүлэхээс өөр аргагүй болгосон гэхэд илүүдэхгүй биз.
Тухайлбал, хоёр жилийн өмнө МАХН МАН-тай нэгдэхдээ намын албан тушаалд 30 квот авахаар тохиролцсон. Эл тохирооны дагуу НАМЗХ-ны Удирдах зөвлөлд 16 хүнээ оруулжээ. Тэдэн дунд “Магнай трейд”-ийн Ганзоригийн хүү Дашням, “Анод” банкийг дампууруулсан гэгддэг Гүр-Аранзын хүү Төгөлдөр, “Эрдэнэт үйлдвэр”-ийн захирал Х.Бадамсүрэнгийн хүү Бадрахжаргал нарын “баян айлын эрх” хүүхдүүд орсон.
Харин тэдний нэг “Магнай трейд”-ийн Ганзоригийн хүү Дашням бүр удирдах зөвлөлд тухлаад амжсан. МТ группийн өв залгамжлагч, “Жи-Мобайл” компанийн гүйцэтгэх захирал, одоо “Жет шаринг Монголиа” ХХК-ийн захирал, хувьдаа Улаанбаатар сити гэх хөлбөмбөгийн клубтэй гээд залуу хүн гэхэд баян аавын хүчинд бүхий л салбарт хүч үзэж яваа.
МАН-ын “эрх хунтайж” гэгдэх нэр зүүсэн улс төрийн "А" ч мэдлэггүй Г.Дашням 2024 оны УИХ-ын сонгуульд намын жагсаалтаар Хэнтий аймагт орж ирэхээр өөрийгөө лоббидуулж эрхээ авсан гэнэ.
Үүнийг сүүлийн үед өөрөө ч батлан “Сорилтууд дунд “туучиж” яваа, хийх ёстойгоо ойлгосон залуу” гэх мэтээр залуусын нэр барьж, цэвэрхэн төрд гарч, өмнөх 76-ийн адил хувийн бизнесээ дэмждэг, хулгай хийдэг тийм л замыг сонгох бэлтгэлээ базааж эхэлсэн нь энэ.
Угтаа сарын 1 сая төгрөг хүрэхгүй цалинтай УИХ-ын гишүүн болох зүтгэх хэрэг юун...
Ер нь түүний аав Р.Ганзориг 2018 онд “Эрдэнэт”-ийн асуудлаар цагдан хоригдохдоо ч олонд зургаа дэлгүүлээгүй нууцлаг нэгэн. Түүнийг “Жаст Ойл” компанийг худалдан авсантай холбоотойгоор дунд хүү Дашнямынх нь хамт цагдан хорьж байсан.
Р.Ганзориг нь Магнай, Дашням, Содбаяр гэсэн гурван хүүтэй. Бага хүү Г.Содбаяр нь нэг бүсгүйг хэвтэрт ортол зодсон гэдэг шуугинаар мөн л “хэвлэлийн баатар” болж байлаа.
Хамгийн хачин нь, энэ өөрчлөлт мөнгөгүй, муухан айлд төрсөн хүмүүст МАН-д орон зай байхгүй шүү гэдгийг мэдрүүлж өгч байгаа юм. Бас Ардын намд “ардын хөвгүүд” ховордож байгаа нь сонин шүү, тийм ээ.
Эх сурвалж: Arslan.mn