ЦЕГ-ЫН “ХЭВЛЭЛ МЭДЭЭЛЛИЙН ТӨВ”-ИЙН АЖИЛТНУУД ҮНЭН МЭДЭЭЛЛИЙГ “ХУДАЛ МЭДЭЭЛЭЛ” БОЛГООД ДАДЧИХСАН ЮМ БИШ БАЙГАА ДАА

556615zzzzzzzzzzzzzzzzz63_711534405916151_7310938827839766528_n.jpg ЦЕГ-ЫН “ХЭВЛЭЛ МЭДЭЭЛЛИЙН ТӨВ”-ИЙН АЖИЛТНУУД ҮНЭН МЭДЭЭЛЛИЙГ “ХУДАЛ МЭДЭЭЛЭЛ” БОЛГООД ДАДЧИХСАН ЮМ БИШ БАЙГАА ДАА

2019 оны 10-р сарын 25-нд 19:31 минутад Гэмтэл согог судлалын үндэсний төвд пийшин дэлбэрснээс үүдэж түлэгдсэн гэж 8 настай хүү С, аав Л-ын хамт хүргэгдсэн. Хүүгийн биеийн байдал хүнд гуравдугаар зэргийн түлэгдэлтэй ГССҮТ-ийн Түлэнхий нөхөн сэргээх мэс заслын тасагт хэвтэн эмчлүүлж байгаа бөгөөд түүний ээж нь сахиж байгаа. Харин хүүгийн аав Л-ын биеийн байдал хүнд гэсэн оноштойгоор тус эмнэлэгт хэвтэж байгаа талаар өнгөрсөн амралтын өдрүүдэд сэтгүүлч Н.Өнөрцэцэг дурдсан.

Гэвч эх сурвалжийн мэдээлсэн дээрх мэдээллийг ЦЕГ-ын "Хэвлэл мэдээллийн Төв"-ийнхөн үгүйсгэж, албан ёсны цахим хуудсаараа дамжуулан "цагдаагийн байгууллагад ийм дуудлага бүртгэгдээгүй" гэж мэдэгдэн “худал мэдээлэл” гэх улаан  дардас дарж цацсан юм. Энэхүү мэдээлэл цацагдсан даруйд иргэд галд түлэгдсэн гэх аав, хүү хоёрын мэдээллийг түгээсэн сэтгүүлчийг элдвээр харааж, зүхэж, амралтын өдрүүдээр аль нь чухам үнэн мэдээлэл гэдгийг мэдэхгүй талцаж өнгөрүүлсэн гэхэд болно.

No photo description available.

Цагдаагийн байгууллагаас нэгэнт дээрх мэдээллийг “худал” гэсэн тул тус мэдээллийг түгээсэн сэтгүүлчийг сошиал сүлжээнд бараг тастан хаях шахав. Иргэд энэ удаад сэтгүүлчид итгэлгүй цагдаагийн байгууллагад гүн итгэжээ. Тиймээс л сэтгүүлчийг харааж зүхсэн сэтгэгдлээр булж өглөө. Харин энэ бүхний хариуд сэтгүүлч “түгээсэн мэдээллээ би нотолно” гэдэг хариултыг өгөөд байлаа.

Тэгвэл “түлэгдсэн 9 настай хүү С, аав Л-ын хамт ГССҮТ-д хүргэгдсэн” гэх мэдээллийг анх олон нийтэд мэдээлсэн сэтгүүлч Н.Өнөрцэцэг өөрийн түгээсэн мэдээллээ нотолж эхэлжээ.

Тодруулбал, ГССҮТ-д хэвтэн эмчлүүлж буй хүүгийн ээжтэй уулзахад ойр дотнын хүмүүсийн биеийн байдал хүнд байгаа учир мэдээлэл өгөхөөс татгалзжээ. Түүнчлэн хүүгийн хэвтэж буй тасгийн жижүүр эмч н.Мөнхбаяраас түүний биеийн байдлыг тодруулахад, хүүгийн биеийн байдал хүнд байгаа, албан ёсны мэдээлэл авах хүсэлтээ ажлын өдөр гаргасны дараа мэдээлэл өгөх боломжтой гэх хариултыг өгчээ.

Мөн Гэмтэл согог судлалын үндэсний төвд хүргэгдэн ирж буй бүх иргэдийн мэдээлэл нь цагдаагийн албан хаагчдын дэвтэрт заавал үлддэг байна. Энэ талаар Цагдаагийн ахмад Б.Ганзориг 2019 оны 10-р сарын 25-ны 19:31 минутад пийшин дэлбэрсэн гэх шалтгаанаар түлэгдсэн хоёр иргэн журналд бүртгэгдсэнийг хэлжээ.

Харин Цагдаагийн ерөнхий газрын албан ёсны эх сурважлийн мэдээлснээр, “Баасан гаригт гал гарсан гэх дуудлага, мэдээлэл цагдаагийн байгууллагад ирсэн. Мэдээллийн дагуу Чингэлтэй дүүргийн цагдаагийн хэлтэс ажилласан. Одоогоор  шалгалтын ажиллагаа үргэлжилж байна” гэжээ.

Харин өнөөдөр /2019.10.28/ түлэгдсэн гэх 8 настай хүү С, аав Л-ын хамт эмнэлэгт хүргэгдсэн” гэх мэдээллийг “худал мэдээлэл” хэмээн мэдэгдсэн ЦЕГ-ын "Хэвлэл мэдээллийн төв"-ийнхөн цахим хуудаснаа мэдэгдсэн “худал мэдээлэл” гэх мэдэгдлээ устгачихжээ.

Энэ бүхнээс харахад сэтгүүлч биш ЦЕГ өөрөө зохион байгуулалттайгаар “хуурамч мэдээлэл” тараасан болох нь тодорхой харагдаж байна. Учир нь тэд “хуурамч” хэмээн улаан дардас дарсан мэдэгдлээ хоногийн дотор албаны хуудсаасаа арилгаж, устгаж амжжээ.

Тэгвэл ЦЕГ хийгээд Хэвлэл мэдээллийн төвийнхөн нь юунд дээрх хэргийг нууцалж, яаран сандран “худал мэдээлэл” гэх улаан дардастай мэдэгдлийг цахимд мэдэгдэв ээ. Арай ЦЕГ-ынхан үнэн мэдээллийг “хуурамч мэдээлэл” болгоод дадчихсан юм биш байгаа даа...

А.ТАМИР

АРДЧИЛАЛ.МН

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ