Серби Оросоос ирэх гурван жилийн турш байгалийн хий импортлон авахаар болсон талаар Сербийн Ерөнхийлөгч Александр Вучич ням гарагт мэдэгджээ.
А.Вучич ОХУ-ын төрийн тэргүүн Владимир Путинтэй утсаар ярьсны дараа дээрх тохиролцоонд хүрсэн байна. Оросын “Газпром” компанитай байгуулсан Сербийн 10 жилийн хугацаатай хий нийлүүлэн авах тухай гэрээ тавдугаар сарын 31-нд дуусгавар болох юм.
“Миний бие хийн үнийн талаар одоогоор мэдээлэл өгөх боломжгүй байна, нарийн асуудлуудын талаар “Газпром” компанитай тохиролцоно” гэж А.Вучич сэтгүүлчдэд мэдээлсэн байна.
А.Вучич нь Европ дахь В.Путиний ойрын холбоотнуудын нэг хэдий ч Серби нь Европын Холбоонд /ЕХ/ нэгдэхийг эрмэлздэг. Тус холбоо нь Оросын эсрэг хэд хэдэн багц хориг арга хэмжээг авч хэрэгжүүлээд байгаа юм.
Одоогийн байдлаар ЕХ Оросын нүүрсний импортод хориг тавиад байгаа бол байгалийн хийтэй холбоотой шийдвэр хараахан гараагүй байна. Серби нь 2008 онд нефть, хийн салбараа Оросын эрчим хүчний компаниудын гарт өгснөөр эрчим хүчний хангамжийн хувьд Оросоос ихээхэн хамааралтай болжээ.
Montsame.mn