Х.БАДЕЛХАН, С.АМАРСАЙХАН НАР ОГЦОР!!!

5cb682fc215623.28433628.jpeg Х.БАДЕЛХАН, С.АМАРСАЙХАН НАР ОГЦОР!!!

Тиймээ тэд огцрох ёстой. Ингэж хэлэхийн учир нь өчигдөр Төв цэвэрлэх байгууламжийн түүхий үлдэцийн насосын станцын хоолой задарч 9 хүн хордож, дөрөв нь нас барсан харамсалтай хэрэг гарсан. Албаны хүмүүсийн тайлбарлаж буйгаар “Үйлдвэрийн осол гарч их харамсмаар зүйл боллоо. Төв цэвэрлэх байгууллагын лаг дээр ажиллаж байсан хүмүүс хийнд хордсон. Лаг руу унасан зүйл болоогүй” гэх хариултыг ээлж дараалан өгч байна. Хэдийгээр ослын дүгнэлт хараахан гараагүй учраас сэтгүүлч би бээр яаран сандран дүгнэлт хийх нь илүүц билээ. Харин юу үнэн гэвэл талийгаачдийн амиа алдах болсон шалтгаан нь хөдөлмөрийн аюулгүй байдал алдагснаас үүдэлтэй.

Иймэрхүү харамсалтай хэрэг гарах бүрт албаныхан амиа хоохойлж бурууг бусад руу чихэж хурган дарга, даамал нартаа хариуцлага үүрүүлдэг жишиг тогтсон. Тиймээс энэ асуудлын гол бурууг нь нөгөө л нэг хурган дарга нар үүрч ажлаасаа халагдах аль эсвэл тушаал буурах тийм л дүр зураг харагдаж буйг нуух юун. Эцсийн дүндээ тухайн газарт байсан таван хөдөлмөр хамгааллын инженер энэ хэргийн буруутан болж хариуцлага үүрэх нь тодорхой.

Уг нь манай сайд дарга нарт улстөрийн маш том соёл байсан толгой бөхийж ирээд талийгаачдийн ар гэрээс уучлалт гуйж ёс зүйн хариуцлага хүлээж албан тушаалаа сайн дураараа өгөх ёстой. Гэвч тэдэнд тийм сэтгэл, зориг зүрх байхгүй нь харамсалтай. Хэдийгээр тэдний өмнөөс хариуцсан ажлаа хийх ёстой дарга нар нь очсон ч гэлээ тэд энэ эмгэнэлтэй үйл явдалд хүн ёсны сэтгэл гаргаж талийгаачдийн ар гэрт эмгэнэл илэрхийлсэн бол ядаж л хүн чанарын хэлтэрхий ч болов энэ дарга, сайд нарт байна гэж олон нийт дүгнэх байсан. Тиймээс хариуцсан салбарт нь дөрвийн дөрвөн хүн амь насаа алдаж таван хүн үхэлтэй тэмцэж байхад Барилга хот байгуулалтын сайд Х.Баделхан, Хотын дарга С.Амарсайхан нар ч энэ асуудал дээр хариуцлага үүрч ажлаа өгөх ёстой. Ийм жишгийг олон дарга нар үлдээж явсан түүх бий. 

Хэрвээ уншигчид санаж буй бол хариуцсан салбарт нь эмгэнэлтэй явдал гарсан газруудын сайд, дарга нар өөрсдийн хүсэлтээр ажил албан тушаалаа өгч ёс зүйн хариуцлага хүлээж байсан сайн жишгийг Зам тээврийн сайд асан Ж.Бат-Эрдэнэ, ШШГЕГ-ын дарга асан Ц. Амгаланбаяр нар үлдээж байсан. Иймийн учраас хөдөлмөр хамгааллын таван инженерээс гадна С.Амарсайхан, Х.Баделхан нар ч хариуцлага хүлээж албан тушаалаасаа огцрох ёстой.

ЭХ СУРВАЛЖ: ERENNEWS.MN

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ