Уран бүтээлч Morningstar буюу иргэн Б.Аззаяа нь мансууруулах бодисын хэргээр нэг жилийн хорих ял өнгөрсөн нэгдүгээр сард авч, давж заалдахаар болоод байсан. Тэгвэл түүний давж заалдах шатны шүүх хуралдаан өнөөдөр болохоор товлогджээ.
Хэргийг эргэн сануулбал, Б.Аззаяаг Баянгол дүүргийн эрүүгийн хэргийн анхан шатны шүүхээс сэтгэцэд нөлөөлөх бодисыг худалдаалах зорилгогүйгээр хууль бусаар хадгалсан хэмээн үзэн гэм буруутайд тооцож нэг жилийн хорих ялаар шийтгэсэн юм. Ингэснээр шүүгдэгчийн өмгөөлөгчөөс давж заалдах гомдол гаргасан учир Нийслэлийн эрүүгийн хэргийн давж заалдах шатны шүүхэд хэргийг хүргүүлсэн байдаг. Гэхдээ энэ нь түүний мансууруулах бодистой холбогдож буй анхны тохиолдол биш агаад Morningstar нь өмнө нь 2023 онд энэ төрлийн гэмт хэрэгт нэр холбогдож байсан удаатай юм.
