ШӨХТГ: ШАТАХУУНЫ ҮНЭ БУУРУУЛААГҮЙ ААН-ИЙН ТУСГАЙ ЗӨВШӨӨРЛИЙГ ЦУЦЛАХ САНАЛ ХҮРГҮҮЛНЭ

shatahuun.png ШӨХТГ: ШАТАХУУНЫ ҮНЭ БУУРУУЛААГҮЙ ААН-ИЙН ТУСГАЙ ЗӨВШӨӨРЛИЙГ ЦУЦЛАХ САНАЛ ХҮРГҮҮЛНЭ

ШӨХТГ-аас өнөөдөр /2019.06.14/ шатахууны жижиглэнгийн үнийг шалтгаангүйгээр нэмсэн аж ахуй нэгжүүдэд шаардлага хүргүүлсэн талаар хэвлэлийн хурал хийлээ. 

Монгол Улсын Засгийн Газрын 2018 оны хоёрдугаар сарын 23-ны 54-р тогтоолоор газрын тосны үнийн хангамж, үнэ тогтворжуулах хяналт тавих үүрэг бүхий хувийн хэвшил, иргэний нийгмийн байгууллагын хамтарсан “Үнийн зөвлөл” байгуулан ажиллаж эхэлсэн.

Үнийн Зөвлөлөөс  шатахууны худалдаа эрхэлдэг, аж ахуй нэгж болон төрийн бус байгууллагууд  дэлхийн зах зээл дэх газрын тос болон валютын ханшийн өөрчлөлт ороогүй тохиолдолд шатахууны жижиглэнгийн үнэд шалтгаангүйгээр өөрчлөлт оруулахгүй байх. Жижиглэнгээр оруулж ирж байгаа шатахууны үнийг тогтвортой барих. Агаар орчны бохирдлыг бууруулах үндэсний хөтөлбөрийн хэрэгжилтийг хангах чиглэлээр стандартад таарсан шатахууны импорт, борлуулалтын нэгдүүлэх чиглэлээр ажиллах. Хэрэглэгчдэд бодиттой мэдээлэл хүргэх зэрэг зөвлөмжийг өгч ажилладаг. Тэгвэл ШӨХТГ-аас гадаад зах зээлийн үнэтэй уялдуулан шатахууны үнийг бууруулах шаардлагыг нийт 37 компанид хүргүүлжээ.

Энэ талаар ШӨХТГ-ын хэрэглэгчдийн эрхийг хамгаалах газрын дарга Ш.Цэрэндулам: “ШӨХТГ-аас шатахууны жижиглэнгийн борлуулалтын үнэд байнгын хяналт тавин ажиллах үүрэгтэй. Энэ чиглэлийнхээ дагуу шалтгаангүйгээр үнээ нэмсэн аж ахуй нэгжийн тусгай зөвшөөрлийг цуцлах, зөвшөөрлийг хүчингүй болгох эрхтэй. Өнгөрсөн сард шатахууны үнэ нэмэгдсэнтэй холбоотой газрын тосны салбарт үйл ажиллагаа явуулж байгаа аж ахуй нэгжид албан шаардлага хүргүүлж ажиллаж байна. Гадаад хилийн үнэ буурсантай холбогдуулан аж ахуй эрхлэгчдэд энэ үнэтэй дүйцэхүйц хэмжээгээр бууруул гэсэн шаардлагыг хүргүүлсэн. 2019 оны зургадугаар сарын байдлаар А-80 авто бензиний үнэ тонн тутамдаа 640 ам.доллар, АИ-92 автобинзен тонн тутамдаа 670 ам.доллар, дизель түлш тонн тутамдаа 639 ам.доллар болж өнгөрсөн таван сартай харьцуулахад автобинзены үнэ тонн тутамдаа 52 ам.доллар, дизель түлш нэг ам.доллар буурсан үзүүлэлттэй байгаа юм.

Тиймээс шаардлагын хариуг энэ сарын 16-ны дотор манайд хүргүүлэх ёстой. Шаардлагын хариуг ирүүлээгүй, 16-ны дотор үнээ буулгаагүй тохиолдолд аж ахуй нэгжийн тусгай зөвшөөрлийг цуцлах, хүчингүй болгох саналыг салбар яаманд өгч ажиллана” гэлээ.  

Б.Бадралмаа

Ардчилал.мн

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ