“Стандартгүй Улаанбаатар үхлийн хөндий боллоо”, “Цементэн ширэнгэ” гэх мэт сүртэй сүртэй тодорхойлолтуудыг хэлэлцэж, хэзээ хойно нь бид халаглан “бархиралдаж” байна. Ширэнгэ босож байхад дуугараагүй байж шүү дээ. Барилгын салбарт цүнхний компаниуд орж ирж, мөнгөний араас хөөцөлдсөний балаг энэ.
Харин одоо Зам тээврийн салбарт аюул учраад байхад мэдэж байгаа нь ч алга, мэдсэн нэг нь дуугүй халаглан ярихаас цаашгүй байна. Хэвлэлийн бид нь ч энэ мэт нийтийн эрх ашигт харшилж байгаа аливаа асуудлыг анзаарах сөхөөгүй өөр хоорондоо уралцаж буй. Энэ нь мэдээж төрийн дунд, доод шатанд шургалсан ашиг сонирхолын зөрчил бүхий бүлэглэлд олзуурхууштай зүйл болж байх шиг байна.
ЗТХЯ-ны Автозамын бодлого, зохицуулалтын газрын дарга Ч.Сугармаагийн ашиг сонирхолын зөрчилтэй үйлдэл бүр цагаандаа гарч, өөрт нь тал засаагүй, мөрөөрөө ажлаа хийгээд явж байгаа замын компаниудыг хавчиж шахах нь хэрээс хэтэрч, албан тушаалаа урвуулан ашиглаж, хясан боогдуулж, дураараа авирлаж байгаа тухай мэдээлэл сүүлийн үед чих дэлсэх боллоо.
Тэр олон хүний ивээлд байдаг гэх юм билээ. УИХ-ын гишүүний туслахаас эхлээд яамны газрын дарга болтлоо томорсон түүнд МАН-д хамгаалалт их л байдаг бололтой юм. Түүнээс биш танилгүй, аргүй байсан бол аль хэдийн шахагдаад гарсан л байх байлгүй.
Суганы үс Сугармаагийн ар тал ч яамай. Харин автозамын бодлого алдагдсанаас болж олон хүн эд хөрөнгөөрөө, эрүүл мэндээрээ, амь насаараа хохирч байгааг яагаад тоохгүй байна вэ.
Хөшгийн хөндийн осол бол зам арчлалтын маш том зөрчил. 17 машины ослын хохирлоос гадна Олон Улсын нислэгүүд зорчигчгүйгээс болж хойшлогдсон гэх. Нислэг хойшлогдсоноос дам хохирол асар их гарсан юм байна. Цаг агаарын байдал муудахад хурдын замын арчлалтын байгууллага зам дээрээ ажиллаж, хөдөлгөөний хоорондын зайг зохицуулах, замын хэсэгчлэн түр хаах, хөдөлгөөний хурд хоорондын зайг зохицуулах гэх мэт хөдөлгөөний аюулгүй байдлыг хангах, нислэгүүдийг аль болох бага саатуулах арга хэмжээ авах ёстой. Гэтэл ЗТХЯ-ны АЗБХЗГ-т энэ тухай ямар нэгэн бодлого журам байхгүй байна.
Ер нь бол бодит нөхцөл байдал ийм л задгай, ноцтой, аюултай байна. Том том осол аваар гарч, зам харгуй эвдэрч сүйрээд байхад хариуцлага хүлээдэг хүнгүй, санаагаа чилээж, гэмшиж байгаа ч хүнгүй байна гэдэг юутай харамсалтай вэ.
Яагаад ЗТХЯ-ны Автозамын бодлого, зохицуулалтын газрын толгойд ашиг сонирхолын зөрчил өндөртэй, ёс суртахууны доголдолтой Ч.Сугармаа гэгчийг тавьчихав. Энэ хэний тавиул болоод энэ олон асуудлуудын хариуцлагаас мултарч чадаад байна вэ? Хэний ашиг сонирхолыг гүйцэлдүүлэгч юм бэ?
Зам дээр дуугүй өнгөрмөөргүй байна. Замын нөхцөл байдал бол иргэн бүрийн амь нас эрүүл мэнд, цаашлаад улс орны аюулгүй байдалтай холбоотой чухал объект. Аюултай зам бол үйл олноор нь устгах зэвсэг гээд хэлчихэд хэтрүүлсэн болохгүй. Тиймээс улс орны аюулгүй байдал, эдийн засагт хор уршигтай аливаа үйл ажиллагааг мэргэжилтнүүд нь ч, мэдээллийн хэрэгслүүд нь ч анхааралдаа авч, бодлогын алдаа гаргаж байгаа хэн бүхнийг олж тогтоон, хариуцлага хүлээлгэх цаг иржээ.
Ч.Сугармаа уг нь инженер юм билээ. Гэхдээ тэр хүрз шороо замын ажилд хаяж үзээгүй, замын зураг төсөлд ганц шугам татаж үзээгүй инженер, иймдээ ч мэргэжилдээ эзэн байж чадахгүйгээс бодлогын алдаа гаргаж байгаа нь үйл ажиллагаанаас нь тодорхой харагдаж байдаг. Үргэлжлэл бий.
А.МӨНХ