“Эмийн үнийн өсөлтийн шалтгаан, нөхцөлийг хянан шалгах” үүрэг бүхий түр хорооны нотлох баримтыг шинжлэн судлах сонсгол өнөөдөр (2024.04.17) гурав дахь өдрөө үргэлжилж байна.
Эмийн түр хорооны хянан шалгагч шинжээч гааль хяналтын шинжилгээний талаар танилцуулав.
"Замын үүд дэх гаалийн газрын салбар лаборатори нь магадлан шинжилгээ хийлгэх шийдвэрийн дагуу шинжилгээ хийж гүйцэтгэдэг. Гаалийн лабораторид эмчилгээнд хэрэглэгдэх эмийг шинжилдэггүй. Зөвхөн мансууруулах, сэтгэцэд нөлөөлөх хүрээний эмд лабораторийн хяналт шалгалт хийдэг. Монгол Улсад импортоор орж ирж буй эмийг зөвхөн химийн лабораторийн аргаар шинжилдэг. Өөрөөр хэлбэл, тухайн эмийн үйлчлэгч бодис нь байна уу, байх ёстой хэмжээтэй юу гэдгийг шинжилдэг гэсэн үг. Харин биологийн идэвх болон эмчилгээний чанарыг нь тодорхойлдоггүй.
Эм, эмнэлгийн хэрэгслүүд хилийн 6 боомтоор нэвтэрч, гаалийн хяналтыг шуудан илгээмжийн хэсэгт 1, бусад боомтод 12 эмийн байцаагч хяналт явуулдаг.
Монгол Улсад био эквивалент судалгааг хийдэггүй, хийж чаддаггүй. Био эквивалент шинжилгээ хийхгүй байна гэдэг эмээс гадна хүнсний бүтээгдэхүүнд чанарын шалгалт хийж чадахгүй байна гэсэн үг. Дэлхийн бүх улсад үлдэгдэл шавхагдлын судалгаа хийдэг. Энэ шинжилгээгээр малын маханд вакцин, пестицид, гебрицид байгаа эсэхийг тогтоодог. Манай улсад энэ шинжилгээг хийхгүй байгаа учир малын маханд дээрх эмийн үлдэгдэл байгаа эсэхийг шинжилж чадахгүй байна.