Монгольн Хуульчдын холбоо, АНУ-ын Элчин сайдын яамтай хамтран хэрэгжүүлж байгаа “UB speaker” хөтөлбөрийн хүрээнд “Дижитал шилжилт ба өмгөөлөгч” сэдэвт хэлэлцүүлэг Хууль зүйн үндэсний хүрээнд зохион байгууллаа. Монголын Өмгөөлөгчдийн Холбооны урилгаар АНУ-ын Аризона мужийн дээд шүүхийн Ерөнхий шүүгч Роберт Брутинел, АНУ-ын Аризона мужийн шүүхүүд болон харьяа байгууллагуудын Захиргааны дарга Дэйв Байерс нар зочин илтгэгчээр оролцлоо.
Мөн хэлэлцүүлгийн үеэр Монголын Өмгөөлөгчдийн холбооны өмгөөлөгч Д.Отгонбат, Б.Баялагмаа, Э.Энх-Эрдэнэ нар илтгэл тавьж манай улс шүүхийн эргэн тойронд хэрхэн цахимжиж байгаа талаар мэдээллүүдийг хуваалцлаа. Зочин илтгэгч нар АНУ-ын Аризона мужийн БАР-ын холбооны цахимжилт, шүүх эрх мэдлийн байгууллагуудын уялдаа, хэрэг хянан шийдвэрлэх ажиллагаанд технологийн дэвшлийг хэрхэн нэвтрүүлсэн, өмгөөлөгчид цахимжих үйл явцад хэрхэн оролцдог талаар туршлагаа хуваалцлаа. Шүүх захиргааны үйл явц цахимд шилжсэнээр цаг хугацаа зардал шийдвэрлэлт олон дамжилт зэрэг асуудлуудыг шийдэх давуу талтай болохыг албаныхан онцолж байна.
АНУ-ын шүүхийн засаглалд цахимжилтаар тэргүүлдэг Ариноза мужийн дээд шүүхийн төлөөлөгчдийн хувьд тухайн улс цахимжилтанд шилжихэд 40 жил зарцуулсныг дурдлаа. Мөн тэд бусад улс орны жишигтэй харьцуулахад Монгол улсын шүүхийн тогтолцооны цахимжилт арай хурдан хугацаанд явагдана гэсэн судалгаа байгааг онцоллоо. Шүүх процесс бүхэлдээ цахимжисанаар хамгийн түрүүнд цаасан хэрэглээг халж биет зүйл хадгалагдахгүй гэдгийг тэд илэрхийллээ.