З.ЭНХБОЛД ЗАСГИЙН ГАЗРЫН САЙД Л.ОЮУН-ЭРДЭНЭД ЗӨВЛӨГӨӨ ӨГЧЭЭ

53092788_830581093958310_6895423827400982528_n_(1).jpg З.ЭНХБОЛД ЗАСГИЙН ГАЗРЫН САЙД Л.ОЮУН-ЭРДЭНЭД ЗӨВЛӨГӨӨ ӨГЧЭЭ

Засгийн газрын хэрэг эрхлэх газрын дарга Л.Оюун-Эрдэнийн тушаалаар хөрөнгө оруулалтын эрхийн цэнхэр, ягаан тасалбараар хийсэн өмч хувьчлалын талаар судлан, дүгнэлт гаргах ажлын хэсгийг байгуулжээ. Энэ тухай өчигдөр /2019.02.25/-нд тус ажлын хэсгийн уулзалтын үеэр Л.Оюун-Эрдэнэ мэдэгдсэн юм.

Тэрбээр хэлэхдээ “1992 онд нэг хувьчлал хийсэн. Тухайн үед төрийн өмчийн 928 объектыг хувьчилсан. Менежментийн хувьчлал, цэнхэр, ягаан тасалбараар хувьчилж тухайн газрын ажилтнуудыг хэвээр нь авч хадгалах, үндсэн чиглэлийг өөрчлөхгүй байх гэсэн хоёр агуулгаар хувьчилсан. Иргэдийн дунд энэ хувьчлал шударга бус болсон, эрх мэдэлтэй хэдхэн хүний хамаарал бүхий компаниуд авсан, ногдол ашиг тараах явц санасан төвшинд хүрээгүй гэх шүүмжлэл байдаг. Үүнийг нэгдсэн байдлаар дүгнээгүй өнөөдрийг хүрсэн.

Тиймээс төрийн өмчөөс хувьчилсан 928 объектод шалгалт оруулж, дүнг ЗГ, УИХ-д танилцуул. Төрөөс хувьчилсан 928 объектыг өнөөдөр ямар байдлаар ашиглагдаж байна, үндсэн зорилгоосоо гажсан уу, тэдгээрт ажиллаж байсан ажилтан албан хаагчийн нийгмийн асуудал шийдвэрлэгдэж чадсан эсэх, цэнхэр, ягаан тасалбар, менежментийн хувьчлал шударга биш гэсэн нийгмийн хардалт дагуулж байна, үнэхээр аж ахуйн нэгжүүд ногдол ашиг тарааж чадахааргүй хэмжээний ашиггүй ажиллаж байна уу эсвэл татвар нуун дарагдуулах замаар ашгаа худал мэдүүлэн өнөөдрийг хүртэл явж ирсэн үү гэдэгт хамтдаа дүгнэлт хийх хэрэгтэй. Шаардлагатай гэж үзвэл ажлын дэд хэсэг хуралдаж болно.

Үүний дараа 2018-2020 онд хувьчлах тухай үндсэн чиглэлийг ярих нь зүйтэй гэж бодож байна. Төрийн өмчийг хувьчлах нь буруу биш гэхдээ эхний хувьчлалтай холбоотой асуудалд дүгнэлт гаргаж, Засгийн газар, УИХ-д танилцуулсны дараа энэ асуудлыг хөндөх нь зүйтэй гэдэг байдлаар тушаал гаргаж байна” гэсэн юм.

Тэгвэл түүний өмч хувьчлалыг шалгах ажлын хэсэг байгуулсан явдал нь нэгэн хүний эгдүүцлийг ихэд хөдөлгөжээ. Тэр хүн бол цагтаа Төрийн өмчийн хорооны даргаар нэр төртэй ажиллаж явсан өдгөөгийн Ерөнхийлөгчийн Тамгын Газрын дарга З.Энхболд юм. Тэрбээр эгдүүцээд зогссонгүй Засгийн Газрын сайд Л.Оюун-Эрдэнэд хандан цахим хуудсаараа зөвлөгөө өгчээ. Тэрбээр “Л.Оюун-Эрдэнэ Сайдад зөвлөгөө: 28 жилийн өмнөх танай намын ЕС (Бямбасүрэн 1990-92, Жасрай 92-96 он)нарын хийсэн ягаан, цэнхэр тасалбарын хувьчлалыг шалгаад юм олохгүй. 1996-2000 оны дуудлага худалдаанаас ч гэсэн но олоход хэцүү, чамаас өмнө 20 жил шалгасан юм. Маш их цаг орно, чиний сайд хийх 18 сард лав амжихгүй. Харин сүүлийн 3-н жилийн "60 тэрбум", ЖДҮ, "Эрдэнэт 51%, 49%" гээд шалгах ажил зөндөө байна” хэмээжээ.

Ийнхүү Төрийн өмчийн хороог нэгэн цагт удирдаж явсан З.Энхболд  Засгийн Газрын сайд Л.Оюун-Эрдэнэд ингэж зөвлөжээ. Харин түүний мэргэн зөвлөгөөг У.Хүрэлсүхийн дүүд ойшоох болов уу, яах бол...

А.ТАМИР

АРДЧИЛАЛ.МН

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ