ОЛОН УЛСЫН СТАНДАРТАД НИЙЦСЭН УСАН БАССЕЙН АШИГЛАЛТАД ОРУУЛНА

5ca85f6e16f30.jpeg ОЛОН УЛСЫН СТАНДАРТАД НИЙЦСЭН УСАН БАССЕЙН АШИГЛАЛТАД ОРУУЛНА

Улаанбаатар хотын захирагч С.Амарсайхан, “Азийн хүүхдүүд 2020” олон улсын наадмын захиргааны дарга Д.Жаргалсайхан, Монголын усан спорт сонирхогчдын холбооны ерөнхийлөгч П.Батсайхан нар гурван талын хамтран ажиллах санамж бичигт гарын үсэг зурлаа.

 

Санамж бичигт Улаанбаатар хотноо 2020 оны наймдугаар сарын 14-26-нд зохион байгуулах “Азийн хүүхдүүд” Олон улсын спортын VII их наадам, 2023 онд болох Зүүн Азийн залуучуудын спортын наадмын бэлтгэл ажлыг хангах хүрээнд усан спортын бассейныг барих, ашиглах үйл ажиллагааг төр, хувийн хэвшлийн түншлэлээр зохион байгуулахаар тусгажээ.

Энэ үеэр Хотын захирагч С.Амарсайхан, “Улаанбаатар хотод хүүхэд багачуудын бие бялдрыг хөгжүүлэх, залуучуудын ирээдүйн спортын авьяас чадварыг дээшлүүлэхэд чухал ач холбогдолтой бүтээн байгуулалтыг бий болгохоор ажил эхлэх гэж байна. Олон улсын шаардлага хангасан, орчин нөхцөлийг бүрдүүлсэн энэ спортын төв ашиглалтад орсноор залууст цагийг зөв боловсон өнгөрүүлэх, эрүүл мэнддээ анхаарахад нь их ач тустай. Энэ сарын 14-нөөс бүтээн байгуулалтын шавыг тавьж, ажил нь эхэлнэ. Ирэх оны зургадугаар сар гэхэд Мөсөн ордон, усан бассейн, задгай танхим гээд, бүрэн ашиглалтад оруулна” гэв.

Монголын усан спорт сонирхогчдын холбооны ерөнхийлөгч П.Батсайхан, “Манай усан спортын тамирчдын амжилт жилээс жилд улам ахиж байна. Тив дэлхийн олон тэмцээнд оролцож байна. Сүүлд Улаанбаатар хотод олон усан сангууд баригдаж байгаа ч олон улсын тэмцээн явуулах боломжтой усан бассейн байхгүй байна. Энэ бүтээн байгуулалтад Улаанбаатар хотын захиргаа хамтран ажиллаж байгаад талархаж байна” гэлээ.

 

Олон улсын стандартад нийцсэн усан спортын төв нь 50 метр, 25 метрийн хоёр усан сантай байх аж.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ