НҮБ-ын тэргүүн тангараг өргөлөө

xdg5b41df5g.jpg НҮБ-ын тэргүүн тангараг өргөлөө

НҮБ-ын 71 дүгээр чуулганы төлөөлөгчид өнгөрсөн аравдугаар сард Бан Ги Мүний бүрэн эрхийн хугацаа дуусгавар болж буйтай холбогдуулан шинэ Ерөнхий нарийн бичгийн даргыг сонгох санал хураалт явуулж, Португалийн Ерөнхий сайдаар ажиллаж байсан Антонио Гутерришийг сонгосон билээ.

 

Түүний бүрэн эрхийн хугацаа таван жил үргэлжлэх учиртай. Тэгвэл энэ даваа гарагт НҮБ-ын шинэхэн тэргүүн тангаргаа өргөжээ. Тэрбээр өргөснийхөө дараа үг хэлэхдээ дэлхий дахинд тулгамдсан асуудлуудыг шийдвэрлэхээ амласан байна.

А.Гутерриш хэлэхдээ “Дэлхийн дулаарал, хүн амын хэт өсөлт, хүнс болон ундны усны хомсдол зэрэг асуудал нь дэлхий дахиныг тогтворгүй болгож байна” гэжээ. Тэрбээр цааш нь “Гишүүн улс орнуудын идэвхтэй оролцоогүйгээр, иргэний нийгмийн байгууллагуудын туслалцаагүйгээр НҮБ-ын хүмүүнлэгийн болон хөгжлийн хүчин чармайлт хүчгүйднэ” гэжээ.

Цагаачид болон дүрвэгчдэд хатуу хяналт тавихыг уриалж байгаагаас гадна дэлхийн дулааралтай тэмцэх арга хэмжээ авах бодолгүй байгаа АНУ-ын Ерөнхийлөгчөөр сонгогдсон Дональд Трампын талаар А.Гутерриш дурдаад “Дэлхий дахинд тулгамдаж буй томоохон асуудлуудыг шийдвэрлэхийн тулд би АНУ-тай хамтран ажиллах хүсэлтэй байгаагаа тодорхой илэрхийлэх болно” гэжээ.

Бан Ги Мүний Ерөнхий нарийн бичгийн даргын албыг хаших хугацаа энэ сарын сүүлчээр дуусгавар болж, харин НҮБ-ын ес дэх тэргүүн Гуттериш ирэх оны нэгдүгээр сарын 1-нээс ажилдаа орох юм. Антонио Гутерриш 2015 оныг хүртэл НҮБ-ын Дүрвэгчдийн асуудал эрхэлсэн дээд комиссараар ажиллаж байжээ. Тэрбээр 13 нэр дэвшигчтэй өрсөлдөн сонгогдсон юм.

Хамгийн гол нь Аюулгүйн зөвлөлийн гишүүн орнууд Гутеррешийг санал нэгтэй дэмжсэн нь ийнхүү түүний өмнө НҮБ-ын ерөнхий нарийн бичгийн даргын суудалд томилогдох замыг зассан билээ. Ямартай ч, түүнийг 10 жил НҮБ-ыг тэргүүлсэн Бан Ги Мүнээс ч илүү том үүрэг хариуцлага хүлээж байгааг олон улсын эх сурвалжууд онцолж байгаа юм.

 

Эх сур:ikon.mn

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ