УИХ-ЫН ДАРГААР Г.ЗАНДАНШАТАР СОНГОГДЛОО

51054675_584970625309998_5686364785248043008_n.png УИХ-ЫН ДАРГААР Г.ЗАНДАНШАТАР СОНГОГДЛОО

Одоогоос хоёр жил гаруйн өмнө МАН-ын Удирдах зөвлөл М.Энхболдыг УИХ-ын даргад нэр дэвшүүлэх шийдвэр гаргасны дагуу түүнийг нэр дэвшүүлж, нийт гишүүдийн 86,8 хувийн саналаар  сонгож байлаа. Гэвч түүний бүрэн эрхийг нь дуусгалгүйгээр намын нөхөд нь өнгөрсөн 1-р сарын 29-нд үүрэгт ажлаас нь  чөлөөлсөн юм.

Ингэснээр УИХ-ын даргын хоосон суудалд хэн очих вэ гэдэг марафон МАН-д сүүлийн хоёр өдөр үргэлжилсэн. Тэгвэл өчигдөр МАН-ын Удирдах зөвлөл хуралдаж, УИХ-ын гишүүн, ЗГХЭГ-ын дарга Г.Занданшатарыг УИХ-ын даргад дэвшүүлсэн билээ.

МАН-ын Удирдах зөвлөлийн хурлын үеэр УИХ-ын даргад Ц.Нямдорж, Д.Оюунхорол нар өөрсдийнхөө нэрийг дэвшүүлсэн. Гэвч Ерөнхий сайдын зүгээс санал болгосон ЗГХЭГ-ын дарга Г.Занданшатарыг МАН-ын Удирдах зөвлөл 100 хувийн саналаар дэмжсэн юм. Түүнчлэн УИХ дахь намын бүлэг нь түүнийг 100 хувийн саналаар дэмжсэн.

Харин өнөөдөр Төрийн байгуулалтын байнгын хорооны хурал 9:00 цагт эхэлж УИХ-ын даргад нэр дэвшигч буй Г.Занданшатарын асуудлыг хэлэлцсэн юм. Тус хурлаар УИХ-ын даргад Г.Занданшатарыг нэр дэвшүүлэхийг дэмжье гэдэг саналын томьёоллоор санал хураахад хуралд оролцсон гишүүдийн 13 нь буюу 100 хувийн саналаар Г.Занданшатарыг УИХ-ын даргад нэр дэвшүүлэхийг дэмжсэн билээ.

Ийнхүү УИХ-ын даргад сонгогдохоор нам, бүлэг, байнгын хорооны дэмжлэг авсан УИХ-ын гишүүн, ЗГХЭГ-ын дарга Г.Занданшатарыг УИХ-ын даргаар сонгохоор УИХ хэлэлцэж, санал хураалаа. Чуулганд оролцсон нийт 63 гишүүдийн 60 буюу 95.2 хувийн саналаар УИХ-ын гишүүн, ЗГХЭГ-ын дарга Гомбожавын Занданшатар Монгол Улсын Их Хурлын даргаар сонгогдлоо.

ТӨГССӨН СУРГУУЛЬ, МЭРГЭЖИЛ:

  • 1987 онд 10 жилийн 77-р дунд сургууль
  • 1992 онд ОХУ-ын Эрхүү хотын Улсын Ардын Аж Ахуйн дээд сургуулийг Санхүү эдийн засагч
  • 2012 онд ОХУ-ын Байгалийн Эдийн засаг, эрх зүйн улсын их сургууль

АЖИЛЛАСАН БАЙДАЛ:

  • 1992-1995 онд Зах зээлийн коллеж (ХҮДС) Маркетинг бизнес судалгааны төвд судлаач, Санхүү-Эдийн засгийн тэнхимд багш
  • 1995-1998 онд Хөдөө Аж Ахуйн банк Эдийн засагч, Валютын хэлтсийн ажилтан, бүтцийн өөрчлөлтийн менежер, Валютын хэлтсийн захирал,
  • 1998-2000 онд Монгол Банк Сургалтын төвийн менежер, Хөдөө Аж Ахуйн банканд Монгол банкны бүрэн эрхт төлөөлөгч, Эрх хүлээн авагчийн багийн гишүүн
  • 2000-2003 онд ХААН Банк Дэд захирал
  • 2003-2004 онд Монгол Улсын Хүнс Хөдөө аж ахуйн дэд сайд
  • 2004-2008 онд Монгол Улсын Их Хурлын гишүүн
  • 2008-2012 онд Монгол Улсын Их Хурлын гишүүн
  • 2009-2012 онд Гадаад харилцааны сайд
  • 2012-2013 онд Монгол Ардын Намын Ерөнхий нарийн бичгийн дарга
  • 2013-2015 онд АНУ-ын Стэнфордын их сургуулийн Хөгжил, Ардчилал Хуулийн засаглалын хүрээлэнд судлаач
  • 2016 оноос Монгол Улсын Их Хурлын гишүүн
  • 2017 оноос Монгол Улсын Засгийн газрын гишүүн, Монгол Улсын сайд, Засгийн газрын Хэрэг эрхлэх газрын дарга

ШАГНАЛ:

  • 2004 онд “Санхүү Банкны тэргүүний ажилтан”
  • 2006 онд “Эдийн засаг санхүүгийн тэргүүний ажилтан”
  • 2009 онд “Алтан гадас” одон
  • 2011 онд “Онц бөгөөд бүрэн эрхт элчин сайд”

ГАДААД ХЭЛ:

  • Англи
  • Орос

А.ТАМИР

АРДЧИЛАЛ.МН

Мэдээ таалагдсан бол лайк дарна уу:

СЭТГЭГДЭЛ (1)

by 2019-02-01

Хувьсгалыг зоригтнууд хийж үр шимийг нь ...-ууд хүртдэг гэж үнэн юмаа.!!!

ШИНЭ МЭДЭЭ