Жанжны нутгийн цэх сэтгүүлч

Олдохоооо.jpg Жанжны нутгийн цэх сэтгүүлч

Чанцалын Үл-Олдох гэж содон нэртэй, даруухан бүсгүйтэй сэтгүүлзүйн гал тогоонд он цагийг туулж явна. Хэн хэнийхээ уншигч нь, мөн шүүмжлэгч нь явж ирэв, бид. Бие биеэ урмын үгээр ташуурдаж, бас мэдээ мэдээллийн араас уралдаж, өрсөлдөж ирэв. Өнгөрсөн хугацаанд тэрбээр өчнөөн сувагтай, олон өнгөтэй мэдээ мэдээллийг нягталж, тэнцвэртэй мэдээлж ирсэн “Ган үзэгтэн”. Өөрийн гэсэн үзэл бодолтой, баримталдаг зарчим, байр суурьтай шударга сэтгүүлч болохоо бичсэн мэдээ, нийтлэл, сурвалжлагаараа баталж ирсэн нэгэн.

Чанцалын Үл-Олдох дуу цөөнтэй атал цаас үзэг хоёр нийлүүлэхээрээ часхийж байдаг сэтгүүлч. “Зууны мэдээ”-гийн “Иргэдээ өмөөрч бичнэ” гэсэн индэр дээр   хиншүү хярвас үнэртсэн халуун сэдвүүд хөндсөн нь цөөнгүй. Эр зориг шаардсан эрэн сурвалжлагууд хийсэн нь ч олонтаа. Сэтгүүлчийн цаг наргүй ажлын хажуугаар юм л бол Сүхбаатар нутгийнхаа алдар цуутнууд, хурдан морь, өв соёл, зан заншлын талаар олон сайхныг бичиж туурвина. Болохгүйг нь ч хатуухан шүүмжилнэ. Түүнийг мэргэжил нэгт нөхөд нь “Нийслэл дэх Сүхбаатар аймгийн сурвалжлагч” гэлцдэг. Дээхнэ үед “Үнэн” сонины тусгай сурвалжлагч гэсэн орон тоо аймаг бүрт байдаг, хотоос нэртэй сэтгүүлчид томилогдож ажилладаг байсан түүхтэй. Тэгвэл энэ цагт Үл-Олдох маань нийслэл дэх Сүхбаатар аймгийн сэтгүүлчийн үүргийг сайн гүйцэтгэж яваа.

Тэрбээр сэтгүүлзүйн гал тогоонд үзгээ хурцалж зүтгэсэн 20 гаруй жилд бүхий л салбарын мэдээ мэдээлэл бэлтгэхийн сацуу даацтай нийтлэл, сурвалжилга, ярилцлагаараа өөрийнхөө чансааг олонд таниулсан эрэмгий бүсгүй.

Нутгийнхаа зон олныг ялгалгүй дэмжиж, тусалдаг элгэмсүү сэтгүүлч. Байсхийгээд л Сүхбаатар, Дорнод аймгаас “Нутгийнхаа сэтгүүлчтэй ярья” гээд редакц руу утас цохих нь бий. “Хөдөөнөөс зорьж ирлээ, Үл-Олдох сэтгүүлчтэй уулзана” гэх хүн ч олон. Эрх нь зөрчигдсөн, зовлон бэрхшээл тохиолдсон талаар хэвлэлд хандах гэж нутгийн сэтгүүлчээ эрж сурж ирцгээнэ.

Ган үзэг 2019” оны тэргүүн наадмын ШИЛДГҮҮД тодорлоо » Төр.мн

Түүний хөндсөн сэдвүүд олны анхаарлыг татаж байсан нь цөөнгүй бий. Түүнчлэн алдартай хүмүүс, тэдний амжилт бүтээлийг түүх намтартай нь архивлаж, томоохон бүтээн байгуулалт хийж, хөгжилд түүчээлсэн хүн, аж ахуйн нэгжийн амжилт бүтээлийг тодруулж сурвалжилсан нь олонтаа. Тиймээс Сүхбаатар аймагтай холбоотой ямар нэгэн мэдээллийн мөрөөр хөөцөлдөх, тодруулах хэрэг гарвал бид хамгийн түрүүнд түүнтэй холбогддог. Мань хүн ч “Лавлах товчоо”-ны үүргийг бас сайн гүйцэтгэнэ.

Өнгөрсөн сонгуулийн үр дүнд Сүхбаатар аймагт засаглал хуваасан МАН, АН-ын талцалд Сүхбаатар аймаг хэсэгтээ л “Эзэнгүй айл” шиг болж, энэ сул талыг ашиглан хариуцлагагүй уул уурхай газар авсан. Газрын тосны хайгуул хийх нэрээр хилийн торыг тасдан хоёр тийш нь эвхэж тавьчихаад өрөмдлөг хийж байсныг нутгийн зон олон мартаагүй байх.  Уул уурхай дагасан олны хөлд түүхийн дурсгал хулгайд алдагдах, булш бунхан тоногдох, малын хулгай нэмэгдэх аюул нүүрлэсэн. Хамгийн гол нь иргэдийнх нь язгуур эрх ашиг хэрхэн хөндөгдөж байгааг Ч.Үл-Олдох маань газар дээрээс нь сурвалжлан “Жанжны нутаг сүйрлийн ирмэгт”, “Сүхбаатарын Эрдэнэцагаан сум сүйрлийн ирмэгт” гэсэн цуврал нийтлэлүүд бичиж олны анхааралд хүргэсэн. Сэтгүүлзүйн энэ бүтээлээрээ МСНЭ-ийн 2019 оны сонины шилдэг сэтгүүлчээр шалгарч “Ган үзэг”-ийн эзэн болсон бол түүний бичсэн нийтлэлийн мөрөөр хэд хэдэн компанийг холбогдох байгууллагууд шалгаж, заримынх нь үйл ажиллагааг зогсоож, зөвшөөрлийг нь түдгэлзүүлсэн байдаг.

Ийнхүү  хязгаар нутаг Сүхбаатар аймагтаа дөрөвдөгч засаглалын үүргийг сөрөг хүчний үүрэгтэй хамт хэрэгжүүлж ирсэн “Ган үзэг”-тэн сэтгүүлчтэй Сүхбаатар аймгийнхан азтай юм. Эхлүүлсэн сэдвээ эцсийг нь хүртэл орхидоггүй жанжны нутгийн цэх сэтгүүлчид “Ган үзэг” нь ташуур болог ээ.

Эх сурвалж: erinnews.mn

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ



Warning: fopen(/var/www/html/xac/ww.hardnews.mn/cache/9bb9bddb0e66a545501d1a241d28cb85.html): failed to open stream: No such file or directory in /var/www/html/xac/ww.hardnews.mn/cache.php on line 27

Warning: fwrite() expects parameter 1 to be resource, boolean given in /var/www/html/xac/ww.hardnews.mn/cache.php on line 28

Warning: fclose() expects parameter 1 to be resource, boolean given in /var/www/html/xac/ww.hardnews.mn/cache.php on line 29