Зөвшилцөж баталсан ҮХНӨ-ийг зөрүү буруугүй мөрдөгтүн, сахигтун

15788922975e1bfc09c5796.jpg Зөвшилцөж баталсан ҮХНӨ-ийг зөрүү буруугүй мөрдөгтүн, сахигтун

Өнөөдөр 1992 оны Үндсэн хуулийн өдөр тохиож байна. 28 жилийн настай шинэ Үндсэн хуулиар бид ард түмэндээ үг хэлэх, үзэл бодлоо чөлөөтэй илэрхийлэх, хэвлэн нийтлэх, өмчтэй байх, шашин шүтэх эс шүтэх гээд хүний үндсэн эрх, эрх чөлөөг нь олгосон билээ.

Тэр ч утгаараа ардчилсан Үндсэн хууль шинэ нийгмийг цогцлоон байгуулах эрх зүйн цоо шинэ цогц хувьсгал болж чадсан юм.

Гэхдээ нийгмийн хөгжлийн явцад энэ Үндсэн хуульд илүү сайжруулах, дэлгэрүүлэн тодотгох шаардлагатай зүйл заалтууд байгаа нь тодорхой болсон. Ялангуяа 2000 оны дордуулсан 7 өөрчлөлтийг засахгүйгээр эрх зүйт төрийг бүрэн төлөвшүүлж чадахгүй гэдэг дээр үе үеийн парламентчид, хуульчид, эрдэмтэн судлаачид төдийгүй иргэд олон нийт санал нэгдэж 2008 оноос энэхүү үзэл санаа улам ч эрчээ авсан билээ. Гэхдээ Үндсэн хуульд нэмэлт, өөрчлөлт оруулах түүхэн тохироо хараахан бүрдэхгүй л байлаа.

Харин 2019 онд энэ парламентад Үндсэн хуулийн нэмэлт, өөрчлөлт хийх боломж бүрдэж, зөвшилцөх үйл явцад Ерөнхийлөгч болон парламент дахь цөөнх оролцсон.

Монгол Улсын Ерөнхийлөгч, Ерөнхий сайдын ахалсан Зөвшилцлийн Ажлын хэсэгт УИХ-ын ТББХ-ны дарга С.Бямбацогт нарийн бичгийн даргаар ажиллаж, ойлголтын зөрүүг арилгах, өмнө нь өргөн баригдаж байсан Үндсэн хуульд нэмэлт, өөрчлөлт оруулах төслүүдээс дэвшилтэт үзэл санааг нь өвлөн тусгах, төрийн тэргүүний болон Ардчилсан намаас дэвшүүлсэн саналыг нэгтгэн тусгах ажлыг амжилттай хийж, улмаар УИХ 2019-оны 11-р сарын 14-нд Монгол Улсын Үндсэн хуулийн нэмэлт, өөрчлөлтийг баталж, 2019-оны 11-р сарын 16-нд Ерөнхийлөгч ёсчилсон түүхтэй. 

Хамгийн гол нь Үндсэн хуулийн нэмэлт, өөрчлөлтөөр 2000 оны дордуулсан 7 өөрчлөлтийг засаж чадсан нь олзуурхууштай. Түүний зэрэгцээ Ерөнхийлөгчийн саналд туссан тусгаар тогтнолын асуудлаар хэзээ ч ард нийтийн санал асуулга явуулахгүй байх заалтыг дэмжиж Үндсэн хуулийн өөрчлөлтөөр улсынхаа бүрэн эрхт байдлыг улам бататгасан юм. Мөн Урт хугацааы Хөгжлийн бодлогыг заавал хэрэгжүүлдэг, залгамж халаатай байх асуудлыг ч энэ нэмэлт, өөрчлөлтөөр хуульчилсан.

Мөн УИХ-ын төсвийн зардал өсгөж, өр нэмдэг үрэлгэн эрх мэдлийг хязгаарлаж, гишүүд Засгийн газрын гишүүдийн томилгоонд дураараа оролцдог дур зоргыг хазаарлаж өгсөн. Ингэснээр Засгийн газрын тогтвортой байдлыг хангаж, танхимын зарчмаар ажиллах, Засгийн газрын гишүүдээ Ерөнхий сайд өөрөө томилж, чөлөөлж, огцруулах эрх мэдлийг нь гүйцэтгэх засаглалын тэргүүнд олгож, эрх үүргийг нь эн тэнцүү өгсөн билээ.

Тэрчлэн байгалийн баялгийг ард түмнээсээ асууж байж ашиглах эсэхээ шийдвэрлэх, үр өгөөжийг нь иргэдэд тэгш хүртээх, орон нутагт өмчийн болон эдийн засгийн зарим эрх мэдлийг олгох, Дархан Эрдэнэтийг улсын зэрэглэлтэй хот болгох, аймгийн төвүүд орон нутгийн зэрэглэлтэй хот болон хөгжих эрх зүйн үндсийг тавьж чадсан нь энэ Үндсэн хуулийн нэмэлт ,өөрчлөлтийн гол амин сүнс нь байлаа.

Түүнчлэн Засгийн газрын гишүүдийн “Давхар дээл”-ийг нимгэлж,  улс төрийн авлигын үүр уурхай болсон намуудын санхүүжилтийг ил болгож, хоосон шүүмжилдэг, нийгмийг өдөөн турхирдаг биш ажил хэрэгч, бодлогын намуудтай болох эх үндсийг тавьсан билээ.

Үндсэн хуулийн энэ нэмэлт, өөрчлөлт энэ оны 5-р сарын 25-ны өдрийн 12,00 цагаас хүчин төгөлдөр хэрэгжиж эхэлнэ. Үндэсний зөвшилцөл, өндөр ойлголцлын хүрээнд баталсан Үндсэн хуулийн нэмэлт, өөрчлөлтөө одоо харин хийдэлгүй хэрэгжүүлэх, бүх нийтээрээ хэлбэрэлтгүй мөрдөн сахих хамгаас чухал.

Хөгжлийн шинэ үеийн хөтөч, хүчирхэг Монголын ирээдүйг дөтлөх эцэг хууль  болсон Монгол Улсын Үндсэн хуулийн нэмэлт, өөрчлөлтөө даяар олноороо Мөрдөгтүн, Сахигтун.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ



Warning: fopen(/var/www/html/xac/ww.hardnews.mn/cache/7260b897d9435f3c8b9adad2ed3182cf.html): failed to open stream: No such file or directory in /var/www/html/xac/ww.hardnews.mn/cache.php on line 27

Warning: fwrite() expects parameter 1 to be resource, boolean given in /var/www/html/xac/ww.hardnews.mn/cache.php on line 28

Warning: fclose() expects parameter 1 to be resource, boolean given in /var/www/html/xac/ww.hardnews.mn/cache.php on line 29