Америкийн поп од Тэйлор Свифтийн сүүлд гаргасан “The Tortured Poets Department” шинэ цомог Spotify хөгжмийн стриминг платформын нэг өдрийн дотор хамгийн олон удаа цацагдсан дээд амжилтыг эвджээ.
Дуучин бүсгүй өөрөө бас Spotify платформын түүхэнд нэг өдрийн дотор хамгийн олон дуу нь цацагдсан уран бүтээлч болсон байна.
31 дуутай шинэ цомог Баасан гарагт дэлхий даяар худалдаанд гарсан юм.
Свифт өөрийнх нь 11 дэх студийн цомог удахгүй мэндлэх гэж байгааг энэ оны хоёрдугаар сард Грэммийн шагнал гардуулах ёслолын тайзан дээрээс зарлаж байв.
Ингэхдээ уг цомгоор амьдралынх нь нэг хуудас хаагдаж байгааг зарлаж байжээ.
“Үүгээр нэг бүлэг хаагдаж байна. Шарх эдгэрсний дараа ямар ч өшөө авалт, тооцоо байхгүй болдог. Хамгийн гунигтай түүхээ ярьсны дараа бид түүнээс ангижирч чаддаг билээ” гэж Свифт тухайн үед мэдэгдэж байсан юм.
Цомогт багтсан “So Long, London” дууг түүний экс найз залуу, Британийн жүжигчин Жо Алвинд зориулсан гэж сонсогчид үзэж байна.
Свифт өмнө нь Алвинтай зургаан жил үерхэж, бүр Лондонд хэсэг хугацаанд амьдарсан юм.
“But Daddy I Love Him” нэртэй бас нэг дуу нь “The 1975” хамтлагийн гоцлол дуучин Мэтти Хилитэй үүсгэсэн дотно харилцааных нь тухай дуу гэгдэж байгаа. Тэдний үерхлийн тухай цуурхал тарж байсан ч өөрсдөө үүнийг огт баталж байгаагүй юм.
Свифтийн өмнөх цомог “MIdnights” хоёр жилийн өмнө худалдаанд гарсан эхний долоо хоногтоо АНУ-ын зах зээлд 1.6 сая хувь борлогдож байжээ.
Саяхан албан ёсоор тэрбумтны жагсаалтад багтсан дуучин бүсгүй Eras Tour аялан тоглолтоо энэ зун Европ тивд үргэлжлүүлэх юм.
Эх сурвалж: BBC