ХИЧЭЭЛИЙН ЖИЖИГ ХЭРЭГЛЭЛИЙН ҮНЭ 20-300 ТӨГРӨГӨӨР НЭМЭГДЖЭЭ

69088536_466990820521757_4672306475333320704_n.jpg ХИЧЭЭЛИЙН ЖИЖИГ ХЭРЭГЛЭЛИЙН ҮНЭ 20-300 ТӨГРӨГӨӨР НЭМЭГДЖЭЭ

2019-2020 оны хичээлийн шинэ жил эхлэхэд арваадхан хоног үлджээ. Хотын хөл хөдөлгөөн нэмэгдэж, зах худалдааны төвүүдийн ачаалал ихэссэн байна. Түүнчлэн хотын хэдэн хэдэн газарт хичээлийн шинэ жилд зориулсан үзэсгэлэн худалдаа гарсан талаар бид мэдээлсэн.  Хичээлийн хэрэгслийн үнэ ханшийг сурвалжлахаар бид Нарантуул олон улсын худалдааны төв болон Дүнжингарав худалдааны төвийг зорилоо. 16:00 цагийн үед Дүнжингарав худалдааны төвд хүрэв. Уг худалдааны төв нь даваа гарагт амардаг хуваарьтай боловч хичээл эхлэх гэж буйтай холбогдуулан амралгүй ажиллаж байгаа гэдгийг худалдаачид хэлсэн юм. Биднийг очих үеэр уг худалдааны төвд хүүхдээ дагуулан хичээлд нь бэлдэх эцэг эхчүүд цөөнгүй байлаа. Мөн энд хичээлийн шинэ жилийн үзэсгэлэн худалдаа өнгөрсөн долоо хоногоос эхлэн гарчээ. Хичээл эхлэх дөхсөн ч олны хөдөлгөөн харьцангуй бага байна гэдгийг худалдаачид онцолсон юм.

Энэ талаар худалдаа эрхлэгч С.Алтанчимэг: “Би жил бүр Дүнжингарав төвийн хичээлийн шинэ жилийн үзэсгэлэн худалдаанд оролцдог. Энэ жил үзэсгэлэн худалдаа арай оройтож эхэлж байна. Хүмүүсийн худалдан авах чадвар ч буурсан санагдаж байна. Эхний ээлжид чухал хэрэгтэй гэсэн зүйлээ худалдаж аваад үлдсэн юмыг нь дараа авна гэх хүмүүс олон болсон байна. Хүүхдийнхээ хичээлийн хэрэглэлийг бөөндөөд авчихдаг хүмүүс ховор болжээ. Өмнө жилүүдэд хүмүүс  хичээлийн хэрэглэлээ бөөнд нь авчихдаг байсан бол одоо формыг нь дараа авна гэх хүмүүс нэлээдгүй ажиглагдлаа. Энэ жил юань өссөнтэй холбоотой барааны үнэ бага зэрэг нэмэгдсэн. Дэвтэр ноднин жил 130төгрөгөөр зарагдаж байсан бол 150 төгрөг болсон. Гэхдээ жижиг бараан дээр үнэ нь нэг их нэмэгддэггүй 20-100 төгрөгийн хооронд нэмэгддэг. Харин Монгол үйлдвэрийн дэвтрийн үнэ энэ жил бага зэрэг нэмэгдсэн. Тухайлбал бид өмнө жил Улаанбаатар принтерийн боодол дэвтрийг 65-70 мянган төгрөгөөр авдаг байсан бол энэ жил 90 мянга болж нэмэгдэж ирсэн. Уг нь Монголд үйлдвэрлэж байгаа гэдэг утгаараа үндэсний үйлдвэрийн дэвтрийн үнэ бага байвал зүгээр санагддаг. Гэхдээ хямдыг нь хараад урдаас ирж байгаа дэвтрийг авах нь их байна. Бага ангийн хүүхдүүд бол дэвтрийнхээ зургийг харж авах нь их байдаг. Одоогоор худалдан авалт нэг их ихсээгүй байна. Сүүлийн дөрөв хоногт ачаалал нэмэгддэг гэлээ.

Дүнжингарав худалдааны төвд дэвтэр 250-1600, зургийн дэвтэр, 600-3500, үзгэн бал 200-1500, харандаа 300-800, баллуур 200-2500, өнгийн цаас 500-3000, пинал 1000-20000 цаасны цавуу 400-2500 төгрөгийн үнэтэй байна.

ДҮНЖИНГАРАВ ХУДАЛДААНЫ ТӨВД ХҮҮХДИЙН ЦҮНХ 20-120 МЯНГАН ТӨГРӨГИЙН ҮНЭТЭЙ БАЙНА

Цааш цүнхний үнийг лавлахаар цүнх худалдаалж буй хэсэгт хүрсэн юм. Энэ үеэр гурван хүүхдийнхээ хичээлийн хэрэглэлийг бэлтгэж буй Б.Эрдэнэчимэгтэй таарлаа. Түүнээс хүүхдийн хичээлийнх нь бэлтгэл хангагдсан талаар асуусан юм.

Тэрбээр хэлэхдээ “Гурван хүүхдийн хичээлийн хэрэглэлийг бэлдэх гээд өнөөдөр Дүнжингарав дээр ирлээ. Энэ жил гурав болоод нэмэгдсэн. Анх удаа эндээс худалдан авалт хийж явна. Яг одоо хүүхдийнхээ цүнхийг сонгоод явж байна. Энд материал хийцээсээ шалтгаалан янз бүрийн үнэтэй байна. Нэгдүгээр ангийн хүүхдэдээ 100 мянган төгрөгөөр цүнх авлаа. Арай олон жил үүрэх болов уу гэж бодож чанартайгаас нь сонгодог. Олон хүүхдийн юм авдаг болохоор аль болох эртхэн бэлтгэхийг хичээдэг. Сургуулийн хүүхдүүд  форм, биеийн тамирын хувцсаа сонгочихвол бусад нь гайгүй шүү дээ. Цэцэрлэгийн хүүхдээс л бага мөнгө зарцуулж байгаа санагддаг. Одоо би хүүхдийнхээ формыг авна. “Шилмэл загвар”-ын форм авдаг. Энэ удаад ч гэсэн тэндээс авахаар явна. Энэ жил үнэ нь гайгүй нэмэгдээгүй байх шиг байна. Гэхдээ жил болгон авахгүй болохоор бас үнийг нь мартчихаад л байна” гэлээ. 

Мөн энэ үеэр цүнхний худалдаа эрхэлж буй эмэгтэйгээс үнийн мэдээлэл авлаа. Тэрбээр нэрээ хэлэхээсээ татгалзсан юм. “Манайд хүүхдийн хичээлийн цүнх 25-100 мянган төгрөгийн үнэтэй худалдаалагдаж байна. Энэ жил цүнхний үнэ нэг их нэмэгдээгүй . Гэхдээ олон шинэ загварын цүнхнүүд ирсэн. Манайд худалдаалагдаж байгаа цүнхнүүд  дундаж үнэтэй байна. Бид бараагаа Гуанжугаас оруулж ирдэг. Энэ жил худалдан авах чадвар сайнгүй байна. Эцэг эхчүүдийн хувьд угааж ардчилахад хялбар цүнх хайх нь элбэг байна. Хүүхдүүд бол загвар хэлбэр дүрсийг нь хардаг”.

СУРАГЧИЙН ДҮРЭМТ ХУВЦАС 45-153 МЯНГАН ТӨГРӨГИЙН ҮНЭТЭЙ БАЙНА

Дүнжингарав худалдааны төвөөс гарч Нарантуул худалдааны төв рүү орсон юм. Цаг орой болж байсан ч энд хөл хөдөлгөөн ихтэй байлаа. Захын  баруун урд хэсгээс эхлээд хичээлийн бичиг хэрэглэл, сурагчийн дүрэмт хувцас дэлгээтэй. Хүүхдүүдээ дагуулсан эцэг эхчүүд хичээлийн хэрэглэлийн үнэ асууж, худалдагч нар чөлөө завгүй ажиллана. Нарантуул худалдааны төвийн урд хэсгээр зарагдах цэнхэр сорочок болон дүрэмт хувцасны үнэ хямд байлаа. Учир нь энд ихэвчлэн урд хөршөөс оруулж ирсэн бараа зарагдаж байна. Энд бага ангийн хөвгүүдийн дүрэмт хувцасны дөрвөн хос 40 мянган төгрөг, охидын гурван хос 30 мянган төгрөг, дунд ангийн хөвгүүдийнх 50 мянган төгрөг, охидынх 45 мянган төгрөг, ахлах ангийн хөвгүүдийнх 50 мянган төгрөг, охидынх 60 мянган төгрөг байна. Мөн цэнхэр сорочкон цамц тод цэнхэр нь 15 мянга, бүдэг цэнхэр нь 10 мянган төгрөгийн үнэтэй байв.

Харин “Баялаг Ундраа” худалдааны төвд Монгол үйлдвэрийн дүрэмт хувцасны үзэсгэлэн гарчээ. Тус төвийн хоёр давхрын хойд хэсэгт “Өүлэн менч”, “Шилмэл загвар” зэрэг компаниудын дүрэмт хувцас байгаа бол урд хэсгээр БНХАУ-аас оруулж ирсэн дүрэмт хувцаснууд худалдаалагдаж байна.  “Өүлэн менч” үйлдвэрийн бага ангийн охидын гурван хос 70 мянган төгрөг, хөвгүүдийн дөрвөн хос 91 мянган төгрөгөөр байна.  Харин дунд ангийн охидын гурван хос 107 мянган төгрөг бол хөвгүүдийнх 113 мянган төгрөгөөр худалдаалагдаж байна. Ахлах ангийн охидынх 128 мянган төгрөг бол хөвгүүдийнх 153 мянган төгрөгийн үнэтэй байна.

“Шилмэл загвар” компанийн дүрэмт хувцасны бага ангийн эрэгтэй  хүүхдийн  гурван хос дүрэмт хувцас 91 мянга бол охидынх 70 мянга, дунд ангийн эрэгтэй гурван хос 115 мянга, охидынх 111 мянган төгрөгний үнэтэй байна. Харин ахлах ангийн эрэгтэй дүрэмт хувцас 153 мянга бол охидынх 138 мянгаар худалдаалагдаж байна. Мөн энэ үеэр бид “Төвшин орших” ХХК-ийн дүрэмт хувцасны үнийг худалдагчаас тодруулсан юм.

“Төвшин орших” ХХК-ын худалдагч Д.Батжавхлан “Манайд бага ангийн хүүхдүүдийн сарафан 45-75 мянган төгрөгийн үнэтэй, зангиа 3000 төгрөг, цэнхэр цамц 14-20 мянган төгрөг, пиджак 55 мянга, ахлах ангийн хүүхдийн дүрэмт хувцас 45-75 мянган төгрөгийн үнэтэй байна. Манай дүрэмт хувцаснууд бөөсрөхгүй хирээс сайтай гэдгээрээ давуу талтай” гэв.

Бичиг хэрэгслийн үнэ ханшны тухайд Нарантуул худалдааны төвд үнийн зөрүүтэй, Дүнжингарав худалдааны төвөөс 20-100 төгрөгийн  хямд байлаа. Тухайлбал дэвтэр 150-900 төгрөг, зургийн дэвтэр 600-2500 төгрөг, үзгэн бал 500- 5000, харандаа 150-2300 төгрөгийн үнэтэй байна. Бичиг хэргийн худалдаа хийж буй худалдагчид зүгээс хичээлийн жижиг хэрэгслийн үнэ 20-300 төгрөгөөр нэмэгдсэн гэлээ. БНХАУ-д үнэ тогтвортой өмнө жилийн үнэтэй ижил байгаа манайд юань үнэ өссөн тул арай үнэтэй байгаа гэдгийг энэ үеэр хэлж байсан юм.

Нарантуул худалдааны төвд хөдөө орон нутгаас ирж хүүхдийн хичээлийнхээ бэлтгэлийг хийж буй иргэд олон байна.

Бид Төв аймгийн Жаргалант сумаас ирж хоёр хүүхдийнхээ хичээлийн хэрэглэлийн бэлдэж буй Ц.Мөнхтуяагийн сэтгэгдлийг сонслоо.  

Тэрбээр: “Жил болон хотод ирж хүүхдийнхээ хичээлийн хэрэглэлийг бэлтгэдэг. Энэ жил 500 мянган төгрөгөөр л хоёр хүүхдийнхээ юмыг хагас хугас авлаа. Юмны үнэ нэмэгдсэн байна. Хотод арай сонголт сайтай, үнэ боломжийн байдаг учраас энд ирж хувцсыг нь авдаг. Өнөөдөр захаар явж гутал хувцаснаас бусдыг нь авлаа. Жил болгон л барааны үнэ нэмэгдсэн байх юм. Өмнө жил 20 мянган төгрөгөөр авдаг байсан цэнхэр цамцаа энэ жил 25 мянгаар авч байна” гэлээ.

Б.Бадралмаа

Ардчилал.мн

 

 

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ