Тамирчид багаараа сүйрсэн онгоцны ослууд

xsdgbv45dxf6g4bd6x5fg.jpg Тамирчид багаараа сүйрсэн онгоцны ослууд
Ярославын хоккейн «Локомотив» багийнхан явсан Як-42 онгоц сүйрсний дараа. Фото: Григорий Сысоев / РИА Новости

Колумбийн Антьокия мужид өчигдөр зорчигч тээврийн хөлөг сүйрлээ. Онгоцонд нийт 81 зорчигч явсаны дотор Бразилийн үндэсний хөлбөмбөгийн лигийн “Шапекоэнсе” клубын тоглогчид явжээ. Энэ бол тамирчид багаараа онгоцны ослоор сүйрсэн анхны тохиолдол биш. 

Хөлбөмбөгийн “Торино” клуб, 1949 оны тавдугаар сарын 4

Турин хотын “Торино” клуб тухайн үед Италийн хөлбөмбөгийн топ байлаа. Клубын эзэн Ферруцио Ново хөлбөмбөгийн авъяастнуудыг хайж олох, цуглуулах ажлыг мэргэжлийн өндөр төвшинд гаргасан байлаа. Энэ баг үндэсний аваргын тэмцээний (1946, 1947, 1948) гурван удаагийн аварга байлаа.

Тэд Лиссабон хотноо “Бенфика” (3:4) багтай нөхөрсөг тоглолт хийгээд буцах замдаа осолдсон. Гурван хөдөлгүүрт  Fiat G.212CP онгоц цаг агаарын муу нөхцөлд  нисгэгчийн буруугаар жолоодлогоо алдан унасан юм. Буухад ялимгүй бага зай үлдсэн байсан ч буух үедээ толгод дээр байсан сүмийн хашааг далавчаараа мөргөжээ. Онгоц  хурдтайгаар газар мөргөн унан сүйрсэн байлаа. Онгоцонд байсан 31 хүнээс амьд гарсан хүн байхгүй. “Торино” багаас ганц хүн амьд үлдсэн нь хөлбөмбөгчин Лауро Тома бөгөөд тэрбээр гэмтлийн улмаас нисээгүй гэртээ үлдсэн байлаа.

Хөлбөмбөгийн “Манчестер Юнайтед” клуб, 1958 оны хоёрдугаар сарын 6

Британийн British European Airways компанийн Airspeed AS.57 Ambassador  агаарын хөлөг Английн “Манчестер Юнайтед” клубын  тамирчдыг зөөж явахдаа Мюнхен хотын нисэх буудалд осолджээ. Онгоцонд нийт 44 хүн явсан юм.

МЮ клуб Европын аваргуудын цомын цуврал тоглолтоо Белградын “Црвена звезда” багтай хийгээд нутаг буцаж явсан юм. Онгоц Мюнхен хотод түлшээ цэнэглэгдээд эргэн хөөрөх гэсэн ч цас хүчтэй орж байснаас хоёр ч удаа хөөрч чадсангүй. Нисгэгчид  дахин нэг оролдлого хийхдээ хангалттай хурд авч чадалгүй нисэх зурвасаас гарч байшин мөргөжээ. Гай болоход тэр байшинд шатахуунтай машин байжээ. Онгоц дэлбэрч 21 хүн газар дээрээ амь үрэгджээ.

Хөлбөмбөгийн “Пахтакор” клуб, 1979 оны наймдугаар сарын 11

1970-аад  оны сүүлчээр Ташкентын “Пахтакор” клуб ЗХУ-ын алдартай багийн нэг байлаа. Тэд Минскийн “Динамо” багтай тоглохоор  1979 оны наймдугаар сарын 11-нд “Аэрофлот” компанийн Ташкент- Минск чиглэлийн ТУ-134 онгоцоор нисчээ. Онгоцонд 14 тоглогч, дасгалжуулагчийн орлогч, багийн эмч явжээ.

Эмгэнэлт осол Днепродзержинс хотын дээр гарсан юм. Туршлага багатай диспетчер онгоц агаарт өөр нэг ТУ-134 онгоцтой хэт ойртсоныг хожимдож мэджээ. Нисгэгч нарт  холдох тушаал өгсөн ч тэд түүнийг хийж амжсангүй мөргөлдөн онгоцууд агаарт дэлбэрчээ. Хоёр онгоцны нийт 178 зорчигч тэдний тоонд “Пахтакор” багийн 17 хөлбөмбөгчин, дасгалжуулагчид амь үрэгдсэн.

“Пахтакор” багийн амьд үлдсэн хөлбөмбөгчид багаа шинэчлэн Зөвлөлтийн аваргын тэмцээний тоглолтоо сэргээсэн билээ.

British European Airways  компанийн онгоцны сүйрсэн газарт  Фото: Air Disasters by Stanley Stewart / Arrow Books (UK) 1986/89 / Wikipedia
British European Airways компанийн онгоцны сүйрсэн газарт Фото: Air Disasters by Stanley Stewart / Arrow Books (UK) 1986/89 / Wikipedia

Замбийн хөлбөмбөгийн шигшээ баг, 1993 оны дөрөвдүгээр сарын 27

Тус улсын хөлбөмбөгийн шигшээ баг1994 оны ДАШТ-ий сонгон шалгаруулах тоглолтыг Сенегалын багтай хийхээр болоод байсан юм. Санхүүжилт муутай байснаас тэд Замбийн  нисэх хүчний Buffalo DHC-5D онгоцыг түрээслэн авсан байв. Онгоц Габоны эргийн дагуу нисэх үеэр онгоцны нэг хөдөлгүүрт гал гаран онгоц далайд унажээ. Онгоцонд явсан 30 хүн тэдний тоонд 18 хөлбөмбөгчин бүгд амь үрэгджээ.

Энэ эмгэнэл Замбийн шигшээ багийг нэгтгэн нягтруулж өгсөн ба шинэ баг нь 1994 онд мөнгө, 1996 онд хүрэл медалийг Африкийн үндэсний цомын тэмцээнээс авч байлаа.

Хоккейн “Локомотив” клуб, 2011 оны есдүгээр сарын 7

ОХУ-ын Ярослав хотын “Локомотив”  баг Минск хот руу Тивийн хоккейн лигийн ээлжит тоглолтыг хийхээр нисчээ. Есдүгээр сарын 8-нд тоглох ёстой  тоглолт нь тус багийн хувьд улирлын нээлт болох ёстой байсан юм.

ЯК-42 онгоц Ярославын Тунашна буудлаас хөөрөөд өндрөө авч чадалгүйгээр дохионы антенныг мөргөн газар унасан. Онгоцонд явсан 45 хүний 43 нь газар дээрээ амь үрэгдсэн байлаа.

Онгоцны сүүл хэсэгт багийн довтлогч 26 настай Александр Галимов, нисэхийн техникийн инженер Александр Сизов хоёр сууж, бэхэлгээний хамгаалалтын бүсгүй явснаас онгоц задрахад тэд Туношонка голд унажээ. Тамирчин биеийн 90 хувийн түлэгдэлттэй  эмнэлэгт хүргэгдээд тав хоногийн дараа нас баржээ. Тэр аврагчид очиход ухаантай байжээ.

Сизов биеийн 15 хувийн  түлэгдэлттэй, хоёр чөмөг, тархи, хүзүү, чээжний ясны хугаралт гэмтэлтэйгээр эмнэлэгт хүргэдэн ирсэн ба хожим эмчлэгдсэний дараа Яковлевын нэрэмжит зохион бүтээх товчоонд нисэхийн техникийн ажилтай болсон юм.

Эх сур:news.mn

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ