ИРЭХ ДОЛОО ХОНОГ ХҮРТЭЛ УИХ-ЫН ЧУУЛГАНЫ НЭГДСЭН ХУРАЛДААНЫГ ХОЙШЛУУЛЛАА

d06344_MPA_PHOTO_2019-1-1094_x974.jpg ИРЭХ ДОЛОО ХОНОГ ХҮРТЭЛ УИХ-ЫН ЧУУЛГАНЫ НЭГДСЭН ХУРАЛДААНЫГ ХОЙШЛУУЛЛАА

Улсын Их Хурлын 2018 оны намрын ээлжит чуулганы өнөөдрийн (2019.01.04) үдээс өмнөх нэгдсэн хуралдаан 11 цаг 12 минутад эхлэв. Хуралдааны эхэнд УИХ-ын дарга М.Энхболд өчигдрийн чуулганы нэгдсэн хуралдааны үеэр УИХ дахь МАН-ын бүлгийн дарга, намын бүлэг хуралдах шаардлагатай байгаа тул чуулганы хуралдааныг түр хойшлуулах хүсэлт  гаргасныг онцлоод энэ талаарх МАН-ын бүлгийн байр суурийг сонслоо.

Бүлгийн дарга Д.Тогтохсүрэн хэлсэн үгэндээ, өчигдөр гишүүдийн ирц хүрээгүй учраас бүлэг хуралдаж чадсангүй. Гишүүдийн зарим нь хөдөө орон нутагт ажиллаж байгаа учир ээлжит хуваарийн дагуу Даваа гарагт намын бүлгийн хуралдаан болно гэдгийг дурдаад, ирэх долоо хоногийн нэг дэх өдрийг хүртэл чуулганы нэгдсэн хуралдааныг хойшлуулах санал гаргалаа. 

УИХ-ын дарга М.Энхболд УИХ дахь МАН-ын бүлгийн даргын саналын дагуу чуулганы нэгдсэн хуралдаан хуралдах боломжгүй болсныг гишүүдэд мэдэгдэхийн зэрэгцээ цаг үеийн хоёр асуудлаар мэдээлэл хийв.

Тэрбээр, Улсын Их Хурлын нэр бүхий гишүүд УИХ-ын даргыг огцруулах шаардлагыг Төрийн байгуулалтын байнгын хороогоор хэлэлцүүлсэн. Энэ талаарх хариу бичгийг  би гишүүдэд хүргүүлсэн. 

Мөн өчигдөр орой Монгол Улсын Ерөнхийлөгч Улсын Их Хурлын тухай хууль, Монгол Улсын Их Хурлын чуулганы хуралдааны Дэгийн тухай хуульд нэмэлт, өөрчлөлт оруулах тухай хуулийн төслийг санаачилж, УИХ-ын Тамгын газар Хууль тогтоомжийн тухай хуульд заасны дагуу хянан үзсэн. Ингээд  өнөөдөр өглөө Ерөнхийлөгчийн санаачилсан Улсын Их Хурлын тухай хууль, УИХ-ын даргыг чөлөөлөх, огцруулах энэ зүйл, заалт дээр нэмэлт оруулах, Монгол Улсын Их Хурлын чуулганы хуралдааны Дэгийн тухай хуульд өөрчлөлт оруулах төслийг өргөн барьсан. Би хүлээж авсан. Энэ төслийг би ажил үүргийн хуваарийн дагуу Төрийн байгуулалтын байнгын хороонд цохож шилжүүлсэн. Энэ асуудлыг эхлээд Төрийн байгуулалтын байнгын хороо  хэлэлцэн шийдвэрлэсний дараа Улсын Их Хурлын чуулганы хуралдааны дэгийн дагуу энэ асуудлаа хэлэлцэж, ярина гэв.

УИХ-ын дарга гишүүдэд хандаж дараа дараагийн хуралдаанд ирцээ бүрдүүлж, дөрөв дэх долоо хоногийн турш гацаанд ороод байгаа чуулганы хуралдаанд үнэлэлт, дүгнэлт хийхийг санууллаа.

Түүнчлэн Ерөнхийлөгчийн өргөн барьсан хуулийн төсөл, Засгийн газрыг гишүүдийн томилохтой холбогдсон асуудал, өнөөдөр алт олборлогчид хуулийн мухардмал байдалд орсон нөхцөл байдлыг үнэлж дүгнэн Ашигт малтмалын тухай хуульд нэмэлт, өөрчлөлт оруулах тухай хуулийн төслүүдийг яаралтай хэлэлцэх шаардлагатай байгаа тул хуралдаандаа  идэвхтэй оролцохыг гишүүдэд анхааруулав гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ