70 САЯАР ТОХИЖУУЛААД АМЖИЛТ ОЛООГҮЙ АРСЛАНТАЙ ГҮҮРНИЙ “УСАН ХӨШИГ”-ИЙГ ДАХИН 40 САЯАР ЗАСВАРЛАЖЭЭ

64180536_2615450895151752_3377855662200455168_n.jpg 70 САЯАР ТОХИЖУУЛААД АМЖИЛТ ОЛООГҮЙ АРСЛАНТАЙ ГҮҮРНИЙ “УСАН ХӨШИГ”-ИЙГ ДАХИН 40 САЯАР ЗАСВАРЛАЖЭЭ

Нийслэлийн хөрсний бохирдол, тоосжилтыг бууруулах зорилготой хэмээж, хотын хэд хэдэн газарт Улаанбаатар хотын захирагчийн албанаас “усан хөшиг” татсан нь ердөө дөрвөн жилийн өмнөх үйл явдал.

Тодруулбал, 2015 оны долдугаар сарын 23-ны билэгт сайн өдөр тууз хайчлах шахам тун дуулиантай нээсэн “усан хөшиг” манай хотод бий. Тэрхүү “усан хөшиг” гэх сүржин нэртэй угаагуурын гоожуур шиг зүйлийг өмнөх хотын удирдлагууд Сэлбэ голоос ус татаж, Арслантай гүүрнээс цацруулсан юм. Ийм л “усан хөшиг” Улаанбаатарт анх удаа  70 сая төгрөгөөр баригдсан түүхтэй. Гэвч мөнөөх “усан хөшиг” гэх угаагуурын гоожуур шиг зүйл маань хэдхэн хоног гоожоод, хэдэн арван сая төгрөгийг хий дэмий салхинд хийсгээд замхарсан юм.

Анх Арслантай гүүрний “усан хөшиг” гэх төслийг “Хан урсгал” гэх нэртэй компани батлуулахдаа Сэлбэ голоос шугам татаж, сэрүү татсан сайхан оргилуур хийнэ гэж ярьж байжээ. Гэвч тус компани ёстой л нүглийн нүдийг гурилаар хуурсан энэ юм.

Тэгвэл ийнхүү 70 саяар босоод долоо ч хонолгүй ажиллахаа больсон мөнөөх айхавтар, сүржин нэрт “усан хөшиг”-ийг энэ цагийн эрх баригчид, хотын удирдлагууд дахин нээж ажиллуулахаар төлөвлөжээ. Ингэхдээ тэд өмнөх ус цацруулагч зарим цоргыг сольж, төмөр урт хоолой бүхий цорго гагнажээ. Ер нь бол хэдэн урт цорго нэмж гагнаж, өнгөөр будсаныг эс тооцвол өмнөхөөсөө сүртэй өөрчлөгдсөн юм алга.

Энэ талаар Хот тохижилтын газрын дарга, НИТХ-ын төлөөлөгч Б.Бямбадорж "Хот тохижилтын засвар үйлчилгээний шуурхай багийн 30 гаруй ажилчид долоо хоногийн дотор хийж байгаа бөгөөд 40 орчим сая төгрөгийн төсөв зарцуулсан. Энэ мөнгөнд голын хогийг цэвэрлэж ачуулахаас авахуулаад нэг ширхэг төмөр, гагнуурын электрод, будаг шунх, хоол хүнс гээд бүх зардал орсон. Сэтгэл гаргаж хийж байгаа учраас урт настай байна гэдэгт итгэж байна" гэж зарим хэвлэлд хэлжээ.

Мөн энэ талаар НХТГ-ын орлогч дарга Н.Пүрэвжав “Нийслэлийн засаг даргаас өгсөн үүрэг даалгаврын дагуу Арслантай гүүрний хуучин хийгдсэн байсан “Усан хөшиг”-ийг сэргээхээр болсон. Ер нь бол үүний хийц, технологи нь бол жоохон буруу байсан юм билээ. Тиймээс энэ бүгдийг шинэчлээд 40 орчим сая төгрөгөөр шинээр янзалж, гүүрээ иж бүрэн засварлахаар тохижилтын ажлууд хийгдэж байна. Энэ долоо хоногийн сүүлч гэхэд тус ажлыг дуусгана гэсэн төлөвлөгөөтэй ажиллаж байна” гэсэн юм.

Ийнхүү Э.Бат-Үүлийг хотын дарга байхад төсвийн мөнгөнөөс 70 сая төгрөг хумсалж хийсэн Арслантай гүүрний “усан хөшиг” гээчийг С.Амарсайханы үед дахин 40-өөд сая төгрөгөөр засварлаж нээхэд бэлэн болгожээ.

А.ТАМИР

АРДЧИЛАЛ.МН

 

 

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ