ЧӨЛӨӨТ БӨХ АЗИЙН АШТ: С.ЦЭРЭНЧИМЭД, З.БОЛОРТУНГАЛАГ НАР ХҮРЭЛ МЕДАЛЬ ХҮРТЛЭЭ

15563386625cc3d7e62c2c2.jpg ЧӨЛӨӨТ БӨХ АЗИЙН АШТ: С.ЦЭРЭНЧИМЭД, З.БОЛОРТУНГАЛАГ НАР ХҮРЭЛ МЕДАЛЬ ХҮРТЛЭЭ

Чөлөөт бөхийн 2019 оны насанд хүрэгчдийн Азийн аварга шалгаруулах тэмцээний эмэгтэйчүүдийн 57 кг-ын жинд “Ташкент-2014” ДАШТ-ий алт, “Лас-Вегас-2015”-ын мөнгө, 23 хүртэлх насны ДАШТ-ий хүрэл, Залуучуудын ДАШТ-ий алт, Өсвөр үеийн ДАШТ-ий хүрэл медальт, Азийн наадам болон Азийн АШТ-ий хүрэл медальт, Монгол Улсын гавьяат тамирчин Сүхээгийн Цэрэнчимэд хүрэл медаль хүртлээ.
Тэрбээр хүрэл медалийн төлөөх барилдаанд Энэтхэгийн Жанда Поожаг 5:3-аар ялснаар таван жилийн дараа тивийн аваргаас гурав дахь хүрэл медалиа зүүсэн юм. Тэрбээр 2011 онд Ташкентэд, 2014 онд Астанад хүрэл медаль хүртэж байв. 
С.Цэрэнчимэд гавьяатад жиндээ түрүүлэх боломж дүүрэн байсан бөгөөд 1/4 шигшээд өнгөрсөн жилийн дэлхийн аварга эзэн орны Рон Ниннингэд 3:4-өөр харамсалтай ялагдсан юм.

Мөн эмэгтэйчүүдийн 65 кг-ын жинд Азийн АШТ-ий хүрэл, оюутны ДАШТ-ий хүрэл, Иван Ярыгиний “Алтан Гранпри”-гийн хошой хүрэл медальт, “Монголиа Опен” ОУТ-ий хошой аварга, “Хилчин” спорт хорооны тамирчин ОУХМ Зоригтын Болортунгалаг энэ удаагийн Азийн аваргад манай тамирчдын тав дахь хүрэл медалийг авчирлаа.
З.Болортунгалаг үдээс өмнө нь 1/4 шигшээд БНСУ-ын Чой Сеуныг цэвэр ялсан ч хагас шигшээд Японы Наоми Рүикэд оноогоор цэвэр (0:11) ялагдсан. Тэгвэл хүрэл медалийн төлөөх барилдаанд Узбекистаны Сахипжамал Алуатдиноваг цэвэр дарснаар гурван жилийн өмнө нь Бангкокийн Азийн АШТ-д хүртсэн хүрэл медалиа ихэрлүүлэв. 
Ийнхүү Монголын чөлөөт бөхийн тамирчид Азийн АШТ-д хоёр мөнгө, таван хүрэл медальтай тэмцээн өндөрлүүлж байна. Маргааш сонгомол бөхийн 55 кг-д М.Даваабанди, нөгөөдөр 67 кг-д Г.Ханбүргэд нар барилдана.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ