Төв аймагт МАН суларч, АН чангарна

TUV.jpg Төв аймагт МАН суларч, АН чангарна

УИХ-ын ээлжит сонгуулийн мэдээ короавиурсийн цар тахлын шуугианыг “нам” дарсан өдрүүд үргэлжилж байна. Энэ удаагийн сонгуульд 15 нам, 4 эвсэл, 208 бие даагч өрсөлдөх хүсэлтээ илэрхийлээд байгаа. Сонгуулийг шинэчлэгдсэн хуулиар буюу томсгосон 29 тойргоор зохион байгуулна.

Төв аймгийн хувьд гурван мандаттай. 90 гаруй мянган хүн амтай эл аймаг 60 гаруй мянган сонгогчтой. Өнгөрсөн дөрвөн жилийн хугацаанд УИХ-ын гишүүн М.Энхболд, Н.Энхболд, А.Сүхбат нарыг сонгосон. Хэдийгээр энэ гурван эрхэм дахин сонгогдох хүсэлтэй байгаа ч нөхцөл байдал тэдэнд халтай байж мэдэхээр байна. Тиймээс Төв аймгийн сонгууль тун өрсөлдөөнтэй болох нь. Улс төрийн хүрээнийхэн үүнийг гурван суудлын боломж гэж харах болсон аж. Гурван мандаттай өчнөөн тойрог байгаа ч дархлагдсан гишүүд нь бусад нэр дэвшигчдэдээ боломж олгодоггүй. Харин Төв аймагт “дархлагдсан” гишүүдийнх нь суудал “ганхах” байдал ажиглагдсан тул гурвын гурван боломж гараад ирлээ гээд байгаа юм байна.

Учир нь МАН-ын дарга, УИХ-ын дарга асан М.Энхболд “60 тэрбум схем”-ийн толгойлогч хэмээгдэх болсон. Энэ л хэргийн улмаас УИХ-ын даргын суудлаас “унаж”, МАНАН-гийн удирдагч хэмээн цоллуулаад үлдсэн. МАН-ын одоогийн удирдлагууд түүнийг нэг мөр шахахыг хүсэж байгаа.  Хэрэв У.Хүрэлсүх М.Энхболдыг дэвшүүлбэл, өнгөрсөн хугацаанд хийсэн ажил, гаргасан дэвшлээ баллаж орхино гэсэн үг. Тиймээс У.Хүрэлсүхийн найруулсан "М.Энхболдыг Монголын төрөөс зайлуулах" ажиллагаа нь амжилттай явагдаж буй энэ үед түүнийг дахин дэвшүүлэх нь юу л бол?

МАН-ын дарга У.Хүрэлсүх нэгэнтээ ЖДҮ-д нэр холбогдсон гишүүдийг дэмжихгүй гэдгээ хэлсэн. Энэ утгаараа ЖДҮ-д холбогдсон А.Сүхбатын ирээдүй бүрхэг болж байгаа. Дээрээс нь саяхан болсон Төв аймгийн МАН-ын хорооны хуралдаанаас "жижиг" А.Сүхбат дэмжлэг авч чадаагүй. Гэхдээ А.Сүхбат гишүүн У.Хүрэлсүхийн Засгийн газар байгуулагдахад кнопоор дэмжиж байсныг нь бодолцож, Төв аймагт дэвших эрхийг бэлэглэж болох талтай. Аваргын хувьд өнгөрсөн дөрвөн жилд Туул голын ай савыг хамгаалах чиглэлээр багагүй гүйснээс биш аймгийн хөгжил, бүтээн байгуулалтад санаа тавьсан нь юу л бол. Тэгэхээр сонгуульд өрсөлдлөө ч сонгогчдодоо юу хэлэхийг таашгүй.

БХЯ-ны сайд Н.Энхболдын хувьд Төв аймгаас олон сонгогдсон ч энэ удаад өнжиж магадгүй гэнэ. Тэгээд ч аймгийн намын хорооноосоо тун хойгуур эрэмбэлэгджээ. Магадгүй нам нь ялбал тэрбээр сайд болох тохироо хийсэн байх. Тэгэхээр МАН-аас нэг нэр дэвшигчийн орон тоо гарах бололтой.

Тэгвэл энэ боломжийг шүүрэхээр Төв аймгийн МАН-аас шинэ хүмүүс горилж байна. Тодруулбал, Ерөнхий аудитор асан, ЖДҮ-чин Д.Хүрэлбаатар. Төв аймгаас ажлын гараагаа эхэлсэн гэгдэх тэрээр МАН-д Зүүний хүчний холбоонд харьяалагддаг. Гэвч тэрээр Төв аймагт танигдаагүй, дээр нь ЖДҮ-ийн хэргээс болж албан тушаалаа өгсөн нэгэн билээ. Түүнчлэн Төв аймгийн Засаг дарга Ж.Батжаргал аймгийнхаа намын хорооноос нэгээр эрэмбэлэгдэж бага хуралдаа өргөгджээ. Засаг дарга Ж.Батжаргалын хувьд намын хороо нь 1-рт эрэмбэлсэн хэдий ч орон нутагтаа танигдаагүй, сул нэгэн. Дээрээс нь төрийн ажил хийдэггүй. Түмний хөрөнгөөр тансагладаг нэртэй. Баримт дурдахад: тэрээр 2017 онд албаныхаа Ланд-200 машиныг МАН-ын хуралд унаж яваад ноцтой осолдож, жолооч нь газар дээрээ амь насаа алдсан гашуун балагтай.

Хэрэв анзаарсан бол МАН-аас нэр дэвшигчид намынхаа үндсэн бодлоготой зөрчилдсөн гэмээр хүмүүс өрсөлдөх бололтой. Энэ утгаараа намын дэмжлэг сайнгүй байх талтай. Үгүй гэвэл харьцангуй шинэ хүмүүсийг дэвшүүлэх болно.

Тиймээс л АН болон бусад намуудад боломж байна гээд байгаа юм. Энэ удаад тусгайлан АН-д анхаарлаа хандуулъя. Эхний ээлжид АН-ын дэд дарга Ц.Тувааны нэр АН-аас тод дуулдаж байна. Өөрөө ч сонгуулийнхаа ажлыг аль эртнээс эхлүүлчихсэн. Түүний сошиал хуудаст тавигдсан мэдээллээс харахад тэрээр аль эртнээс Төв аймагт ажиллаж яваа.

Дараагаар нь Хууль зүйн сайд асан, АН-ын дэд дарга Х.Тэмүүжин унаган нутаг Төв аймагтаа нэр дэвшихээр аймгийнхаа намын хорооноос дэмжлэг авсан байна.

Мөн АН-ын Гадаад харилцаа, сургалт, хөгжлийн газрын дарга, Төв аймгийн “Ардчилсан эмэгтэйчүүдийн холбоо”-ны тэргүүн, АН-ын ҮБХ-ны гишүүн, эмч мэргэжилтэй Д.Эрдэнэсувд нэр дэвших тухай хүчтэй яригдаж байгаа юм байна.

Тэгэхээр эдгээрийн хэн нь ч бай хүчтэй өрсөлдөгч байж чадна. Учир нь Төв аймагт гурвын гурван суудлын боломж байна.

Харин гуравдагч хүчний тухайд болон даагч бие даагчдыг дурдалгүй өнгөрч болохгүй. Тэдэн дундаас өрсөлдөгч байж болохуйц дэвшигч бол Төв аймгийн АН-ын дарга асан Д.Доржпүрэв. Тэрээр энэ удаад бие даан өрсөлдөхөөр Зуунмод хотод гарын үсэг цуглуулж эхэлжээ. Учир нь дөрвөн жил таг чиг, намаасаа хөндий явсан түүнд АН дэвших эрх олгосонгүй. Д.Доржпүрэвийн хувьд өмнө нь Төв аймгийн АН-ын дарга байхдаа УИХ-ын сонгуульд гурван ч удаа өрсөлдөж ялагдал хүлээсэн байдаг. Тэгвэл тэрээр дөрөв дэх удаагаа даагаа нэхэхээр шийджээ.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ



Warning: fopen(/var/www/html/xac/ww.hardnews.mn/cache/a3cf7a062b3fb430a9f83cb3060dc99d.html): failed to open stream: No such file or directory in /var/www/html/xac/ww.hardnews.mn/cache.php on line 27

Warning: fwrite() expects parameter 1 to be resource, boolean given in /var/www/html/xac/ww.hardnews.mn/cache.php on line 28

Warning: fclose() expects parameter 1 to be resource, boolean given in /var/www/html/xac/ww.hardnews.mn/cache.php on line 29