Өмнөд Солонгост нэгэн лам өөрийгөө зулын гол болгон шатаав

1483941209587325591cf47.jpg Өмнөд Солонгост нэгэн лам өөрийгөө зулын гол болгон шатаав

СӨҮЛ. /ВВС/. Дэлхийн II дайны үед Японы Эзэн хааны армийн цэргүүдийн бэлгийн хүчирхийлэлд өртөж байсан солонгос эмэгтэйчүүд буюу “зугаацуулагч эмэгтэйчүүд”-ийн асуудлыг эргэлт буцалтгүйгээр эцэслэн шийдвэрлэхийн тулд Өмнөд Солонгосын Засгийн газар Японы талтай хэлэлцээр байгуулсныг эсэргүүцэн Сөүлд нэгэн лам өөрийгөө зулын гол болгон шатаажээ.

Албаны хүмүүсийн мэдэгдсэнээр, гуравдугаар зэргийн түлэгдэлттэй 64 настай лам эмнэлэгт ухаангүй байгаа ажээ.

Эрх мэдлээ хэтрүүлэн ашигласан гэх дуулиан шуугианы улмаас албан тушаалаасаа түдгэлзэхэд хүрээд байгаа Өмнөд Солонгосын Ерөнхийлөгч Пак Гын Хэг нэн даруй бүрмөсөн огцруулахыг өмнөд солонгосчууд шаардан бямба гарагт жагсах үеэр лам өөрийгөө шатаасан байна. Энэ лам Сөүлийн Үндэсний их сургуулийн эмнэлэгт эмчлүүлж байгаа ажээ.

“Зугаацуулагч эмэгтэйчүүд”-ийн асуудлыг нөхөн төлбөр өгөх замаар шийдвэрлэхээр Японтой тохиролцсон  “урвагч” Пак Гын Хэг баривчлахыг шаардаж байна гэсэн бичгийг лам үлдээсэн байсан гэж Сөүлийн цагдаагийн эх сурвалж мэдэгдэв.

Сөүл болон Токиогийн хооронд 2015 оны 12 дугаар сард байгуулсан “зугаацуулагч эмэгтэйчүүд”-ийн асуудлаарх хэлэлцээр Японыг хариуцлагаас бүрэн мултлахад хангалтгүй гэж шүүмжлэгчид үзэж байгаа юм.

“Зугаацуулагч эмэгтэйчүүд”-д зориулсан хөшөөг Бусан хот дахь Японы Ерөнхий консулын газрын өмнө байрлуулсантай холбоотойгоор Япон улс  энэ баасан гарагт Өмнөд Солонгосоос Элчин сайдаа эгүүлэн татсанаар хоёр улс хоорондын харилцаа хурцдаад байгаа билээ.

Консулын газрын өмнө хөл нүцгэн залуу эмэгтэйн 1.5 м өндөр хүрэл хөшөөг байрлуулсан нь 2015 онд байгуулсан хэлэлцээрийг зөрчсөн хэрэг гэж Японы талын үзэж байна.

Хөшөөг нэн даруй холдуулахыг Японы Ерөнхий сайд Шинзо Абэ өнөөдөр шаарджээ.

Уг хэлэлцээрийг байгуулах үед 46 “зугаацуулагч эмэгтэй” амьд сэрүүн байсан юм.

Г.Доржханд Эх сурвалж: МОНЦАМЭ

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ