“БҮСГҮЙН ЗУРВАС” ЖҮЖГИЙГ Л.ӨЛЗИЙТӨГСИЙН ЗОХИОЛ БИШ ГЭВ

53192439_1273842306103342_1496746208020922368_n.jpg “БҮСГҮЙН ЗУРВАС” ЖҮЖГИЙГ Л.ӨЛЗИЙТӨГСИЙН ЗОХИОЛ БИШ ГЭВ

УДЭТ Үндэсний уран бүтээлээ дэмжиж, теартрын урын санг нэмэгдүүлж буйгаа илэрхийлэн, шинэ жүжгийн нээлтээ гуравдугаар сарын 1-нд хийсэн.

Тус жүжиг нь үзэгчдэд нэлээдгүй хүлээлтийг үүсгээд байсан. Учир нь Монголын 90-ээд оны уран зохиолын гол төлөөлөгч гэгдэх зохиолч,  яруу найрагч Л.Өлзийтөгсийн “Ярилцлага” зохиолоос сэдвэлсэн бүтээл байсан юм. Уг жүжгийг Төрийн соёрхолт найруулагч Н.Наранбаатар найруулж “Бүсгүйн зурвас” нэртэйгээр  тайзнаа тавьсан.  Гэвч уг зохиолыг өөрийнхөө биш хэмээн Л.Өлзийтөгс өөрийн фэйсбүүк хуудаснаа нийтэлжээ.

Тэрбээр энэ тухайгаа “Жүжгийн нээлтийн үеэр гадаадад байсан учир уржигдар л жүжгийг үзсэн. Миний хүндэлж явдаг олон хүн урам хайрласан пост бичжээ. Бүгдэд нь баярлалаа. Даанч энэ магтаалыг би хүртэх эрхгүй. Учир нь энэ миний зохиол биш байна. Эх зохиол (original play), эх зохиолоос сэдэвлэсэн зохиол (adapted play) хоёр ялгаатай л даа. “Ярилцлага” нэртэй, хоёр гуравхан дүртэй, товчхон, минимал жүжгийг “Бүсгүйн зурвас” нэртэй 20-иод дүртэй, “нийгмийн драм” болгож, айл гэрийн асуудал, улс төрийн өнөөгийн амьдрал, бяцхан секс үзэгдэл, буу шийдэм нэмсэн нь найруулагчийн шийдэл. Миний зохиол тэс өөр. “Нүдний шилэнд үлдсэн зургууд” номыг минь үзээрэй. Нийгмээ элэглэх гэсэн найруулагчийн сэтгэлийг ойлгож байгаа. Үзэгчид ч инээлдээд, алга ташаад л байна билээ. Ер нь “уянгын драм” биш “хошин драм” гэсэн бол онох байж уу. Хошин драм гэдэг муу юм биш шүү дээ. Гэхдээ элэглэх гээд хэтрүүлчихэж. Жишээлбэл, сайд гуай нь сэтгүүлчийн бөгсөн дээр алгадаад л, алгадаад л, алгадаад л орилуулаад байх юм. Гадаадаас буцаж ирсэн гэх хүүгийн “Жүжигчин бид болвоос” гэх тунхаг үгс, “Оройтсон бороо” дуу… Энэ мэтээр нэмсэн үзэгдлүүд үнэмшилгүй байлаа.

“Өлзийтөгсийн "Ярилцлага"-аас сэдэвлэн “Бүсгүйн зурвас” жүжгийг бичсэн ТЭР” гэвэл зөв болох байж. ТЭР гэдэг нь хэн болохыг театрынхан мэдэх биз ээ. Магтаалыг ТЭР хүн л хүртэх эрхтэй шүү” гэжээ.

Б.Бадралмаа

Ардчилал.мн

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ