ЛИВЕРПУЛЬ ГАЙХАМШИГ БҮТЭЭВ

15572822365cd23dbcec863.jpg ЛИВЕРПУЛЬ ГАЙХАМШИГ БҮТЭЭВ

Европын Хөлбөмбөгийн холбооны хамгийн нэр хүндтэй тэмцээн болох Аваргуудын лигийн шөвгийн 4 багийн хариу тоглолтууд эхэллээ. Өчигдөр Английн "Ливерпуль" Энфильд цэнгэлдэх хүрээлэндээ "Барселона" клубыг хүлээн авч тоглолоо. Өмнөх тоглолтод 3:0 харьцаагаар хожигдсон Ливерпуль өчигдөр шөнө гайхалтай эргэн ирэлт хийн, 4:0 харьцаагаар ялалт байгуулсанаар аваргын төлөө тоглох эрхтэй болов.

Шилдэг тоглогчид нь болох Фирминьо, М.Салах нар нь гэмтэлтэй энэ үед Ю.Клоппын залуус гайхамшиг бүтээж чадав. Шилдгүүд нь эзгүй үед Ориги болон Вейналдум хэмээх сэлгээний тоглогчид нь тус бүр хоёр гоол хийсэн.
Тоглолт эхлээд 7 дахь минутад Ориги эхний гоолыг хийн Ливерпульд найдлага авчирсан. Хаалгачаас ойсон бөмбөгийг тэрбээр нэмсэнээр Энфильд цэнгэлдэхийг доргиов.

Эхний хагаст өөр гоол ороогүй ба Ю.Клопп хоёрдугаар үе эхлэхэд Вейналдумыг талбайд гаргасан нь "нүдээ олов". Тэрбээр 54, 56 дахь минутад баруун болон зүүн захаас ирсэн дамжуулалтыг хүлээн авч тер Штегений хаалганд шигтгэж чадсанаар Энфильд цэнгэлдэхийг доргиож чадсан.

Хожлын гоол бүүр гайхалтай байлаа. Булангийн цохилт хийх эрх авсан Улаануудаас 66 дугаартай Трент Александер-Арнольдыг хэн ч бөмбөг өшиглөнө гэж санасангүй. Гэтэл тэрбээр булангаас буцаж хэд алхсанаа гэнэт эргэж бөмбөг өшиглөсөн бөгөөд түүнийг нь Ориги шууд хаалга руу чиглүүлж гоол болгосноор тооны харьцаа 4:0 болов. Үлдсэн хугацаанд Улаанууд хамгаалалтандаа алдаа гаргасангүй, гайхамшиг бүтээж чадлаа.

ЭХ СУРВАЛЖ: ZALUU.COM

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ