ГУРАВДУГААР САРЫН ШИЛДЭГ 10 БАРИЛДААН

5c9d67f905a41.jpeg ГУРАВДУГААР САРЫН ШИЛДЭГ 10 БАРИЛДААН

Монголын үндэсний бөхийн холбоо /МҮБХ/-ноос сар тутам зохион байгуулсан сумын цолтон болон залуу бөхчүүдийн барилдаанаас шилдэг барилдааныг тодруулдаг уламжлалтай. Ийнхүү гуравдугаар сарын барилдааны шилдэг 10 барилдааныг онцолж байна.

Б.Даваадалай-Э.Жүгдэрнамжил. Хоёр бөхийн барилдаан эхэндээ ширүүн өрнөсөн. Гэсэн ч Ховдын Даваадалай заан хосгүй бяртайгаа харуулж давхар тохох мэхээ даалган, их шөвөгт шалгарсан юм.


Д.Алтанцоож-Ц.Бямба-Отгон. Сумын заануудын барилдааныг өнгөлж барилдаж буй залуус долоогийн даваанд тунав. Ц.Бямба-Отгон анх түрүүлэхдээ долоогийн даваанд Д.Алтанцоожтой мөн л тунаж барилдан давж байсан бол энэ удаад тун ч ширүүхэн газардлаа.


Б.Батбаян-Ц.Төмөрцоож. Өсвөр үеийн улсын аварга Баттөмөрийн Батбаяны бахтай давааны нэг. Сайчуулыг цувруулан давсан Ц.Төмөрцоожийг дагуулж хөмрөн давж, үзүүр булаалдахаар шалгарсан.


Б.Даваадалай-Д.Алтанцоож. Сумын цолтнуудын барилдаанд Алтанцоож дөрөв түрүүлж, Даваадалай дөрөв үзүүрлээд байлаа. Харин энэ удаад их шөвөгт барилдаж Алтанцоож давсан барилдааныг бид онцолж байна.


Б.Батбаян-Д.Алтанцоож. Сумын баяр наадамд дөрөв түрүүлсэн Батбаян, сумын заануудын барилдаанд дөрөв түрүүлсэн Д.Алтанцоож нар үзүүр булаалдаж, Увсын Наранбулагийн заан баруун хашиж мордон давж анхны түрүүгээ хүртэв. Даваасүрэнгийн Алтанцоож анх удаа үзүүрлэлээ.

Д.Алтанцоож-Г.Бандибаатар. Ганболдын Бандибаатар хэмээх 20 настай залууг ирээдүйн том цолтон болно гэж бөхийн хорхойтнууд үнэлдэг. Хэнтийн Алтанцоожтой барилдаж байгааг нь харахад энэ үнэлгээ тийм ч хол зөрөхөөргүй бололтой.


Д.Бат-Эрдэнэ-Ц.Төмөрцоож. Цэвээнпүрэвийн Төмөрцоож энэ өдрийн барилдаанд арал чацаар тун ч илүүрхэж байлаа. Хоёр үзүүртэй Дамдиннямын Бат-Эрдэнийг хорих аргагүй шахаж татан дөрөв давлаа.


Э.Совджамц-Г.Цогтбаатар. Тавын даваанд зүүнийг магнайлсан Баянхонгорын Совджамц, Хөвсгөлийн Түнэлийн Цогтбаатарыг амлан барилдав. Дөрвийн даваанд төвөггүй давсан Цогтбаатар Совджамцад угсраа мэхүүдийг даалгасаар анх удаа шөвгөрлөө.


Ц.Намжилдорж-М.Төрбат. Олон шөвөгтэй Цэгмэдийн Намжилдорж анх шөвгөрсөн Мөнхдурсгалын Төрбатыг зургаагийн даваанд амлав. Увс нутгийн уран барилдаант заан зүүн золгооноос мордож түрээд тун ч төвөггүй давсан юм.

Б.Бадрал-Б.Золоо. Зүүнбүрэнгийн Золоо заан Дорноговийн Бадралын догшин барилдаанд огт сандрахгүй барилдав. Алсын сүвээ алдсан ч угсруулж мушгин давж, шөвгийн даваанд барилдах эрхтэй боллоо.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ