МАН-ЫН БАГА ХУРЛААР НАМЫН ДАРГАА БАНГАДАХ УУ?

dfdf.png МАН-ЫН БАГА ХУРЛААР НАМЫН ДАРГАА БАНГАДАХ УУ?

МАН Бага хурлаа өнөөдөр хуралдуулахаар товлон зарласан. Энэ удаагийн Бага хурлаараа улс төрийн болон сонгуульт ажилд томилогдсон Бага хурлын гишүүдийг нөхөн томилох, Удирдах зөвлөлийн бүрэлдэхүүнд өөрчлөлт оруулах болон УИХ дээр үүсээд байгаа цаг үеийн асуудлуудыг хэлэлцэхээр төлөвлөжээ.

Бага хурлаар ямар асуудал хэлэлцэх, улс төрийн ямар шийдвэр гарахаас цаашдын МАН болон олон хоног гацаанд байсан төрийн ажил хэрхэн өрнөх вэ гэдэг чиг гарах болов уу. МАН-ын дарга У.Хүрэлсүх өмнө нь чуулганы индэрээс “Би намын гишүүддээ хариуцлага тооцох асуудлыг ярина. Төрд ч, намдаа ч цэвэрлэгээ хийнэ, эхлүүлнэ” гэж байсан удаатай.

Харин хэн, хэнд хариуцлага тооцох нь одоогоор тодорхойгүй байгаа билээ. Зарим эх сурвалжуудын мэдээлж байгаагаар МАН-ын бага хуралд Хяналтын ерөнхий хорооноос УИХ-ын дарга М.Энхболд, УИХ-ын гишүүн Ж.Мөнхбат, Н.Номтойбаяр нарыг хөөхөөр төлөвлөж, тогтоол үйлдээд байгаа гэх мэдээлэл байгаа юм.

Тэгвэл өчигдөр МАН-ын дарга, Ерөнхий сайд У.Хүрэлсүхтэй холбоотой нэгэн баримтийг УИХ-ын гишүүн Н.Номтойбаяр олон нийтэд эл болгосон юм.

Тэрбээр хэвлэлийн хурлын үеэр хэлэхдээ "2016 оны 12-р сарын 13-ны өдөр Ухнаагийн Хүрэлсүх өөрийн төрсөн дүү Ухнаагийн Давхарбаярын нэрээр “Жаргалант мах импекс” компанид 1.3 тэрбум төгрөгийн зээлийг авах гэрээнд гарын үсэг зурсан. Улмаар 2017 оны хоёрдугаар сарын 15-нд 327 сая, наймдугаар сард 236 сая төгрөгийн зээл авсныг олж тогтоолоо.

Мэдээж үлдэгдэл 800 орчим сая төгрөгийг авсан нь тодорхой. Хэдийгээр нотлоход хэцүү ч шударга ёсыг хүссэн. Тухайн үед энэ асуудлыг хөөцөлдөж, дүүдээ зээл авахыг оролдож байсан. УИХ-ын чуулганаар өөрийг нь огцруулах асуудлаар хуралдахад шударгын баг зүүж, жүжиг тавьж байсанд үнэхээр дургүйцсэн нэгэн эмэгтэй надад энэ баримтыг өгсөн. Монгол Улс ЖДҮ-чин Ерөнхий сайд, МАН ЖДҮ-чин даргатай болчихлоо. 

Ерөнхий сайд У.Хүрэлсүх Хөрөнгө орлогын мэдүүлэгтээ 1,7 тэрбум төгрөгийн хадгаламж, 2 тэрбум орчим төгрөгөөр үнэлэгдэх үл хөдлөх хөрөнгө, олон зуун саяар үнэлэгдэх автомашин, мотоцикл, Горхи Тэрэлжийн тусгай хамгаалалтын газар байх “Бугат Ресорт” гэх өндөр зэрэглэлийн амралтын газартай гэсэн байна. Энэ олон тэрбумын хөрөнгийг амьдралдаа бизнес эрхэлж үзээгүй хүн яаж олж авсныг тайлбарлах цаг нь болсон.

Мөн Ерөнхий сайдаас огцрох өргөдлөө өгөхийг шаардаж байна. Түүнд 48 цагийн хугацаа өгч байна. Өөрөө огцрохгүй бол Ерөнхий сайдаас огцруулах бичгийг дахин өргөн барина. Намайг МАН-аас хөөх шийдвэр аль арваннэгдүгээр сард гарчихсан. Хөөгдөх гэж байгаа болохоор ийм мэдээлэл хийгээгүй. Бага хурлаар намаас хөөвөл хөөнө биз. Надад байгаа мэдээллээр ЖДҮХС-гаас зээл авсан 30 гишүүний баримт байна. АН-аас 1 хүн нэмэгдээд 31 ЖДҮ-чинтэй болж байна. Энэ хүмүүс Ерөнхий сайдыг хамгаалагч болчихоод байна. Ц.Нямдорж сайд ажлаа хиймээр байна. Эрх мэдэлтний өмнө хоёр нүүр гаргаж болохгүй ээ. Уг зээлийг Ж.Эрдэнэбатын Засгийн газрын үед авсан. “Тухайн үед манай дүүгийн компанийг дэмжиж өгнө үү хэмээн явж байсныг би сүүлд мэдсэн” гэж мэдэгдсэн юм. МАН-ын бага хурлаар дээрх асуудлыг тавих бөгөөд зөвхөн Ерөнхий сайдаас бус намын даргаас ч огцруулна” гэж мэдэгдээд байгаа билээ.

Тиймээс өнөөдөр хуралдах МАН-ын Бага хурлаар намын гишүүдээс илүүтэй намынхаа даргын асуудлыг авч хэлэлцэх  нь тодорхой боллоо. МАН-ын дарга У.Хүрэлсүх бусаддаа хариуцлага тооцох уу, эсвэл МАН-ын гишүүд даргадаа хариуцлага тооцох уу гэдгийг харах үлдлээ.

А.Төмөр

АРДЧИЛАЛ.МН

 

Мэдээ таалагдсан бол лайк дарна уу:

СЭТГЭГДЭЛ (0)

ШИНЭ МЭДЭЭ