Сэтгүүлч би сэтгүүлчээ өмөөрөхүй

history_1482664178.jpg Сэтгүүлч би сэтгүүлчээ өмөөрөхүй

Дэлхийн нийтээрээ Covid-19 цар тахлын эсрэг хүчээ нэгтгэн ажиллаж байгаа энэ цаг дор Монгол дахь “улс төрийн хавар” цас ханзлан, уулын шар ус шиг үерлэн нийгмийн тархи руу хүч түрэн орж ирлээ. 

Замд тааралдсан бүхий л хогийг ямар ч шүүлтүүргүйгээр юутай хийтэй нь хуу хаман үерлэх “улс төрийн хавар” түрлэг лугаа адил нийгмийн оюун санаанд шүүн тунгаах сэхээ боломж ч өгөхгүй байна.

Гэм буруутай нь шүүхээр тогтоогдоогүй байхад нь гэм буруутан, ялтан мэтээр харлуулах зорилготой томоохон компанит (мэдээллийн дайн) ажил хүчтэй явагдаж байгаа нь хэнд ч нууц биш. Тэр тусмаа нэг биш “субъект” руу тодорхой зорилготойгоор онилон дайрах явдал үнэн дээ эрхзүйт ардчилалтай манайх шиг хүн ам цөөнтэй улсад бодит аюул юм. Шууд утгаараа Үндэсний Аюулгүйн Байдалд шууд ба шууд бус байдлаар заналхийлсэн үйл явц гэхэд болно.

2020 оны УИХ-ийн болон Орон нутгийн сонгуулийн жил тохиосон өдрүүдэд сонгогчдын боловсролыг хааш нь бол, хааш нь савлуулж мэдэх “үнэн, худал” нь үл мэдэгдэх тэр их мэдээлэл, “дайсагнал”-ийн ард гаднын “зөөлөн хүчин”-ы “бодлого, явуулга” нуугдаж байх вий гэх хардалт, болгоомжлол сэтгүүлч надад бий.

Тиймээс өнөөдөр би сэтгүүлчийнхээ хувьд нэгэн “сэтгүүлч”-ээ өмөөрч бичмээр санагдсанаа нуух юун. Сэтгүүлчдийн гал тогооноос улс төрийн бүхий л өндөр албан тушаалын оргилд нь хүрч чадсан цөөн хүний нэг бол Батлан Хамгаалах Яамны харьяа “Улаан Од” сонины сурвалжлагч Цахиагийн Элбэгдорж юм. Түүнийг 30 жилийн турш  улс төрийн гол тоглогчдын нэгэн байх үед ч, одоо улс төрөөс ангид холдсон үед ч элдвээр гоочлох, цоллох, харлуулах, дарамтлах дайралтууд өөрийнх нь сүүдэр мэт өнөөдрийн нийгэмд “амь бөхтэй” оршсоор байна.

ц.элбэгдорж сурвалжлагч-н зурган илэрц

"Улаан од" сонины сурвалжлагч Ц.Элбэгдорж наадмын үеэр. 1989 оны VII.12

Хэдийгээр тухайн Ц.Элбэгдорж гэх хувь хүнийг шүүхээс урьтаж харлуулан, элдэв хоч пайз зүүлгэн “амьдаар нь булшлаад” байгаа юм шиг боловч, цаад утгаараа та бид хамтдаа явж ирсэн алдаа, оноотой 30 жилийн настай өөрсдийн бий болгосон эрхзүйт ардчиллаа үгүйсгэн, харлуулан, шоглож буйтай агаар нэг юм. Өөрөөр хэлбэл Монгол хүний нөгөө “муухай” зан гээгдэхгүй, давтагдаж байна гэж би хэлнэ.

Төр, нийгмийн нэрт зүтгэлтэн Юмжаагийн Цэдэнбал, Санжаасүрэнгийн Зориг, Очирбатын Дашбалбар, Мэндийн Зэнээ, Лхамсүрэнгийн Энэбиш, Жанлавын Наранцацралт, Ономоогийн Энхсайхан нарыг амьд сэрүүнд нь газар дэлхийн даахгүй болтол нь гоочлон муучилж, “тэнгэрт дэвшсэн”-ы дараа тэнгэрт цойлтол нь амаа олохгүй магтан, захын “ноход” хүртэл тэдний найз болон тодорч байсан он жилүүдийг бид мартах учиргүй. Тэд газар шорооныхоо төлөө тэмцэгч, эх оронч, “баатар”-ууд байсан гэдгийг одоо хэн ч үгүйсгэхгүй биз ээ.

Түүн лугаа адил найрагч О.Дашбалбарын хэлсэнчлэн бидний цөөхөн монголчууд “Амьд даа бие биенээ хайрла”-х тэрхүү хүн ёсны зарчимд “хүнлэг” байх үрийг зон олныхоо сэтгэлд илүү ихээр тарьж, суулгах цаг болж.

Ц.Элбэгдорж Монгол Улсын Ерөнхийлөгчөөр 8 жил ажиллах даа 101 ажил хийсэн. Тэрээр хэрээр “сайн, муу” нэрийг их сонссон. Түүний хамгийн том ажил бол өнөөх алдарт АСЕМ байсан гэхэд буруутахгүй биз. Орон болгоны Удирдагч нар “АСЕМ”-ийг өөрийн улс даа зохион байгуулаад байдаг ч юм биш. Учир нь АСЕМ бол улс төрийн олимп юм. Тэр ирээдүйд ирэх янз бүрийн хардалт, дайралтыг үл ажран, Тусгаар тогтносон улсын Ерөнхийлөгч шиг эх оронч зориг гарган АСЕМ-ийг олон улсын өмнө нэр хүндтэйгээр, харц дээгүүр амжилттай хийж чадсан. Наанадаж Монгол Улс “АСЕМ”-ийн буянд Улаанбаатар Хотынхоо өнгө зүс, гудамж талбайгаа сайхан болгоод авсан. Төр, хувийн хэвшлийнхэн нэгтэн хамтдаа олон улсын нэр хүндтэй хурлаас их юм сурч авсан. Нөөцтэй болсон. “АСЕМ”-д зарлагдсан мөнгө төсөв нь Монгол Улсыг ирээдүйд даяаршиж байгаа ертөнцийн өмнө “Тусгаар Тогтнол” хувьд халдашгүй  байх, цаашлаад олон улсын эрхзүйд болоод санхүү эдийн засгийн хүрээнд баталгаатай байх тэрхүү зүйлд зориулагдсан төлбөр байсан гэж сэтгүүлчийнхээ хувьд хардаг.

Би нэг зүйлд их гайхах юм. Ц.Элбэгдоржийг “ХААН” байх үед нь гадаад, дотоодын төрийн өндөр ажил албан тушаал болон орон тооны ба орон тооны бус зөвлөхөөр нь ажиллаж байсан Ерөнхийлөгчийн хүрээний тэрхүү олон хүмүүсийн хэн нь ч өнөөдөр түүний талаар дахин дуугарахгүй, усанд хаясан чулуу шиг яагаад бүгд чимээгүй байна вэ? Тэр   ирж байгаа бүх галыг өөр дээрээ авч байна. Бидэнтэй адил хүн. Хэлэхгүй л байгаа болохоос биш. Сэтгэл санаа, эрүүл мэндийн хувьд тун амаргүй л байгаа.

Тухайн хүн рүү чиглэсэн нийгэм дэх тэр их хорсол, үзэн ядалтыг өнөөдөр улс төрчид санаатай, санамсаргүй байдлаар бий болгож байна. Иргэдийг талцуулж байгаа хүчин зүйл яалт ч үгүй улс төрийн намууд болой. Түүнийг нь сэвж хөөргөж, дамжуулж байгаа сэтгүүлч бид ч бас буруутай.

Гадна, дотнын явуулгад хэт авталгүй. Эв эеийг сахин ухаан зааж, монгол Монголоороо тэсэж үлдэх түүхэн сонголтын өмнө бид ирээд байна. Нийгмээрээ ганц хүнийг сугалан яллахаасаа илүүтэй, шүүхийн хийх ажлыг, шударга шүүхэд нь үлдээе. Тэр, гутлаа тослон, зангиагаа зүүн ирж яваа.

Өөлд Дархч овогт сэтгүүлч

Санжаадоржийн БАТГҮР

Мэдээ таалагдсан бол лайк дарна уу:

СЭТГЭГДЭЛ (4)

by 2020-03-10

Тэнэгт....

by 2020-03-10

Тэрээр өөрөө өөрийнхээ үйлдсэн үйлийнхээ үрийг эдэлж эхэлж байгаа юм.Чи бүү өмөөрч бялдуучил

by 2020-03-11

хөөрхий дөө Эби эрх мэдэлтэй байх даа энэ нөхрийг их л харж үзсэн болоод өрөө төлөх гэж хамгаалж бичиж байгам байх даа

by 2020-03-15

eu bolood hair zarlaad unaw..huzuugui hjlhaich uls oroniig yamar baidald hurgesniig harj bgaa bzdee..hairan eh oron mini an amitan gazariin bayalag 5 hoshuu maltaigaa suirch bna..onoson zuil baiwch aldaa ni bol mash ih ...irgediin bgaa baidsliig har l daa bayan yaduugaaraa zaaglagdaad ...denduu uruwdultei bolson tegj uran tsetsen yaridag shigee ulsaa arabiin emirat shig hugjuulehed yasiin..buhel buten 30 jil ungurch eu bolow..anh 90 ond bsnaasaa iluu dordson gej bi huwidaa uzej bna..ter uec buh zukl saihan bjee..yadaj humuudiin uhamsar ingetlee dordoogui..baigaliaraa eh oronii mini hurs ..oi modtoigoo gol murun nuur ni ...saihnaaraa..getel odoo har l daa..ter huzuugui nowsh gar hul bolson hdden durakuudtaigaa niileed eh oroniig mini eu eugui tsulmuj bna shdee..umuuruh hereg shaltgaan ogt bhgui duudaj awchraac hohirliig ni tulj duustalaa hamsaatanuudtain shorond uhuulbel taarna..gehdee ulsiin nuuts meddeg huniig gadaad ruu ingej chuluutei euwuulj bj boldogiinmuu..oilgohgui bna..

ШИНЭ МЭДЭЭ



Warning: fopen(/var/www/html/xac/ww.hardnews.mn/cache/e6dfa0c1e94a3ed6bb543aaa6219e236.html): failed to open stream: No such file or directory in /var/www/html/xac/ww.hardnews.mn/cache.php on line 27

Warning: fwrite() expects parameter 1 to be resource, boolean given in /var/www/html/xac/ww.hardnews.mn/cache.php on line 28

Warning: fclose() expects parameter 1 to be resource, boolean given in /var/www/html/xac/ww.hardnews.mn/cache.php on line 29