Бямба гарагт /2024.03.09/ Йордан улсын Амман хотоос Лондоны Лутон нисэх онгоцны буудал руу явсан нислэгийн зорчигч эмэгтэй төрсөн байна. Азаар онгоц дээр амралтаараа аялаад буцаж явсан Хассан Хан нэртэй эмч явж байсан учир түүнд төрөхөд нь тусалжээ.
28 настай Хан Их Британийн Эссекс бүсэд байрлах Басилдоны эмнэлэгт ажилладаг юм. Нислэг эхлээд хоёр цаг өнгөрөхөд онгоцны багаас нислэг дээр эмч байгаа эсэхийг асуусан байна.
Хан онгоцны бүхээг рүү ойртож очиход ус нь задарсан нэгэн эмэгтэй шал дээр хэвтэж байсан аж. Тэр эмэгтэй ямар нэгэн хүндрэлгүй төрч, эрүүл охин хүүхдээ өлгийдөн авсан юм.
Төрсөн эмэгтэй Англи хэл мэддэггүй байсан болохоор нислэг дээр явсан өөр нэг хүн орчуулга хийж тусалжээ. Онгоцны багийнхан хэлснээр тэр нярай арилжааны нислэг дээр төрсөн 75 дахь хүүхэд болж байгаа аж.
Амаржсан эх болон нярайг эмнэлэгт хүргэхийн тулд нислэг чиглэлээ өөрчлөн Италийн өмнөд хэсэгт оршдог Бриндиси нисэх онгоцны буудалд газарджээ. Хан энэ талаар ярихдаа “Нислэг чиглэлээ өөрчилсөн болохоор би ажилдаа хоцорсон ч эмнэлгийн ажилчид маань болсон явдлыг сонсоод их гайхширсан” гэсэн байна.
Эмэгтэйн гэр бүл Ханд эх болон нярайн биеийн нөхцөл байдал сайн байгаа гэж хэлжээ. Тэрбээр “Бүх зүйл сайнаар өндөрлөсөн гэдгийг сонсоод санаа амарсан” хэмээсэн юм.
Эх сурвалж: BBC
