Монголын хөл бөмбөгийн холбоо /МХБХ/, түүнийг төлөөлж Ерөнхийлөгч А.Ганбаатар Испани улсын Барселона дахь Монголын Өргөмжит Консул, Испанийн бизнесийн нэр хүндтэй зөвлөх ноён Виктор Албиолтай 2 жилийн хугацаатай санамж бичиг байгуулав.
Ноён В.Албиол нь Испанийн алдарт Барселона клубийн оршдог Каталон мужийн хөл бөмбөгийн холбооны тэргүүнээр ажилладаг бөгөөд Барселона клубийг дэлхий дахинаа сурталчлах үйл ажиллагааг хариуцдаг байна.
Санамж бичгийн хүрээнд талууд өөрсдийн үйл ажиллагаагаа харилцан үр ашигтай сурталчлах юм. Тодруулбал, Ноён Албиол Монголын хөл бөмбөгийг Испани улс, Барселона муж болон бусад газар сурталчлах, хөлбөмбөгт дуртай Монголын хүүхэд багачуудыг Барселона хот болон Барселона клубын өсвөрийн академид сургахад туслах, дасгалжуулагчийн сургалт зэргийг зохион байгуулах, Монголоос дасгалжуулагчдыг Испани дахь сургалтанд хамруулах зэрэгт анхааран ажиллахаар болжээ.
Харин МХБХ нь Барселона клубыг Монгол Улс болон Ази тивд сурталчлах, энэхүү үйл ажиллагаанд Монгол дахь Барселона клубын фэн клубтай хамтран ажиллах юм. Мөн хөл бөмбөгийн удирдлагын менежмент, маркетинг, сурталчилгааны үйл ажиллагаа, лигийн хөгжил зэрэг дээр харилцан туршлага солилцож, шинэ санаа, ноу-хауг хуваалцаж ажиллана.
Санамж бичиг байгуулах үйл ажиллагаанд хэвлэл мэдээллийн болон Барселона клубийн Монголын фэн клубийн төлөөлөгчид оролцов. Талууд цаашдын хамтын ажиллагааны талаар урам зориг дүүрэн байгаагаа илэрхийлэв. Ийнхүү алдарт “Barca Academy” буюу “Barça Escola”-д монгол хүүхэд суралцах цаг ойрхон байна.
