АНУ-ын шүүхээс Их Британийн тэрбумтан Жо Льюист өөрийн эзэмшдэг компаниудын биржийн дотоод нууц мэдээллийг бусдад дамжуулсан хэргээр гурван жилийн тэнсэн харгалзах ял, 5 сая ам.долларын торгууль оноолоо.
Өдгөө 87 настай Льюис өөрийн эзэмшдэг компаниудын талаарх нууц мэдээллийг найз нөхөд, хамтран ажилладаг түншүүд, хувийн туслахууд болон хувийн нисэх онгоцныхоо хоёр нисгэгчид дамжуулсан хэмээн 2023 оны долоодугаар сард буруутгагдсан юм. "Түүнээс зөвлөгөө мэдээлэл хүлээн авсан хүмүүс сая сая долларын ашиг олсон" гэж прокурор мэдэгджээ. Өнгөрсөн нэгдүгээр сард тэрбумтан буруугаа хүлээж, прокуроруудтай тохиролцоо хийсэн юм.
Дээрх шийдвэрийг Нью-Йорк хотын Манхэттен дүүргийн шүүхийн шүүгч энэ сарын 4-нд буюу өчигдөр гаргажээ. Шүүхийн шийдвэрийг уншиж танилцуулсны дараа Льюисийн төлөөлөгч Марк Херр хэлэхдээ, "нас, эрүүл мэндийн байдлыг нь харгалзан үзэж түүнд тэнсэн харгалзах ял оноосонд талархаж байна" гэжээ.
Льюис бол “Tavistock Group” хөрөнгө оруулалтын компани ба Английн Премьер лигийн “Тоттенхэм Хотспур” клубийн эзэн юм.
Эх сурвалж: Montsame.mn