ИРЭХ САРЫН 4-НД ШАХМАЛ ТҮЛШНИЙ АСУУДЛААР ЕРӨНХИЙ ХЯНАЛТЫН СОНСГОЛ ХИЙХЭЭР ТОВЛОЛОО

4b6d17_5da5495eedd559_88552235_x974.jpg ИРЭХ САРЫН 4-НД ШАХМАЛ ТҮЛШНИЙ АСУУДЛААР ЕРӨНХИЙ ХЯНАЛТЫН СОНСГОЛ ХИЙХЭЭР ТОВЛОЛОО

Нийслэлийн ИТХ-ын Тэргүүлчдийн ээлжит хуралдаан болж, Ерөнхий хяналтын сонсгол болон нийслэлийн ИТХ-ын Хүндэтгэлийн хуралдаан зохион байгуулах тухай асуудлыг хэлэлцэн, товлолоо.

Нийслэлийн ИТХ-ын нэр бүхий 12 төлөөлөгч өнгөрсөн долоо хоногт Засгийн газрын 62 дугаар тогтоолыг хэрэгжүүлэх хүрээнд зохион байгуулж буй арга хэмжээ, гарч буй хүндрэл бэрхшээл, тэр дундаа сайжруулсан шахмал түлштэй холбоотой асуудлыг холбогдох албаныхан, мэргэжлийн хүмүүс болон олон нийтийн дунд нээлттэй хэлэлцүүлэхээр Ерөнхий хяналтын сонсгол явуулах хүсэлт гаргасан байдаг. Иймээс нийслэлийн ИТХ-ын Ажлын албанаас холбогдох хуулиудын дагуу Ерөнхий хяналтын сонсголыг ирэх сарын 4-нд зохион байгуулахаар тов төлөвлөжээ.

Хэлэлцэж буй асуудалтай холбогдуулан нийслэлийн ИТХ-ын Тэргүүлэгч бөгөөд нийслэлийн Засаг даргын орлогч Ж.Батбаясгалан “Бид сайжруулсан шахмал түлшийг анх удаа хэрэглэж байна. Нийслэлийн ИТХ-аас Ерөнхий хяналтын сонсголыг ч анх удаа зохион байгуулах гэж байгаа. Тиймээс хуулийн хүрээнд сонсголыг зохион байгуулах нь зүйтэй. Ингэхдээ мэргэжлийн байгууллага болон олон нийтийн оролцоог хангахад анхаарах хэрэгтэй” гэсэн юм.

Тэргүүлэгч Б.Бямбадорж “Ерөнхий хяналтын сонсгол зохион байгуулах хугацааг олон нийтэд сайн түгээх хэрэгтэй” гээд арваннэгдүгээр сарын 4-нд зохион байгуулахыг дэмжлээ. Тэргүүлэгчид уг асуудлыг хэлэлцээд Ерөнхий хяналтын сонсголыг ирэх сарын 4-нд зохион байгуулахаар товлолоо. Улмаар Ерөнхий хяналтын сонсголыг нийслэлийн ИТХ-ын дарга Р.Дагваар даргалуулахаар тогтов.

Нийслэлийн ИТХ-ын Хүндэтгэлийн хуралдааныг энэ сарын 29-нд болно

Мөн нийслэлийн ИТХ-ын Тэргүүлэгчдийн өнөөдрийн хуралдаанаар нийслэлийн ИТХ-ын Хүндэтгэлийн хуралдааныг энэ сарын 29-нд хуралдуулахаар товлов.

Улаанбаатар хот үүсэн байгуулагдсаны 380 жилийн ойд зориулсан Хүндэтгэлийн хуралд нийслэлийн үе үеийн удирдлага, олон улсын байгууллагын төлөөллүүд оролцоно.

 


Эх сурвалж: Нийслэлийн ИТХ-ын ХМОНХТ

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ