БАЛАГ: “ОЮУТОЛГОЙ”-Г ШАЛГАСАН УИХ-ЫН АЖЛЫН ХЭСГИЙН “НУУЦ” ДҮГНЭЛТ РИО-ТИНТОД ОЧИЖ, Г.ЗАНДАНШАТАР УУЛЗАЛТААС БУЛТЖЭЭ

,JJHJNKHJKH.jpg БАЛАГ: “ОЮУТОЛГОЙ”-Г ШАЛГАСАН УИХ-ЫН АЖЛЫН ХЭСГИЙН “НУУЦ” ДҮГНЭЛТ РИО-ТИНТОД ОЧИЖ, Г.ЗАНДАНШАТАР УУЛЗАЛТААС БУЛТЖЭЭ

-НУУЦЫН ЗЭРЭГЛЭЛТЭЙ ДҮГНЭЛТИЙГ ХӨРӨНГӨ ОРУУЛАГЧ ТАЛЫНХАН ХЭВЛЭЖ БЭЛТГЭСЭН БАЙЖЭЭ-

УИХ-аас Оюутолгойг шалгах ажлын хэсгийг өнгөрсөн хаврын чуулганы үеэр байгуулагдсан. Бөөн сүр дуулиан болж байгуулагдсан ажлын хэсгийг эхэндээ Д.Дамба-Очир гишүүн ахалсан ч ашиг сонирхлын зөрчилтэй гэж үзэн сольсон юм. Ингэж Д.Тэрбишдагва гишүүнээр ахлуулсан ажлын хэсэгт яамдын ТНБД нараар ахлуулсан дэд ажлын хэсэгт хуваагдаж, үндсэн таван чиглэлд санал дүгнэлт боловсруулан ажилласан билээ.

Ажлын хэсэгт Н.Амарзаяа, О.Баасанхүү, Б.Бат-Эрдэнэ, Б.Жавхлан, З.Нарантуяа, Я.Содбаатар, А.Ундраа тэргүүтэй гишүүд багтсан. Дараа нь дахин өөрчлөлт орж, иргэний нийгмийн байгууллагын төлөөлөл нэртэйгээр Х.Бээжин, Б.Жагар тэргүүтэй хэтийдсэн  “поп”-ууд хүртэл багтаж амжсан билээ.

Гэхдээ  ажлын голыг УИХ-ын гишүүд ч, “поп”-ууд ч “нугалаагүй”. Дэд ажлын хэсэгт багтсан төрийн албаны “цаас нухагчид” цэгцэлж эрэмбэлжээ. Дүгнэлтийг эхэнд ҮАБЗ-д багтсан Ерөнхийлөгч, УИХ-ын дарга, Ерөнхий сайд гуравт хүргүүлсэн гэгдэж байв. Дараа нь ажлын хэсэгт багтсан гишүүдэд цаасан хувилбараар тараасан нь тодорхой болсон.

Тэд  “Нууцын зэрэглэлтэй”  гэх нэрээр сэтгүүлчдэд энэ талаарх мэдээллийг өгөхөөс эрс татгалзаж байв. Хамгийн сонирхолтой нь, өнөөх нууцлаад байсан ажлын хэсгийн дүгнэлт нь хөрөнгө оруулагч талд хэдийн очсон байжээ.

Хөрөнгө оруулагч тал нууцын зэрэглэлтэй гэгдсэн дүгнэлтийг сайхан орчуулж бэлтгээд,уулзалтын үеэр тавхайтал барьж байгаад мэтгэсэн гэх мэдээлэл саарал ордонд яригдаж байна.

Энэ талаар Эдийн засгийн байнгын хорооны дарга Д.Дамба-Очир “Ажлын хэсгийн дүгнэлтийг албан ёсоор Рио-Тинтод хүргүүлээгүй” гэсэн нь ихээхэн анхаарал татав.

УУЛЗАЛТ: ГЭРЭЭНИЙ ҮГ, ҮСЭГ, ӨГҮҮЛБЭР, ЦЭГ, ТАСЛАЛЫГ Ч СОЛИХГҮЙ

Ажлын хэсгийн дүгнэлт гарсантай холбогдуулан Рио-Тинтогийн удирдлагууд Монголд ажиллаж байгаа аж.  Тэд өнгөрсөн долоо хоногт УИХ-ын дарга Г.Занданшатартай уулзах хүсэлт тавьсан ч эелдгээр татгалзсан байна. Тиймээс Эдийн засгийн байнгын хорооны дарга Д.Дамба-Очиртой уулзаж ярилцсан байна.

Д.Дамба-Очир гишүүн уг уулзалтын талаар “Рио-Тинто компанийн удирдлагууд уулзалтын явцад Оюутолгойн хөрөнгө оруулалтын гэрээ, Дубайн гэрээ, хувь нийлүүлэгчдийн гэрээнд өөрчлөлт оруулалт оруулахгүй. Бид УИХ-аас асуудлыг шийднэ гэсэн байр суурь илэрхийлсэн. Гэрээг нь сайжруулах асуудлыг ярих байх гэхэд бид үг өгүүлбэр, цэг таслал ч солихгүй гэсэн. Ажлын хэсгийн дүгнэлттэй танилцчихсан юм билээ” гэсэн мэдээллийг өглөө.

Уг уулзалтын дараа Ажлын хэсгийн дүгнэлтийг албан ёсоор Рио-Тинтод хүргүүлээгүй мэдэгдэл гаргасан. МЭДЭГДЭЛДЭЭ “УИХ болон Засгийн газар Монгол Улсыг хөрөнгө оруулагчдын газрын зургаас баллахгүй авч үлдэнэ найдаж байна” гэж онцолсон байв. Мөн тэрбээр, “Рио-Тинто” болон олон улсын 20 орчим санхүүгийн байгууллагын чухалчилж буй эдгээр суурь ГЭРЭЭНИЙ НЭГ Ч ЗААЛТЫГ ӨӨРЧЛӨХӨӨР ХЭЛЭЛЦЭЭ ХИЙХГҮЙ” гэж онцолж өгсөн юм.

-УИХ БУУЛТ ХИЙХ НЭРЭЭР ЛОББИД ӨРТӨХ ҮҮ-

Оюутолгой бол Дэлхий нийтийн жишиг төсөл. Аль ч орны хөрөнгө оруулагчид Монголыг Оюутолгой төслөөр жишээ авч ярьдаг нь ч үнэн. Цаашлаад Үндэстэн дамнасан корпораци болох РиоТинто, ОУВС, Дэлхийн банк, Азийн хөгжлийн банк зэрэг томоохон эдийн засгийн сүлжээнүүдтэй нягт холбоотой.

Ж.Эрдэнэбатын Засгийн газрын үед Оюутолгойн гэрээг сөхөөд ярингуут манай улсын зээлжих зэрэглэлийг хоёр хоногийн дараа шууд буулгаж байсангашуун түүх бий.

Тэд ингэж айлгаж чаддаг. Бид бас хөгжиж буй орны даруу жишгээр буулт хийдэг. Буулт хийх нэрийн дор улс төрчид нь хөрөнгө оруулагч талд “найр тавьчихдаг” нь бас нууц биш билээ. Хэдхэн хүнд тарсан ганц ажлын хэсгийн дүгнэлтийг ч дотооддоо нууж чаддаггүй.

Дүгнэлтийг хэлэлцэхээс өмнө зориудаар “Дубайн гэрээг зогсооно” гээд мэдэгдчихдэг “лоббины улстөрчидтэй” орон билээ.

Манай улс төрчдийн энэ жишиг Индонезийн алдарт “Grassberg”-ийн түүхийг Монгол давтана гэх найдлагыг  огт төрүүлэхгүй. Индонези Улс 25 жил үр ашиггүй ажилласан Grasberg ордын 51 хувийг Рио-Тинтогоос 2018 онд авч чадсан. Рио-Тинто зөвхөн 40 хувиа эзэмшиж, операторийн эрхтэйгээр үлдэж, дэлхийн хамгийн том алтны нөөцтэй ордоо  илүү ашигтайгаар зарцуулах боломжийг Индонези Улс авч чадсан билээ.

Нөгөө талаас Рио-Тинто Монголоос гараад явчихвал өөр хөрөнгө оруулагчид энэ төсөл дээр орж ирэх үү. Айлгаад байгаачлан, Монгол үнэхээр хөрөнгө оруулагчдын хараанаас мултрах уу. Эсрэгээрээ  шинэ саналын усргал нэмэгдэх үү гэдэг нь ч асуудал билээ. Ямар ч байсан Рио-Тинто өнгөрсөн хугацаанд байгуулсан бүх гэрээн дээрээ цэг таслал ч хөдөлгөлөхгүй. Хөдөлгөвөл зогсооно гэж сүрдүүллээ.

Одоо УИХ хэрхэн ажиллах нь уу. Хүлээх л үлдэв.

ЭХ СУРВАЛЖ: EGUUR.MN

Ж.МЯДАГБАДАМ

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ