“Хүчит Шонхор“ зах дээр хонины ууц 130-350 мянган төгрөгийн үнэтэй байна

527-1422246184d62463f442921331big.jpg “Хүчит Шонхор“ зах дээр хонины ууц 130-350 мянган төгрөгийн үнэтэй байна

Монголчууд бидний баяр баярын дээд уламжлалт “Цагаан cap” хаяанд иржээ.

Ёс ёмбогор, төр төмбөгөр гэдгийн адил айл өрх бүр cap шинийн баяраа өнгөтэй угтахыг эрхэмлэдэг. Жилдээ ганц тохиох энэ баярыг хэн хүнгүй бусдаас дутахааргүй тэмдэглэх гэсэндээ байгаа бүхнээ “шавхах” нь холгүй нь жишиг болжээ. Учир нь Цагаан сараар идээ шүүс элбэг хангалуун байх нь тэр жилийнхээ өнгийг харуулдаг учир ууц, шүүсэнд нэлээд мөнгө зардаг нь нууц биш.

Ингээд Нийслэлийн томоохон худалдааны төв гэгдэх “Хүчит шонхор” болон “Хар хорин” захад ууц, өвчүү, мах, цагаан идээний үнэ ханш ямар байгааг сурвалжиллаа. Бидний очсон эхний зах “Хүчит шонхор” юм. Хүн, машин хоёр багшралдах энэ захын хаа сайгүй ууц, өвчүү овоолсон бүхээгтэй машин дээр хүмүүс овоорчээ. Үстэй булган малгай, нэхий дотортой монгол дээлээрээ гоёсон малчид, ченж нараас дутахааргүй бизнесмэн болж.

“Ууц аваарай” хэмээн хүн бүрийг дуудаж уйгагүй “бараагаа” тайлбарлах О.Хайдав гуай Архангай аймгийн малчин. Тэрбээр гурав дахь жилдээ “Хүчит шонхор “ зах дээр малынхаа махыг борлуулж байгаа гэнэ. О.Хайдав гуай ченжүүдэд махаа өгөхөөс илүү өөрөө зарж борлуулахыг чухалчилдаг гэв. Түүний машины тэвш дээр 20-30 кг жин татах жижиг, том ууц эзнээ хүлээнэ.

Ах нь 130-150 мянгад зарагдах ууцтай ирсэн. Жинлэж үз. 30 кг жаахан гарантай нь 180-350 мянгаар худалдаалагдаж байна. Өвчүү нэг кг нь 8,000 төгрөг. Жингээсээ шалтгаалаад 160-250 мянган төгрөг болж байна. Хөдөөний бид чинь үүрийн 05.00 цагаас үдшийн бүрий тасартал зогсоход ууц өвчүү нийлээд 4-5-ыг борлуулж байна. Энэ жил иргэдийн худалдан авалт тун муу. Ууц үнэтэй байна, өвчүү авъя гэсэн сонирхолтой иргэн олон байна” гэв.

Харин Дорнод аймгийн малчин Ц.Арслан “Хонины ууц дээд тал нь 350 мянган төгрөгийн ханштай байна. Үхрийн өвчүү нэг кг нь 8,000-8,500 төгрөгөөр худалдаалагдаж байгаа. Жин, өнгө үзэмжээсээ шалтгаалаад өөр, өөр үнэтэй” гэлээ. Иргэдийн хувьд үүрээр тус захыг зорьж ирсэн нь арай хямд буюу нэг кг махыг 4,500-5,200 төгрөгөөр авч байна гэсэн бол өдрийн цагаар худалдааны үнэ өссөн байгааг хэлж байлаа.

Баянзүрх дүүргийн иргэн Т.Сосорбарам “Бензиний үнэ нэмэгдээд бүхий л бараа бүтээгдэхүүний үнэ хөөрөгдсөн байна. Махны үнэ, ханш буух болов уу гээд горьдож байсан ч санаанд хүртэл буухгүй юм. Цагаан сарын үеэр өргөн хэрэглээний барааны үнэ нэмэгдчихээр иргэд бидний нуруун дээрх ачаа хүндэрч байна. Cap шинийн баяраа тэмдэглэхийн тулд тэтгэврийн зээл авсан.

Өнгөрсөн жил 800-900 мянган төгрөгөөр бэлэг сэлт, тавгийн идээ гээд бүхий л зүйлээ бэлддэг байсан бол энэ жил “Cap шинийн төсөв маань нэг сая төгрөгөөр тогтохгүй бололтой. “Хүчит шонхор” захад мах арай хямд гэж бодон зорьж ирэхэд үнэтэй байна” хэмээн учирлав. Бидэнд өөрийгөө Ж.Насанжаргал хэмээн танилцуулсан буурал Налайх дүүргийн иргэн гэнэ.

Өглөө эрт тус захыг зорьсон ч санаандаа хүрсэн ууцаа олж чадаагүй гэлээ. Энэ тухайгаа тэрбээр, “Гайгүй хямд төсөвтэй ууц авъя гээд Налайх дүүргээс хотыг зорьж ирсэн ч ам дүүрэн үнэ угтлаа. Үнэхээр мах, ууц, өвчүүний үнэ тэнгэрт хаджээ. Төрөөс өгөх “Насны хишиг” минь хэзээ орох бол. Cap шинийн бэлтгэлд нэмэрлэх юмсан гэж л харж сууна. Тэтгэврийнхээ хэдэн төгрөг хадгалж, хадгалж ирсэн ч мөнгө маань юунд ч хүрэлцэхгүй нь” хэмээн сэтгэл гундуухан ярилаа.

Энэ мэт шатахууны үнэ, долларын ханшны өсөлттэй холбогддог “Cap шинийн” баярын төсөвтөө иргэд туйлдсан нь илт. Нийслэлийн махны төрөлжсөн зах гэгддэг “Хүчит шонхор”, Сонгинохайрхан дүүрэгт үйл ажиллагаа явуулдаг баруун бүсийн томоохон худалдааны төв “Хархорин” захуудад мах, гурил, цагаан идээ, бусад бараа, бүтээгдэхүүний үнэ ямар байгааг харьцуулсан хүснэгтээс харна уу.

МАХНЫ ҮНЭ, ХАНШ

 

“ХҮЧИТ ШОНХОР” ХУДАЛДААН Ы ТӨВ

“ХАР ХОРИН” ХУДАЛДААНЫ ТӨВ

Хонины мах, цул килограмм нь

7500 төгрөг

7000 төгрөг

Хонины мах, ястай килограмм нь

6800 төгрөг

6500төгрөг

Ямааны мах, цул килограмм нь

6500 төгрөг

5800төгрөг

Ямааны мах, ястай килограмм нь

6000 төгрөг

5500 төгрөг

Үхрийн мах, цул килограмм нь

10000 төгрөг

10000 төгрөг

Үхрийн мах, ястай килограмм нь

8500 төгрөг

8200 төгрөг

Адууны мах, цул килограмм нь

7000 төгрөг

6500 төгрөг

Адууны мах, ястай килограмм нь

6500 төгрөг

6000 төгрөг

Тэмээний мах, цул килограмм нь

5800 төгрөг

5500 төгрөг

Хонины ууц

120-350 мянган төгрөг

110-320 мянган төгрөг

Үхрийн өвчүү килограмм нь

8000-8500

7000-7500 төгрөг

Хонины сүүл килограмм нь

6000 төгрөг

5000 төгрөг

ГУРИЛЫН ҮНЭ

 

“ХҮЧИТ ШОНХОР”

ХУДАЛДААНЫ ТӨВ

“ХАР ХОРИН” ХУДАЛДААНЫ ТӨВ

“Алтан тариа” дээдийн, дээд нэг килограмм нь

1850 төгрөг

1700 төгрөг

“Алтан тариа” дээд нэг килограмм нь

1300 төгрөг

1300 төгрөг

“Алтан тариа” I нэг килограмм нь

1100 төгрөг

1150 төгрөг

“Алтан тариа” II нэг килограмм нь

850 төгрөг

900 төгрөг

ЦАГААН ИДЭЭ

 

“ХҮЧИТ ШОНХОР” ХУДАЛДААНЫ ТӨВ

“ХАР ХОРИН” ХУДАЛДААН Ы ТӨВ

Хорхой ааруул нэг килограмм нь

12000

13000

Дугуй хэвтэй ааруул килограмм нь

25000 төгрөг

20000 төгрөг

Шар тос килограмм нь

17000 төгрөг

14000 төгрөг

Сүү литр нь

3000 төгрөг

2800 төгрөг

Тогооны өрөм

7000-15000 төгрөг

10000-13000 төгрөг

Ээзгий килограмм нь

10000 төгрөг

9000 төгрөг

Бяслаг килограмм нь

13000 төгрөг

12000 төгрөг

Сүүн ааруул

23000 төгрөг

20000 төгрөг

ТАВГИЙН ИДЭЭ

 

“ХҮЧИТ ШОНХОР” ХУДАЛДААНЫ ТӨВ

“ХАРХОРИН” ХУДАЛДААНЫ ТӨВ

Гандангийн хэвийн боов

2500 төгрөг

2500төгрөг

“Зоргол хайрхан” хэвийн боов

1800төгрөг

1800 төгрөг

Тахилын хэвийн боов ширхэг нь

1000 төгрөг

900 төгрөг

Саран Еэвэн

1900 төгрөг

1700 төгрөг

Суурь Еэвэн /том/

8500 төгрөг

8000 төгрөг

Суурь Еэвэн /дунд/

6000 төгрөг

5500 төгрөг

Гурван хос суурь еэвэн

7000 төгрөг

6500 төгрөг

Дээрх хүснэгтээс харахад, “Хархорин” захад мах болоод цагаан идээний үнэ 500-1,000 төгрөгөөр хямд байгаа юм.

Энэ жил ууц, өвчүү болоод cap шинийн тавгийн идээний үнэ бидний санасан шиг хямд байсангүй. Энэ сард шатахууны үнийг 100 төгрөгөөр бууруулсан. Гэвч бусад өргөн хэрэглээний бараа, хүнсний бүтээгдэхүүний үнэ буурахад тодорхой хэмжээгээр нөлөөлж чадсангүй гэдгийг иргэд хэлж байна.

  Эх сурвалж: Үндэсний шуудан сонин
Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ