СЭТГҮҮЛЧДИЙГ ТАГНАЖ, ЧАГНАСАН АСУУДЛАА ТОДОРХОЙ ТАЙЛБАРЛАНА УУ Ц.НЯМДОРЖ САЙД АА!

73482664_2495886410683693_272019421524918272_n.jpg СЭТГҮҮЛЧДИЙГ ТАГНАЖ, ЧАГНАСАН АСУУДЛАА ТОДОРХОЙ ТАЙЛБАРЛАНА УУ Ц.НЯМДОРЖ САЙД АА!

УИХ-ын гишүүн Х.Нямбаатар сэтгүүлчидтэй холбоотой маш ноцтой нэгэн мэдээллийг өчигдөр дуулгасан. 

Тэрбээр “Нэр бүхий найман сэтгүүлчийг цагдаагийн байгууллагаас нууцаар тагнаж, чагнасан асуудал гарсан байна. Би Хууль зүйн байнгын хорооны даргын хувьд сэтгүүлчдийг шалгасан эсэх асуудлаар дэлгэрэнгүй мэдээлэл өгөхийг Тагнуулын ерөнхий газарт албан бичгээр хандсан. Өнгөрсөн долоо хоногт уг бичгийн хариу ирж, нууцын зэрэглэлтэй шалгаж байгаа гэсэн хариу ирүүлсэн. Хэрэв сэтгүүлч, хэвлэл мэдээллийн байгууллагыг нууцаар шалгаж эхэлсэн бол энэ маш ноцтой асуудал” гэж мэдэгдсэн юм.

Тэгвэл сэтгүүлчдийг нууцын зэрэглэлтэй тагнаж, чагнаж шалгаж байгаа гэх асуудал хэн гэдэг улс төрч, албан тушаалтны захиалга болохыг хэвлэл мэдээллийнхэн дор бүрдээ хэлэлцэн шуугиж байна. Түүнчлэн сэтгүүлчдийг тагнаж, чагнах, шалгах үүрэг өгсөн  хүн ХЗДХ-ийн сайд Ц.Нямдорж гэдгийг ч ихэнх хэвлэлүүд жил гаруй хугацаанд дурдаад эхэлжээ.

Тус хэргийг сануулбал, одоогоос 18 сарын өмнө сайд Ц.Нямдоржийн захиалгаар нэр бүхий сэтгүүлчдийг гэр бүлийн хүмүүсийнх нь хамт тагнаж, чагнасан гэх асуудал босч байлаа. Тухайн үед хэвлэлүүдээр гарсан мэдээлэлд “Ц.Нямдорж сайд болмогцоо ЦЕГ болон ЭЦА-ны удирдлагад үүрэг өгч нэр бүхий есөн сэтгүүлч тэдний ар гэрийн 30 хүний мэдээллийг хууль бусаар олж аван тагнасан түүгээр ч зогсохгүй нэгнийх нь автомашин руу буудаж айлган сүрдүүлсэн” тухай бичиж байлаа. Тэрчлэн нэгэн сэтгүүлч эмэгтэйд архи өгч согтоогоод гүйцэтгэх ажиллагаа явуулсан гэж зарим эх сурвалжууд онцолж байсан юм.

Энэ асуудлаар тухайн үед сайд Ц.Нямдорж хариу мэдэгдэл хүртэл хийж байлаа. Тэрбээр, “Би ямар ч сэтгүүлчийг тагнаж чагнах үүрэг өгөөгүй. Есөн сэтгүүлчийг тагнаж, чагнасан л гэнэ. Нэг сэтгүүлчийн машины дугуйг буудсан л гэнэ. Та нар намайг тагнадаг болохоос би сэтгүүлчдийг тагнаж байсан тохиолдол миний амьдралд байхгүй. Ер нь “Эрдэнэт” үйлдвэрийн 49 хувьтай холбоотой асуудлыг гаргаж тавьснаас хойш намайг гүтгэх явдал хэрээс хэтэрсэн. Мөнхтөр гэдэг өмгөөлөгч өчигдөр надтай орж ирж уулзсан. Би Мөнхтөр гэж нэр зааж юу ч яриагүй. Ер нь бол нэг бүрээр нь айлган сүрдүүлэх, дарамтлах улс төрийн зорилготой асуудал явж байна” гэж мэдэгдсэн байдаг.

Гэтэл тухайн үед болоод өнгөрсөн гэх тагнаж, чагнах асуудал одоо ч үргэлжилж байгаа гэдгийг ТЕГ-аас Хууль зүйн байнгын хороонд ирүүлсэн бичигтээ дурдсаныг Хууль зүйн байнгын хорооны дарга Х.Нямбаатар онцоллоо. Тэгэхээр сайд Ц.Нямдоржийн өмнөх өөрийгөө өмөөрсөн тайлбар худал болж таарч байгаа юм.

Тиймээс ХЗДХ-ийн сайд Ц.Нямдорж, ЦЕГ-ын дарга С.Баатаржав, ТЕГ-ын дарга Б.Гэрэл нараас хуулийн байгууллагаас сэтгүүлчийг тагнаж чагнасан асуудлаар албан ёсны тайлбар өгөх, тагнаж чагнасан сэтгүүлчдийн нэрсийг ил болгох, ямар гүйцэтгэх ажлыг ямар хуулийн дагуу хийсэн талаар олон нийтэд нээлттэй мэдээлэл хийхийг хатуу шаардъя.

А.ТАМИР

АРДЧИЛАЛ.МН

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ