ЯДАРСАН ИРГЭДЭЭ ГУРИЛ, ЧИХРЭЭР ХУУРДАГ БАЯН ТҮШЭЭД

50268550_2284804878470021_5114465198018658304_n.png ЯДАРСАН ИРГЭДЭЭ ГУРИЛ, ЧИХРЭЭР ХУУРДАГ БАЯН ТҮШЭЭД

Сар шинийн баярын өдрүүд айсуй. Энэ өдрүүдэд Монголчууд дор бүрдээ баярын бэлтгэлээ базааж байна. Энэ цаг мөчид эрхэм түшээд ч эргэн сонгогдох араа бодож, иргэд олондоо бэлгээ тарааж эхэлжээ.

Сүүлийн жилүүдэд УИХ-ын гишүүдийн дунд “мода” болон дэлгэрээд байгаа зүйл бол сонгогдсон тойрогтоо бэлэг тарааж сонгогчдоо тойглох явдал юм. Энэхүү шалгарсан аргадаа УИХ-ын гишүүд, төлөөлөгчид бүрэн мэргэшсэн гэж хэлж болно. Тийм ч учраас “бэлэг” ажиллагаа жилээс жил хүрээгээ тэлж, гишүүн бүрийн бэлэг орон даяар түгэх болжээ.

УИХ-ын гишүүдийн дунд сонгогчид доо аахар, шаахар бэлэг сэлтээр хуураад сурчихсан олон гишүүд бий. Тэдэн дундаас хужаа халуун сав, хуанли, сангийн бойпор зэрэг олон төрлийн бэлэг тараадгаараа өнөөгийн УИХ-ын “шүдний өвчин” болсон М.Энхболд ялгардаг. Тэрбээр олон жил Төв аймгийн иргэдэд иймэрхүү бэлэг сэлтийг тасралтгүй тарааж ирсэн. Сонгогчид нь ч гишүүнийхээ бэлгийг хүлээж суудаг болсон гэнэ билээ.

Түүний энэхүү шалгарсан арга нь өнөөдөр УИХ дунд нь нэвт халдварлаж гишүүн бүр бэлгийн багцтай болчихжээ. Тэрчлэн өгөх бэлгийнхээ үнэ, цэнээр өөр хоорондоо өрсөлддөг ч болж. Ноднин жилийн хувьд гишүүдийн “бэлэг” ажиллагааг Дундговиос хоёрон таа сонгогдсон УИХ-ын гишүүн Б.Наранхүү тэргүүлсэн.

Тэрбээр нутагтаа “шалаанз” машинаар гурил ачин очиж тараасан. Түүний араас олон гишүүд бэлэг тараалтаараа өрсөлдсөн боловч Б.Наранхүүгийн бэлгийг давсан нь цөөхөн байлаа. Ихэнх нь уут чихэр, хайрцаг ул боов, данх, аяга, шуудай нүүрс мэт хэнийг тойргийнхоо хөгшчүүлдээ сарвайсан санагдана.

Харин энэ жилийн хувьд УИХ-ын гишүүдийн бэлэг улам томорчээ. Тэдний салхийг хагалж бас л Дундговийн Б.Наранхүү бэлэг тараалтаа хийлээ. Тэрбээр энэ жилийн хувьд тойргийнхоо 55-с дээс насны эмэгтэй, 60-с дээш насны эрэгтэй бүх хүмүүст тус бүр хоёр шуудай гурил, календарийг тарааж байна. Түүний араас УИХ-ын гишүүн, Эрүүл Мэндийн сайд Д.Сарангэрэл мөн л бэл бэнчинтэй гэдгээ нотолж тойргийнхоо ахмадууддаа хайрцаг ул боов тарааж эхэлжээ.

Ийнхүү иргэдийг төлөөлж, төр сонгогдсон баян түшээд ядуу сонгогчид доо тал засаж, гурил, боов, чихэр тараах их ажилдаа ханцуй шамлажээ.

Гэвч сонгуулийн жилээс бусад цагт тойргоо умартдаг гишүүдэд иргэд, сонгогчид ам муутай байна. Тэд “гурил, чихэр тараах нь иргэдийг нэг удаа хуурах төдийхөн ажил, тэр их мөнгөөрөө илүү нийтэд хэрэгтэй зүйл хийхгүй” хэмээн гишүүдийг шүүмжилж сууна.

Уг нь УИХ-ын гишүүн гэдэг бэлэг тараахаас илүүтэй иргэд биднийг төлөөлж, хууль санаачлах, сонгогдсон тойрогтоо хөрөнгө оруулалт татах, хөгжил авчрах байлтай. Гэтэл тэд гурил, чихэр тараахаас өөрийг хийж чадахгүй бололтой.

А.Төмөр

АРДЧИЛАЛ.МН

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ