МАН ЦАХИЛГААНЫ ҮНИЙГ ТОГТВОРТОЙ БАРИНА ГЭЖ АМАЛСАН Ч ЭНЭ ЖИЛ ДӨРВӨН Ч УДАА НЭМЭГДЖЭЭ

us07j.jpg МАН ЦАХИЛГААНЫ ҮНИЙГ ТОГТВОРТОЙ БАРИНА ГЭЖ АМАЛСАН Ч ЭНЭ ЖИЛ ДӨРВӨН Ч УДАА НЭМЭГДЖЭЭ

Айл, ААН бүрийн сар тутмын эрчим хүчний хэрэглээ харилцан адилгүй. Мөн нэг кВ.ц цахилгааны тариф бага мөнгөн дүнгээр хэмжигддэг. Ийм ч учраас хэрэглэгчид цахилгааны тарифын нэмэгдлийг төдийлөн анзаараад байдаггүй болов уу. Харин сүүлийн үед Улаанбаатар хотын иргэд цахилгааны төлбөр өмнөхөөсөө өндөр тооцогдож буй тухай өөр зуураа ярих болов.

-АЙЛ ӨРХИЙН ЦАХИЛГААНЫ ТАРИФ 12.09 ТӨГРӨГӨӨР НЭМЭГДЖЭЭ-

Үүний дагуу тодруулахаар, УБЦТС (Улаанбаатар цахилгаан түгээх сүлжээ) ТӨХК-ийн лавлах ажилтантай холбогдоход айл өрх болон энгийн аж ахуйн нэгжүүдийн цахилгааны тариф нэмэгдсэн бол, Уул уурхайн олборлох, боловсруулах аж үйлдвэрүүдийн тариф хэвээр байгаа гэдэг мэдээллийг өгсөн юм.

Энэ жилд цаг хугацааны хувь хоорондоо зайтайгаар нийт дөрвөн удаа тарифын нэмэгдэл хийжээ. Тухайлбал,

  • Дөрөвдүгээр сарын 7-нд эхний нэмэлт:  1 төг, 50 мөнгөөр
  • Тавдугаар сарын 1-нд хоёр дахь нэмэлт: 3 төгрөгөөр
  • Зургаадугаар сарын 1-нд гурав дахь нэмэлт: мөн 3 төгрөгөөр
  • Долоодугаар сарын 1-нд дөрөв дэх нэмэлт: 3 төг, 50 мөнгөөр тус тус нэмэгджээ.

Энгийн аж ахуйн нэгж болон айл өрхөд цахилгаан борлуулах тарифын мэдээллийг хүснэгтэлж харуулъя.

Энгийн /Уул уурхайн олборлох, боловсруулах аж үйлдвэрээс бусад/ аж үйлдвэр:

1 Энгийн тоолууртай Төг/кВ.цаг 140.59
2 3 тарифт тоолууртай    
а Өдрийн хэрэглээ
/өглөөний 06.00 цагаас оройн 17.00 цаг хүртэл/
Төг/кВ.цаг 140.59
б Оройн хэрэглээ 
/оройн 17.00 цагаас шөнийн 22.00 цаг хүртэл/
Төг/кВ.цаг 221.89
в Шөнийн хэрэглээ
/шөнийн 22.00 цагаас өглөөний 06.00 цаг хүртэл/
Төг/кВ.цаг 89.19

Айл өрх:

1 Энгийн тоолууртай    
а Сарын нийт хэрэглээний 
150 кВт.ц хүртэлх хэрэглээ
Төг/кВт.ц 110.49
б Сарын нийт хэрэглээний
151 кВт.ц болон түүнээс дээших хэрэглээ
Төг/кВт.ц 130.29
2 2 тарифт тоолууртай    
а Өдрийн хэрэглээ
/өглеөний 06.00 цагаас шөнийн 21.00 цаг хүртэл/
Төг/кВт.ц 116.39
б Орой, шөнийн хэрэглээ
/оройн 21.00 цагаас өглөөний 06 00 цаг хүртэл/
Төг/кВт.ц 89.19
3 Сарын суурь тариф Төг/сар 2000.0

Уншигчдын амьдралд буусан тооцоолол хийвэл:

Иргэдийн сарын дундаж цахилгааны хэрэглээг 350 кВ гэж үзье. Ингэвэл хуучин тарифаар нэг сард 41 мянга 370 төгрөг болно. Харин шинэ тарифаар 45 мянга 601 төгрөг болж байна. /тооцоололд айл өрхөд цахилгаан борлуулах тарифын хүснэгтийн 1б хэсэг дэх утгыг ашиглав/

-ЗАСГИЙН ГАЗРЫН МӨРИЙН ХӨТӨЛБӨР ИНГЭЖ БИЕЛЖ БАЙНА-

Цахилгааны тариф нэмэгдсэн тухай мэдээлэл авсны дараа МАН-ын Засгийн газрын 2016-2020 оны үйл ажиллагааны /мөрийн/ хөтөлбөрийг эргэн харсан юм.

Үүнд, ХОЁР.ЭДИЙН ЗАСГИЙН ТОГТВОРТОЙ ӨСӨЛТИЙГ ХАНГАХ БОДЛОГО бүлгийн “Эрчим хүчний салбарын чиглэлээр” гэсэн хэсэг дэх 2.109 дугаар зүйлд: ДУЛААН, ЦАХИЛГААНЫ ҮНИЙГ ТОГТВОРТОЙ БАЙЛГАНА гэж заажээ.

Мөн тус бүлгийн 2.9 дугаар зүйлд: “Үйлдвэрлэлд ашиглагддаг уур, ус, дулаан, цахилгааны тарифыг тогтвортой байлгаж, аажмаар бууруулах бодлого баримтална” хэмээн тусгасан нь анхаарал татна.

Уул уурхайн олборлох, боловсруулах аж үйлдвэрүүдийн тарифыг нэмэгдүүлэлгүй хэвээр байлгаж буйг мөрийн хөтөлбөрийн дээр дурьдсан 2.9 дэх заалтаа биелүүлсэн гэж харж болохоор. Харин энгийн аж ахуйн нэгж болоод, айл өрхөд цахилгаан борлуулах тарифын нэг жилийн дотор ДӨРВӨН УДАА нэмсэн явдал “Дулаан, цахилгааны үнийг тогтвортой байлгана” гэсэн заалтаас зөрүүтэй харагдаж байна.

“Сонгууль болгоноор худлаа амлаж, мөрийн хөтөлбөрөө биелүүлдэггүй” гэх ард иргэдийн шүүмжлэл улстөрийнхнийг дайраад уджээ. Асуудлыг явцууруулж, аль нэгэн нам эсвэл эзнийг буруутгах гэсэнгүй. Бодит амьдрал дээр МАН-ын мөрийн хөтөлбөрийн зүйл заалт ийнхүү зөрчигдөж буйг уншигчдад тэнцвэртэй мэдээлэхийг зорилоо.

ЭХ СУРВАЛЖ: EGUUR.MN Х.ЭРХЭС

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ