ГЕРМАНД ХАР ТАМХИ ТЭЭВЭРЛЭЖ ЯВААД БАРИГДСАН ИРГЭД МОНГОЛ УЛСААС ТУРК УЛСАД СУУГАА ДИПЛОМАТ АЖИЛТНУУД БАЙЖЭЭ

62303632_687314038391685_5945487571034308608_n.jpg ГЕРМАНД ХАР ТАМХИ ТЭЭВЭРЛЭЖ ЯВААД БАРИГДСАН ИРГЭД МОНГОЛ УЛСААС ТУРК УЛСАД СУУГАА ДИПЛОМАТ АЖИЛТНУУД БАЙЖЭЭ

Монголын хоёр дипломатч, дипломат дугаартай машинд 70 кг геройн тээвэрлэж яваад ХБНГУ-ын Дрезден хотын орчим цагдаагийнханд саатуулагдсан тухай мэдээлэл тархсан. Түүнчлэн тэдгээр иргэдийн тээвэрлэж явсан хар тамхийг гурван сая еврогоор үнэлэгдэнэ гэж ХБНГУ-ын хууль сахиулагчид мэдэгджээ.

Тус хэргийг тодруулбал, Хар тамхи тээвэрлэж явсан машиныг өнгөрсөн тавдугаар сарын 3-нд ХБНГУ-ын хурдны А17 зам дээр явахад нь цагдаагийнхан гэнэтийн шалгалтын үеэр илрүүлжээ. Цагдаагийнхан шалгалт явуулахад тэдгээр хоёр дипломатч паспортаа үзүүлэн машинаа шалгуулахаас татгалзсан байна. Тус хоёр хүний дипломат паспорт жинхэнэ байсан ч машинаас нь чемоданд 500 граммаар баглаж боож, хийсэн 140 ширхэг хар тамхи байсан нь илэрчээ хэмээн bild.de мэдээллийн хэрэгсэл лхагва гарагт мэдээлсэн байна.

Тэгвэл  Монголын хоёр дипломатч хар тамхины хэрэгтэй холбогдсон талаар ГХЯ-ны Консулын газрын дарга Л.Мөнхтүшиг өнөөдөр /2019-06-06/ мэдээлэл хийлээ.

Тэрбээр "Энэ оны тавдугаар сарын 3-ны өдөр Холбооны Бүгд Найрамдах Герман Улсын Дрезден хотын хилийн шалган нэвтрүүлэх постоор нэвтрэх гэж байсан Монгол Улсын ДТГ-ын дипломат дугаартай автомашиныг саатуулан шалгахад 70 кг геройны төрлийн мансууруулах бодис тээвэрлэж явсан нь урьдчилсан байдлаар тогтоогдсон. Уг хэрэгт шалгагдаж байгаа хоёр хүн нь Монгол Улсаас Турк улсын Истанбул хот дахь Ерөнхий консулын газарт ажилладаг болох нь үнэн.

Нэг нь дипломат ажилтан, нөгөөх нь жолооч. Уг хэргийг хянан шалгах ажиллагаа явагдаж, эцэслэгдээгүй байгаа тул эдгээр хүний нэрийг одоогоор олон нийтэд мэдэгдэх боломжгүй. Машин нь консулын албаны гэдэг нь үнэн" хэмээлээ.

Мөн энэ үеэр ГХЯ-ны Консулын газрын дарга Л.Мөнхтүшиг сэтгүүлчдийн асуултад хариуллаа.

-Хэргийг яагаад сарын дараа мэдэгдэж байгаа вэ? Нуух шалтгаан байсан уу?

-Мэдээллийг нуусан зүйл байхгүй. Мэдээллийг авангуут ар гэрийнхэнд нь мэдэгдсэн, холбогдох ажлуудыг хийж байна. Тухайн иргэний хувийн нууц, ар гэрийнхний хүсэлтээр нууцыг хадгалдаг, мэдээллийг задруулдаггүй. Мөн хэрэг шалгагдаж эцэслэгдээгүй байгаа тул мэдээлэх боломжгүй.

-Энэ хүмүүс бол иргэд биш. МУ-ын нэр хүндийг сурталчихлах албан тушаалтнууд шүү дээ.

-Чухал албан тушаалтнууд гэдэг нь үнэн. Гэхдээ тухайн улсын хуулиар шийдэгдэх ёстой учир хөндлөнгөөс ярих боломжгүй. Ямар учраас явсан, ямар учиртай тамхи байсан, энэ хэрэгт холбогдох өөр иргэд байгаа зэргийг шалгаж байна.

-Тухайн автомашин нь баривчлагдсан ажилтнуудын хувийн автомашин уу, албаных уу?

-Консулын газрын автомашин байсан.

-Баривчлагдсан хүмүүс нэр бүхий албан тушаалтнуудын хүүхдүүд байгаа гэх мэдээлэл байна. Тухайлбал, ЦЕГ-ын даргаар ажиллаж байсан н.Билэгтийн хүүхэд, Гадаадын иргэн харьяатын газрын дарга асан н.Мөрөнгийн хүүхдүүд байсан гэх мэдээлэл байна.

-Даргын хүүхэд байсан эсэх асуудал байхгүй. Хэрэгт холбогдсон асуудлыг иргэнийх нь хувиар нэрийг нь нууцалдаг.

-Гадаад эх орноо төлөөлж ажиллах хүмүүсийг ямар шалгуураар сонгон явуулдаг вэ?

-Хилийн чанадад ажиллах ажилтнуудыг төрийн албаны салбар зөвлөлийн хуулийн дагуу, шалгуур хангасан хүмүүс томилогдож ажилладаг. Энэ хэрэгт холбогдож байсан хүмүүсийн цаана өөр хүмүүс байгаа эсэх гээд шалгах асуудлууд байгаа.

-Өмнө нь энэ төрлийн гэмт хэргүүд гарч байсан уу?

-Өмнө хар тамхитай холбоотой ийм их ноцтой хэмжээтэй хэрэг гарч байгаагүй. Тамхины хууль бус наймаа эрхэлж байгаа асуудлаар ГХЯ-наас нэгдүгээр сард ТЕГ-т хандаж хамтран ажиллаж байгаа. Үүний дагуу Тагнуулын байгуулага ажиллаж байгаа.

-Энэ хүмүүс одоо хоригдож байгаа юу?

Тухайн улсын хуулийг зөрчсөн учир тэр улсдаа хоригдож, шийтгэгдэнэ. Энэ бол Монгол Улсын нэр хүндийг сэвтээх гэмт хэрэг. Цаашид энэ төрлийн гэмт хэргийг гаргахгүй үүднээс ГХЯ ажиллаж байгаа.

-Энэ хүмүүс консулаар ямар хугацаанд ажилласан бэ?

-Консулаар жил гаруй хугацаанд ажиллаж байгаа. Жолоочийн талаарх дэлгэрэнгүй мэдээлэл алга. Тэрбээр өмнө нь ОХУ-ын Консулын газарт ажиллаж байсан.

Ташрамд дуулгахад Монгол Улсаас Турк улсын Истанбул хотод суух Ерөнхий Консулаар Энэбишийн Мөнх-Очир ажиллаж байсан. Гэвч түүнийг эгүүлэн татаж, орных нь консулыг одоог хүртэл томилоогүй байгаа юм. БНТУ-ын Истанбул хотод суух Ерөнхий консулын газарт Ерөнхий консулаас гадна консул Б.Энхмөнх, техник ажилтан Д.Адьяасүрэн, мөн жолооч нар ажилладаг гэсэн мэдээлэл байна. Мөн баривчлагдсан жолоочийн тухайд Гадаад харилцааны сайд Д.Цогтбаатарын жолоочоор ажиллаж байсан хүн гэж зарим эх сурвалжууд мэдээлжээ.

НЭМЭЛТ:

Стамбул хотын Консулын газрын ажилтнууд ХБНГУ-ын Дрезден  хотод  хар тамхины хэргээр баривчлагдаад байгаа. Тодруулбал, өнөөдрийн мөнгөн ханшид шилжүүлбэл монгол мөнгөөр 10 орчим тэрбум төгрөгийн үнэлгээ бүхий 70 кг геройн тээвэрлэж байсан нь ил болсон талаар Гадаад харилцааны яамнаас мэдээлсэн.

Баривчлагдан саатуулагдаад байгаа дипломатч бол тус улс дахь Консулын газрын дипломатч 40 орчим насны Б.Баттүшиг гэгч байсан бол түүний жолооч нь 50 орчим насны, Сэлэнгэ аймгийн Мандал сумын харьяат С.Эрдэнэбаяр нар байжээ.

Дипломатч Б.Баттүшиг нь Улсын Дээд шүүхийн шүүгчээр ажиллаж байгаад гавьяаныхаа амралтад гарсан Б.Бат-Эрдэнийн хүү бөгөөд өмнө нь Бангкок, ОХУ-д консулаар ажиллаж байсан нэгэн.

Харин хар тамхи зөөвөрлөхдөө ашигласан автомашины тухайд жолооч С.Эрдэнэбаярын хувийн эзэмшлийнх боловч дипломат дугаартай байсан бололтой. С.Эрдэнэбаяр нь Гадаад харилцааны үе үеийн сайд нар болох Л.Болд, Д.Цогтбаатар нарын жолоочоор АНУ, Европын улсуудад ажиллаж байсан нэгэн юм байна. Тэдний энэ үйлдэл нэг удаагийнх биш, жил гаруй хугацаанд давтагдсан байх магадлалтай гэх эх сурвалжийн мэдээлэл байна.

А.ТАМИР

АРДЧИЛАЛ.МН

 

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ