Санал асуулгын урьдчилан дүнгээс харахад Путин нийт сонгогчдын 87 орчим хувийн санал авсан нь ЗХУ-аас хойших Оросын түүхэн дэх хамгийн өндөр санал юм.
Олон тооны эсэргүүцэгчид санал авах байруудад эсэргүүцлийн жагсаал зохион байгуулсан ч Ерөнхийлөгч Владимир Путин сонгуульд ялалт байгуулж, эрх мэдлээ бататгах гэж байна.
ОХУ-ын Сонгуулийн төв хорооны мэдээлснээр тэрээр сонгуулийн хэсгийн 60 орчим хувийг тоолсоны 87 хувийн санал авчээ. Йинхүү 71 настай Путин ЗХУ-ын удирдагч асан Иосиф Сталиныг гүйцэж, сүүлийн 200 гаруй жилийн хугацаанд Оросын хамгийн удаан төрийн удирдагч болно гэсэн үг.
Харин түүний араас Оросын Коммунист намаас нэр дэвшигч Николай Харитонов дөрөв хүрэхгүй хувийн саналаар, гуравдугаарт шинэ нэр дэвшигч Владислав Даванков, хэт үндсэрхэг үзэлтэй Леонид Слуцкий дөрөвдүгээрт оржээ.
Санал хураалт хаагдах үед улсын хэмжээнд ирц 74.22 хувьтай байсан нь 2018 оны 67.5 хувийн ирцээс давсан гэж сонгуулийн албаныхан мэдэгдэв.
АНУ тус санал хураалтыг чөлөөт ч биш, шударга ч биш гэж мэдэгдлээ.
"Ноён Путин улс төрийн өрсөлдөгчөө шоронд хорьж, бусад хүмүүс түүний эсрэг өрсөлдөхөөс сэргийлж байснаас үзэхэд сонгууль нь чөлөөт, шударга биш байх нь ойлгомжтой" гэж Цагаан ордны Үндэсний аюулгүй байдлын зөвлөлийн хэвлэлийн төлөөлөгч хэлэв.
Харин Украины ерөнхийлөгч Владимир Зеленский “Энэ сонгууль хууль ёсны хүчин төгөлдөр бус төдийгүй Путин бол хууль бусаар эрх мэдэлд шунагч” гэж мэдээлжээ.
Эх сурвалж: Reuters
