Пак Гын Хэгийн хувь заяа Баасан гаригт шийдэгдэнэ

dgb54fgb4f564hb.jpg Пак Гын Хэгийн хувь заяа Баасан гаригт шийдэгдэнэ

Өмнөд Солонгосын анхны эмэгтэй Ерөнхийлөгч Пак Гын Хэг огцрохыг шаардсан аян хүчээ авч байна.

Эсэргүүцлийн ажиллагааг зохион байгуулагчдын мэдэгдсэнээр Сөүл хотноо 1,5 сая, бусад хотод 400 мянга орчим хүн өнгөрсөн амралтын өдрүүдэд жагсчээ. Ерөнхийлөгчийн найз эмэгтэй Чой Сун Шилтэй холбоотойгоор эхэлсэн дуулиан ийнхүү тав дахь долоо хоногтоо үргэлжилж байна. Прокуророос Пак Гын Хэд авлига, албан тушаалаа урвуулан ашигласан хэрэгт буруутгаж байгаа юм.

Наяад оны сүүлчээс хойш ийм өргөн цар хүрээтэй эсэргүүцэл Өмнөд Солонгост гарч байгаагүй юм. Одоо 64 настай Пак Гын Хэ Өмнөд Солонгосын түүхэн дэх анхны эмэгтэй Ерөнхийлөгч. Тэрбээр 2012 онд сонгогдсон. Ерөнхийлөгчийн ээлжит сонгууль ирэх жил болох юм.

ЯАГААД ЕРӨНХИЙЛӨГЧИЙГ ОГЦРУУЛАХААР ШААРДАХ БОЛОВ?

Ерөнхийлөгчийн найз Чой Сун Шилийг их хэмжээний хандивыг өөрийн мэдлийн   хоёр санд оруулахыг том  компаниудаас хууль бусаар шахан дарамталсан гэх хэргээр Өмнөд Солонгосын прокурор буруутгаж байгаа.

Үндсэн хуулийн дагуу Ерөнхийлөгч халдашгүй бүрэн эрхтэй учраас прокурор Пак Гын Хэд ял тулгаагүй байгаа ч хэрвээ тус улсын парламент Ерөнхийлөгчид итгэл үзүүлэхгүй гэж үзвэл албан тушаалаасаа огцроход бэлэн гэдгээ өчигдөр Пак Гын Хэ мэдэгдлээ. Парламент итгэл үзүүлэх эсэхийг ирэх Баасан гаригт хэлэлцэх юм. Парламентын гишүүдийн гуравны хоёр дэмжвэл Ерөнхийлөгч огцорно. Албан тушаалаасаа огцрохоо мэдэгдэхдээ Пак Гын Хэ гурав дахь удаагаа олон нийтээс уучлалт гуйлаа.

Пак Гын Хэг ийнхүү хүчтэй эсэргүүцэж байгааг дараах хүчин зүйлтэй холбон тайлбарлаж байна.

Нэг. Ерөнхийлөгчийн нэр хүнд унаж байна

Ерөнхийлөгч Пак улс орноо удирдаж чадахгүй байна гэсэн хандлага улам нэмэгдэж байгаа. Түүнд улс төрийн хүч, шинэчлэл явуулахаар сонгуулийн үеэр амласнаа биелүүлэх итгэл алга. Одоо түүний чансаа дөнгөж дөрвөн хувьтай байна. 2013 онд 63 хувь байсан билээ. Тус оронд Ерөнхийлөгчийн засаглал тогтсоноос хойших хамгийн доогуур үзүүлэлт одоо түүнийх болов.

Ерөнхийлөгчийн энэ дуулианы улмаас  ардчиллын нэр хүнд улам унаж байна. 1987 оноос бий болгосон бүхэл бүтэн тогтолцоог Пак үл тоолоо гэж шүүмжлэгчид хэлж байгаа.

Хоёр. Эдийн засгийн өсөлт саарч байна

Дэлхийн 11 дэх эдийн засаг болох БНСУ-ын энэ жилийн III улиралд ДНБ-ий өсөлт  өмнөх улирлын 3,3 хувиас 2,7 хувь хүртэл буурлаа. Хөлөг онгоцны үйлдвэр зэрэг гол салбарт бүтцийн шинэчлэл хийх шаардлагатай учраас эдийн засгийн өсөлт цаашид саарна гэж шинжээчид дүгнэж байгаа юм.

2012 онд Ерөнхйилөгчөөр сонгогдохдоо Пак гэр бүлийн хуучин компаниудыг  өөрчлөн гарааны компаниудыг дэмжих соёлыг нэвтрүүлэн, эдийн засгийг амилуулан хөдөлгөнө гэж амлаж байсан. Гэсэн ч тэр амлалтуудаас цөөхөн хэсгийг л Пак биелүүлжээ. Пакын Засгийн газар амласан шинэчлэлийг хийгээгүйгээс гадна иргэдийн өрийн өсөлт зэргийн урсгал асуудлыг шийдэж чадсангүй. Өмнөд Солонгосын хүн амын өр нийтдээ 1,15 их наяд ам.долларт хүрчээ. Энэ дэлхийд наймд орох үзүүлэлт юм. Мөн тус орны олонд танил болсон цуутай том брендүүд дэлхийн зах зээлд цувран бүтэлгүйтсээр байна.

Тухайлбал, Hanjin Shipping гэх хөлөг онгоцны том компани нь наймдугаар сард дампуурлаа зарлав. Энэ салбарын өөр нэг компани дампуурахгүйн тулд орон тоогоо цомхотгож байна.

Samsung Electronics-ийн байнга дэлбэрээд байгаа Galaxy Note 7 утаснаасаа болж, үйлдвэрлэлээ зогсоож, таван тэрбум ам.долларын хохирол амсчээ.

Гурав. Протекционист шахалт

Өмнөд Солонгосын эдийн засгийн доройтол нь худалдааны түнш болох АНУ ба Хятадтай холбоотой. Өмнөд Солонгосын нийт экспортын 40  хувь нь энэ хоёр улсад ногддог. АНУ-ын пуужингийн бамбайг Солонгосын хойгт байрлуулах Сөүлийн төлөвлөгөөг Бээжин албан ёсоор эсэргүүцэж байгаа. Энэ систем нь Хойд Солонгосоос хамгаалах  хамгаалалт гэж байгаа ч Хятад түүнийг өөрийн эсрэг хэрэглэнэ гэж болгоомжилж байгаа.

АНУ-ын Ерөнхийлөгчийн сонгуульд Дональд Трамп ялсан нь Өмнөд Солонгост бас том цохилт болж байна. Сонгуулийн дүн гарсаны дараа Сөүлийн эрх баригчид  банкууддаа гаднын хүчин зүйлд бэлэн байх сануулгыг өгчээ.

Үүний зэрэгцээ, тус улсад АНУ-ын 30 мянган цэрэг байрлаж байгаа. Сонгуулийн сурталчилгааныхаа үеэр Трамп тэднийг эргүүлэн татна, үгүй бол мөнгөө төл гэж хэлсэн билээ. Трампын энэ үг солонгосчуудыг цочроосон юм.

ДУУЛИАН ХЭРХЭН ЭХЛЭВ?

Аравдугаар сарын 24
JTBC телевизийн хөтлөгч Пакын найз Чой Сун Шил Ерөнхийлөгчийн хэлэх үгийг засч, улсын хэрэг явдалд оролцож байсан гэж мэдээлэв.

Аравдугаар сарын 25
Чой Сун Шилтэй найз гэдгээ хүлээн зөвшөөрч Пак Гын Хэ анх удаа олон нийтээс уучлалт гуйлаа.

Аравдугаар сарын 29-30
Эсэргүүцэгчид анхны арга хэмжээгээ зохион байгуулав. Энэ хэрэгт холбоотой гол зөвлөхүүдээ Пак халлаа.

Арваннэгдүгээр сарын 1
Мөрдөн байцаагчид Чой Сун Шилийг байцаав.

Арваннэгдүгээр сарын 2-3
Пак Засгийн газрын танхимдаа өөрчлөлт хийлээ. Түүний хоёр туслахаас байцаалт авахаар баривчлан саатуулав.

Арваннэгдүгээр сарын 8: 
Мөрдөн байцаагчид Samsung Electronics компанийн байранд нэгжлэг хийлээ.

Арваннэгдүгээр сарын 20: 
Ерөнхийлөгч Пакын хоёр туслах болон түүний найз Чой Сун Шилд албан ёсоор ял сонсголоо.

Арваннэгдүгээр сарын 24
SK, Lotte хоёр компанид авлигын хэрэгтэй холбоотойгоор нэгжлэг явууллаа.

Эх сур:news.mn

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ