Баян-Өлгий аймгийн Өлгий хотод 3-р сарын 20-ны өдөр зохион байгуулагдсан “Дэлхийн Мөнгөний долоо хоног-2024” аяны нээлтийн арга хэмжээнд Хадгаламжийн даатгалын корпорацийн гүйцэтгэх захирлын үүрэг гүйцэтгэгч С.Баатарсүрэн, ГХХАХ-ийн захирал А.Алтантүлхүүр нар оролцлоо.
Уг аяныг “Мөнгөө эрсдэлээс хамгаалж, Ирээдүйгээ баталгаажуулъя” уриатайгаар Монголбанк, ЦЕГ, Хадгаламжийн даатгалын корпораци, Баян-Өлгий аймгийн засаг даргын тамгын газар, ХБНГУ-ын Шпаркассе банкны Монгол дахь сан, арилжааны банкнууд болон бусад санхүүгийн байгууллагууд нэгдэн, хамтран зохион байгуулж байна.
Аяны нээлтийн арга хэмжээгээр Хадгаламжийн даатгалын корпорациас Өлгийн хотын шилдэг хүүхдүүдийг “Хадгаламжийн эрхийн бичиг” болон мөнгөө хуримтлуулдаг тэмээгээр урамшуулсан юм.
“Global money week” буюу “Дэлхийн Мөнгөний Долоо Хоног” аян нь хүүхэд, залуусын санхүүгийн боловсролыг бага наснаас нь эхлэн дэмжих, санхүүгээ зүй зохистой удирдах, төлөвлөх мэдлэг, чадвар, хандлага, дадал зуршлыг бий болгоход чиглэсэн олон улсын сайн дурын кампанит ажил бөгөөд Монгол Улс 2013 оноос эхлэн тус аянд нэгдсэн байдаг.