“Төрийн өндөрлөгүүдэд өргөдөл өгөх ямар ч шаардлагагүй”

Ууганаа.jpg “Төрийн өндөрлөгүүдэд өргөдөл өгөх ямар ч шаардлагагүй”

Улсын онцгой комиссын Шуурхай штаб мэдээлэл хийлээ. Мэдээллийн эхэнд Онцгой байдлын ерөнхий газрын дэд хурандаа Б.Ууганбаяр “Монгол Улсад нэгдүгээр сарын 26-с хойш 130 гаруй мянган иргэн орж ирсэн. Үүнээс 8000 гаруй иргэнийг гадаад улсаас татан авсан. Мөн 15 удаагийн агаарын тээврийн татан авалтаар 3000 гаруй хүн, төмөр зам, бусад хилээр орж ирсэн 5007 хүн байна. Сүүлийн долоо хоногийн байдлаар ОХУ-аас агаарын хөлөг болон Алтанбулаг боомт, Турк, Энэтхэгээс нийтдээ 1070 хүнийг татан авчирсан. Өнөөдрийн байдлаар 46 улсаас 10 мянга 761 иргэн эх орондоо ирэх хүсэлтээ ирүүлсэн. Эдгээрээс өндөр настан 896, богино хугацааны визтэй 158, оюутан 2815, хүүхэд 358 байна. Гадаад улс дахь судалгааг гаргуулж авсан. Нийтдээ 27 цэгт татан авсан иргэдээ байрлуулсан. 2029 хүн тусгаарлах байранд байна. Тухайлбал, ХӨСҮТ, Жаргалант, Корпорейт, Хабу, Тоёоко Инн, Энх-саран сувиллуудад байна. Сэлэнгэ, Орхон, Дархан-Уул аймагт ОХУ-аас авчирсан иргэдийг байрлуулсан. УОК болон Шадар сайдын зүгээс ОХУ-аас оюутнуудаа татан авчрах чиглэл өгсөн. Мөн Энэтхэг улс руу хоёр дахь нислэгийг төлөвлөж байна. БНХАУ-аас тодорхой тооны хүмүүс эх орондоо ирэх хүсэлтээ ирүүлсэн. Ойрын хугацаанд Дорноговь аймгийн Замын-үүдэд татан авчирна. Цаашдаа ч иргэдээ тасралтгүй татан авна” гэлээ.

Энэ үеэр Онцгой байдлын ерөнхий газрын дэд хурандаа Б.Ууганбаяр сэтгүүлчдийн асуултад хариулт өглөө.

-ОХУ-д суралцаж буй оюутнуудаа хэзээ дахин татан авах вэ?

-Бид ОХУ-д байгаа оюутнуудын нөхцөл байдлын талаар Элчин сайдтай байнга холбогдож, мэдээлэл авч байгаа. Хүндэрсэн нөхцөл байдал байна. Ойрын хугацаанд тэндээс иргэдээ татан авах ажлыг зохион байгуулна. Бид Улсын онцгой комиссын үүрэг чиглэлийн дагуу ОХУ-д суралцаж буй оюутнуудаа татан авах ажлаа бэлтгэж байна.

-Шуурхай штабт иргэд хэрхэн хүсэлтээ гарган өгч байгаа бол?

-Шуурхай штабт иргэд амралтын өдөр гэлтгүйгээр хандаж байгаа. Одоогийн байдлаар 10 мянга гаруй иргэдийн өргөдлийг хүлээн авсан. Өргөдөл дээр дүн шинжилгээ хийх ажлын хэсгийг дотроо зохион байгуулалтад ороод, томилсон. Хэзээ ч Шуурхай штабт өргөдлөө өгөхөд хүлээн авна.

Харин Улсын онцгой комисс болон төрийн өндөрлөгүүдэд өргөдөл өгөх ямар ч шаардлагагүй. Албан ёсоор Шуурхай штаб дээр өргөдөл хүлээн авч байгаа.

-Цаашид гадаад улсаас иргэдээ татан авсаар байх уу. Тусгаарлах байр, эмнэлгийн ачааллаа тооцсон хязгаарлалт бий юу?

-Гадаад улсаас иргэдээ тасралтгүй татан авна. Дэлхий болон Монгол Улсын нөхцөл байдал цаашид ямар болохыг таамаглахад хэцүү. Эрүүл мэндийн яам салбарынхаа мэдээллийг тогтмол хийж байгаа. Шуурхай штаб бусад ажлыг зохион байгуулж байна. Гадаадад байгаа иргэддээ бидний нөөц боломж хязгаарлагдмал байна гэдгийг хэлсэн. Бид олон удаа тусгаарлах байруудтай уулзаж байна. Өнөөдөр нэг хүнийг нэг өрөөнд тусгаарлахгүй бол болохгүй байна. Эхнээсээ ирсэн иргэд 21 хоног болбол дараагийн ээлжийг татан авч байна. Одоо тавдугаар сарын 22, 23, 25-ны өдөр тавдугаар сарын эхээр БНСУ-аас ирсэн иргэд гэрийн ажиглалтад шилжинэ. Бид тэр байранд нь халдваргүйжүүлэлт хийж, дараагийн иргэдээ татан авах бэлтгэлээ  хангана.

-Өнөө өглөө Энэтхэгийн онгоцоор ирсэн хүмүүсийн талаар дэлгэрэнгүй мэдээлэл өгөөч?

-Энэтхэг рүү жижиг оврын онгоц нисч, 158 хүн эх орондоо ирсэн. Зарим нь Улсын нэгдүгээр төв эмнэлэгт очсон бол ХӨСҮТ-д сэжигтэй хоёр тохиолдол очсон. Хаа очиж, эрсдэл бага байна. Бусад хүмүүсийг тусгаарлах байранд хуваарилсан. Бага насны хүүхдүүд байгаа. Зарим тохиолдолд бид онгоц дотроо түргэвчилсэн оношлуураар шинжлэх гэж оролдож байна. ОХУ-аас ирсэн оюутнуудыг шинжилгээ хийхдээ түргэвчилсэн байдлаар хийсэн байж болзошгүй. Тиймээс татан авч буй иргэдийн шинжилгээнд хамрагдах боломж харилцан адилгүй байгаа.

“ДОЛООН ДҮҮРЭГТ ШАЛГАЛТ ХИЙХЭД 3110 ХҮН АМНЫ ХААЛТАА ЗҮҮГЭЭГҮЙ”

Мэргэжлийн хяналтын ерөнхий газрын  дэд дарга Д.Сугарбат:

-Өнөөдрийн байдлаар Монгол Улстай хил залгаа ОХУ-ын хотуудын өвчлөлийн мэдээллийг хүргэе. Улаан-Үдэ хотод 948, Эрхүүд 601, Тувад 299 тохиолдол бүртгэгдээд байна. Гадаадаас зөөвөрлөгдөн орж ирж буй шинэ тохиолдлын тоо эрчимтэй нэмэгдэж байна. Гэтэл ард иргэд анхаарал сэрэмжээ сулруулж эхэлж байна. Иргэд маскаа зүүхгүй, аж ахуй нэгж ариутгал халдваргүйжүүлэлтээ тогтмол хийхгүй байна. Манай байгууллагаас тавдугаар сарын 16-нд нийслэлийн долоон дүүрэгт хяналт шалгалтын үйл ажиллагаа явуулахад 3110 хүн амны хаалтаа зүүгээгүй, 1189 аж ахуй нэгж ариутгалаа тогтмол хийгээгүй асуудал гарч байна. Эдгээр хүмүүст эхний ээлжинд шаардлага тавьж, зөвлөгөө өгсөн. Харин 514 аж ахуй нэгж ариутгалыг тогтмол хийж байна. Ард иргэд зуны улиралд амны хаалтаа зүүж, гарын ариун цэврээ сайн сахих хэрэгтэй.

Мөн тавдугаар сарын 17-нд хийсэн хяналт тандалтаар 2077 объектод амны хаалтгүй явж байгаа иргэдэд анхаарга, зөвлөмж өгсөн. Өчигдөр архи согтууруулах ундаа борлуулдаг, үйл ажиллагаа явуулдаг 197 аж ахуй нэгж байгууллагад хяналт тавьж, зөвлөмжийг хүргүүлсэн. Ер нь архи согтууруулах ундаа худалдаалж, үйл ажиллагаа явуулж буй байгууллагууд санаатай болон санамсаргүй цаг хэтрүүлж ажиллах зөрчил гарч байна. Дорнод аймагт тавдугаар сарын 16-нд зургаан том хүн, нэг хүүхэд хоол хүнсний хордлого авч, эмнэлгийн байгууллагад хандсан.

Эх сурвалж: А.Цээсүрэн (news.mn)

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ



Warning: fopen(/var/www/html/xac/ww.hardnews.mn/cache/7eb1d45782ded83599549ebd66230dbf.html): failed to open stream: No such file or directory in /var/www/html/xac/ww.hardnews.mn/cache.php on line 27

Warning: fwrite() expects parameter 1 to be resource, boolean given in /var/www/html/xac/ww.hardnews.mn/cache.php on line 28

Warning: fclose() expects parameter 1 to be resource, boolean given in /var/www/html/xac/ww.hardnews.mn/cache.php on line 29