Д.АМАРБАЯСГАЛАН: АН-ТАЙ ЗӨВШИЛЦӨХӨӨС ЦААШДЫН НӨХЦӨЛ БАЙДАЛ ТОДОРХОЙ БОЛНО

viber_image_1862638344.jpg Д.АМАРБАЯСГАЛАН: АН-ТАЙ ЗӨВШИЛЦӨХӨӨС ЦААШДЫН НӨХЦӨЛ БАЙДАЛ ТОДОРХОЙ БОЛНО

МАН-ын бүлгийн өнөөдрийн хуралдаанд МАН-ын Ерөнхий нарийн бичгийн дарга Д.Амарбаясгалан оролцож УИХ-ыг тараах болон ээлжит бус сонгуулийн асуудлаар байр, сууриа илэрхийлжээ. Энэ талаар түүнээс зарим асуултад хариулт авлаа.

-УИХ-ыг тарааж, ээлжит бус сонгууль явуулах ажлыг та гардан зохион байгуулсан. Энэ асуудал хэрхэн шийдэгдэж байна вэ?

-УИХ-ын нэр бүхий гишүүдээс УИХ-ыг тараах саналыг гаргасан. Нэр усыг нь хэлээд яахав. УИХ-ын гишүүдээс гарсан саналыг бид авч хэлэлцэхгүй байж болохгүй.

УИХ-ын 51 гишүүн УИХ-ыг тараахыг дэмжсэн тохиолдолд татвар төлөгчдийн мөнгийг хэмнэх үүднээс 2020 оны зургадугаар сард болох сонгуулийг арваннэгдүгээр сард болох ард нийтийн санал асуулгатай хамтатган яагаад явуулж болохгүй гэж бодсон.

Ингээд намын удирдах зөвлөл энэ асуудлаар УИХ-ын гишүүдийн байр, суурийг сонсох үүднээс асуудалд хандсан. Гэвч хуулийнхаа дагуу 51 гишүүний гарын үсэг бүрдэх боломж, бололцоо хомс байсан. Монгол улсад парламентын дархлаа харьцангуй өндөр байдаг. Тийм учраас үүнийг өргөн хүрээнд яриагүй. Анхан шатанд нь саналыг нь сонссон. Тодорхой хүрээнд санал солилцсон.

-Тэгэхээр энэ асуудлыг бүр орхисон гэсэн үг үү?

-Уг асуудлыг ярилгүй удаж байна. Анх намын дарга, Ерөнхий нарийн бичгийн дарга, Ерөнхий сайд, сайдаар ажиллаж байсан хүмүүсийн хүрээнд ярьж, саналыг нь сонссон. Ингээд гишүүдийн саналыг сонсоход дэмжээгүй. 

-Ард нийтийн санал асуулга явуулах тогтоолд тавьсан Ерөнхийлөгчийн хоригийг МАН-ын бүлэг хүлээж авах уу ?

-Ерөнхийлөгчийн хоригийг хүлээж авах эсэхийг энэ долоо хоногт шийдвэрлэхээр болсон. АН-тай зөвшилцөнө. Ер нь судалгаагаар ард нийтийн санал асуулгыг явуулах нь зүйтэй гэж иргэд үзсэн шүү дээ. Манай намын байр, суурь үүнтэй адил байна. АН-тай зөвшилцөхөөс цаашдын нөхцөл байдал тодорхой болно. 

-“Эрдэнэт” үйлдвэрийн захирал Х.Бадамсүрэнг ажлаас нь чөлөөлж, МАН-ын нарийн бичгийн дарга Ц.Бат-Энхийг томилохоор бэлтгэж байгаа гэх мэдээлэл байна. Энэ үнэн үү?

-Ор үндэсгүй мэдээллийг зохион байгуулалттай явуулж байна.

-2016 оны сонгуулийн дараа МАН-ын гишүүн Н.Энхбаатар гэх залууг МИАТ-ын дэд захиралд томилуулахыг хүссэн таны гарын үсэгтэй албан бичиг олон нийтэд ил боллоо. Үүнийг үнэн гэдгийг УИХ-ын гишүүн Б.Бат-Эрдэнэ хүлээн зөвшөөрсөн?

-УИХ-ын гишүүд өөрсдийн тойрогт ажилласан төр, намын ажлын дадлага туршлагатай хүмүүсийг ажилд томилуулахаар санал болгодог.

Энэ үүднээс ганц нэг бичиг ийш, тийшээ явж байсан. Түүний л нэг асуудал. УИХ-ын гишүүдээс дэмжихийг хүссэн бичиг ирдгийг би уламжилж өгөх үүрэгтэй. Намын дүрмээр боловсон хүчний бодлогыг удирдах зөвлөл шийдвэрлэдэг.

Парламентын улс орны онцлог ийм л тогтолцоогоор явдаг. Түүнээс хэн нэгэн дарга албан тушаалд очингуутаа өөрийн дураар, үзэмжээр томилгоо хийх, тус байгууллагыг тогтворгүй болгох шийдвэрийг ганцаараа гардаггүй. Ийм бололцоо ч ховор байдаг. Түүнээс уг асуудлаар хууль зөрчсөн, өөртөө давуу байдал үүсгэсэн зүйлгүй. Намын удирдах зөвлөл ярилцаж байж шийдвэр гаргадаг.

-Энэ байдлаар намаас хэдэн хүнийг албан тушаалд томилсон бэ?

-Тийм олон хүн томилоогүй. 2016 оны сонгуулийн дараа хэдэн хүн албан тушаалд томилогдсон.

-Энэ үйлдэл тань хуульд хэр нийцэх вэ?

-Хууль биш намын дүрмийнхээ дагуу тодорхой асуудлыг УИХ-ын гишүүд намынхаа Удирдах зөвлөлд тавьдаг. Үүний дагуу шийдвэрлэсэн. Намын дүрмийг дээд шүүх баталдаг биз дээ.

-Н.Энхбаатарын томилгоо “60 тэрбум”-ын схем хэрэгжсэн гэсэн үг биз дээ?

-Хамаагүй. Огтоос тийм зүйл байхгүй.

-Ц.Сандуй телевизийн нэвтрүүлэгт орохдоо таны нэрийг хэдэнтээ дурдсан. Та үүнд ямар тайлбар хийх вэ?

-Би тайлбар өгөхгүй. Алдаа гаргасан бол алдаагаа үүрээд явах ёстой. Тэр хүн ярина л биз. 

ЭХ СУРВАЛЖ: ISEE.MN

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ